రాత్రయితే చాలు గోడ దూకి స్మశానంలోకి యువకుడు.. పోలీసుల విచారణలో అసలు విషయం

సిద్దిపేట జిల్లా హుస్నాబాద్ పట్టణ శివారులోని స్మశానవాటిక పరిసరాల్లో గత ఐదు రోజులుగా ఓ వ్యక్తి అనుమానాస్పదంగా సంచరిస్తుండటంతో స్థానికంగా కలకలం రేగింది. రాత్రివేళల్లో స్మశానవాటికలో తిరుగుతూ.. పగటి సమయంలో సమాధుల మధ్య ఉండటాన్ని స్థానికులు గమనించారు. దీంతో అతడి కదలికలపై అనుమానాలు వ్యక్తం చేసిన స్థానికులు అప్రమత్తమయ్యారు. స్మశానవాటిక సమీపంలోనే వ్యవసాయ బావులు ఉండటంతో రైతులు, ఇతరులు రాత్రి వేళల్లో అటువైపు వెళ్లేందుకు భయపడినట్లు స్థానికులు తెలిపారు. స్మశానవాటిక గోడ దూకి లోపలికి వెళ్లడం, పగటిపూట సమాధుల మధ్య ఉండటం వంటి కదలికలు కనిపించడంతో స్థానికులు అతడిని గుర్తించి పట్టుకునేందుకు ప్రయత్నించారు. ఈ క్రమంలో స్థానికులంతా కలిసి చివరకు ఆ వ్యక్తిని పట్టుకున్నారు. అనంతరం అతడిని హుస్నాబాద్ పోలీసులకు అప్పగించారు. పోలీసులు అతడిని అదుపులోకి తీసుకుని వివరాలు సేకరించారు. అతడి సంచారం వెనుక కారణం ఏమిటి, ఎక్కడి నుంచి వచ్చాడు, ఇక్కడ ఎందుకు ఉంటున్నాడనే అంశాలపై విచారణ చేపట్టారు.

పోలీసుల విచారణలో ఆ వ్యక్తికి మతిస్థిమితం సరిగా లేదని ప్రాథమికంగా తేలినట్లు సమాచారం. దీంతో స్థానికులు ఊహించిన విధంగా అతడి సంచారం వెనుక మరేదైనా కారణం ఉందా అనే అంశంపైనా పోలీసులు ఆరా తీస్తున్నారు. అతడి పూర్తి వివరాలను సేకరించి, కుటుంబ సభ్యులను గుర్తించే ప్రయత్నం చేస్తున్నట్లు తెలుస్తోంది. ఐదు రోజులుగా స్మశానవాటిక పరిసరాల్లో వ్యక్తి సంచారం స్థానికులను ఆందోళనకు గురిచేసినప్పటికీ.. పోలీసులు విచారణలో అతడికి మతిస్థిమితం సరిగా లేదని తేలడంతో పరిస్థితిపై కొంత స్పష్టత వచ్చినట్లు స్థానికులు భావిస్తున్నారు. ఘటనపై పోలీసులు మరింత సమాచారం సేకరిస్తున్నారు.