YSR: దివంగత వైఎస్సార్‌కు ఎల్లప్పుడూ నీడలా ఉన్న సూరీడు గురించి ఎవ్వరికీ తెలియని నిజం..

రాయలసీమకు చెందిన మాజీ ఎంపీ, సీనియర్ కాంగ్రెస్ నేత సాయి ప్రతాప్.. దివంగత ముఖ్యమంత్రి వైఎస్ రాజశేఖర్ రెడ్డికి అత్యంత సన్నిహితుడైన సూరి గురించి ఒక సంచలన విషయాన్ని వెల్లడించారు. సాయి ప్రతాప్.. రాజశేఖర్ రెడ్డి జీవితంలోని కీలక ఘట్టాలను పంచుకున్నారు. సూరిని రాజశేఖర్ రెడ్డికి ఆత్మబంధువుగా, నిస్వార్థ సేవకుడిగా సాయి ప్రతాప్ అభివర్ణించారు. విజయమ్మ దూరంగా ఉన్న సమయాల్లో కూడా, రాజశేఖర్ రెడ్డికి అవసరమైన ఆహారం, ఔషధాలు, ఆరోగ్యం, సౌకర్యాల విషయంలో సూరి అహర్నిశం పర్యవేక్షించి, సేవ చేశారని సాయి ప్రతాప్ గుర్తు చేసుకున్నారు. సూరి తన జీవితాన్ని రాజశేఖర్ రెడ్డి పాదాల వద్ద పెట్టారని, ఆయన గొప్ప మనసున్న వ్యక్తి అని పేర్కొన్నారు. సూరి బయటికి రౌద్రంగా, కఠినంగా మాట్లాడినట్లు కనిపించినా, అతనిది మెత్తని మనసని సాయి ప్రతాప్ వివరించారు.

సూరి రాజశేఖర్ రెడ్డికి బాడీగార్డ్‌గా ఎలా చేరారనే అసాధారణ సంఘటనను సాయి ప్రతాప్ వివరించారు. ఈ ఘటన చాలా మందికి తెలియదని ఆయన అన్నారు. ఒకసారి, సాయి ప్రతాప్, రాజశేఖర్ రెడ్డి పులివెందులలో కూర్చుని ఉండగా, నల్లగా ఉన్న ఒక పిల్లవాడు నిక్కరు వేసుకుని వచ్చాడు. ఆ పిల్లవాడి స్వగ్రామం పులివెందులేనని, అతని పేరు సూర్యనారాయణ రెడ్డి అయి ఉండవచ్చని సాయి ప్రతాప్ తెలిపారు. ఆ పిల్లవాడు రాజశేఖర్ రెడ్డితో “సార్, నేను మీ దగ్గర బాడీగార్డ్‌గా ఉంటాను” అని అన్నాడు. దానికి రాజశేఖర్ రెడ్డి “అరే పిల్లోడా, నువ్వేం బాడీగార్డ్ రా?” అని సరదాగా ప్రశ్నించారు. అయితే, ఆ పిల్లవాడు తన నిర్ణయం మార్చుకోకుండా “లేదు సార్, నేను బాడీగార్డ్‌గా ఉంటాను” అని పట్టుబట్టాడు. అప్పుడు రాజశేఖర్ రెడ్డి, దాదాపు 100 గజాల దూరంలో ఉన్న ఒక రాతి గోడను చూపించి, “నిజంగా నువ్వు బాడీగార్డ్‌గా ఉండాలంటే పరిగెత్తుకొచ్చి ఆ రాతి గోడకు తల కొట్టురా” అని సవాల్ విసిరారు. సాయి ప్రతాప్ సమక్షంలో, ఆ పిల్లవాడు ఏమాత్రం సంకోచించకుండా, నేరుగా పరిగెత్తుకొచ్చి తన తలను ఆ రాతి గోడకు బలంగా కొట్టాడు. దాంతో అతని తల చీలిపోయి, రక్తం కారడం ప్రారంభించింది. వెంటనే రాజశేఖర్ రెడ్డి “ఒరేయ్ తిక్కోడా, ఎంత పని చేసినావ్” అని ఆశ్చర్యపోయారు. అప్పట్లో రాజశేఖర్ రెడ్డి ఒక ప్రైవేట్ ఆసుపత్రిలో డాక్టర్‌గా ఉండేవారు. వెంటనే ఆ పిల్లవాడిని ఆసుపత్రికి తీసుకెళ్లి, కుట్లు వేయించారు. ఆ తర్వాత “యు హావ్ బీన్ అపాయింటెడ్” అని చెప్పి సూరిని తన బాడీగార్డ్‌గా నియమించారు. ఈ సంఘటన సూరి చిన్న వయసులోనే ప్రదర్శించిన అసాధారణ ధైర్యాన్ని, రాజశేఖర్ రెడ్డి పట్ల అతని అచంచలమైన నిబద్ధతను స్పష్టంగా చూపిస్తుంది. సాయి ప్రతాప్ ఈ కథను వివరిస్తూ, సూరి అంకితభావం ఎంతో గొప్పదని, అతని భావాలు ఎంత పటిష్టమైనవో ఈ సంఘటన ద్వారా తెలుస్తుందని అన్నారు.

మరిన్ని ఆంధ్రప్రదేశ్‌ వార్తల కోసం క్లిక్‌ చేయండి.