ఇది వ్యక్తిగత కక్ష కాదు.. ఆడియో వీడియో సాక్ష్యాలున్నాయి: స్పీకర్ తమ్మినేని

టీడీపీ మాజీ ఎమ్మెల్యే కూన రవికుమార్‌పై ఉన్న కేసుల్లో తన కుటుంబ సభ్యుల ప్రమేయం లేదన్నారు ఏపీ శాసన సభ స్పీకర్ తమ్మినేని సీతారాం. కూన  రవికుమార్ ఉద్యోగుల ఆత్మగౌరవాన్ని దారుణంగా దెబ్బతీసేవిధంగా ప్రవర్తించారనేందుకు ఆడియో,వీడియో సాక్ష్యాలున్నాయన్నారు. అందుకే ఉద్యోగులు కేసు పెట్టారన్నారని తెలిపారు స్పీకర్. కూన రవికుమార్ విషయంలో టీడీపీ రాజకీయం చేస్తోందని ఆరోపించారు. గతంలో అచ్చెన్నాయుడు, కూన రవికుమార్‌లు అధికారులను ఎంతగా బెదిరించారో అందరికీ తెలుసునని, ఉద్యోగులన్ని బెదిరించిన చరిత్ర వారిదంటూ మండిపడ్డారు.

గత టీడీపీ ప్రభుత్వంలో ఎమ్మెల్యేగా, టీడీపీ నేతగా ఉన్న కూన రవికుమార్ ఎంపీడీఓ కార్యాలయంలోకి తన అనుచరగణంతో చొరబడి ప్రభుత్వ అధికారులను దుర్భాషలాడుతూ బెదిరింపులకు పాల్పడ్డారు. ఈ ఘటనపై రవికుమార్‌తో పాటు మరో 11 మందిపై పోలీసులు పలు సెక్షన్ల కింద కేసులు నమోదు చేశారు. ఒక్క సారిగ కేసులు నమోదైనప్పటినుంచి రవికుమార్ అఙ్ఞాతంలోకి వెళ్లిపోయారు. మరోవైపు ముందుస్తు బెయిల్ కోసం న్యాయస్ధానాన్ని కూడా ఆశ్రయించినట్టు తెలుస్తోంది. ఆయనకు బెయిల్ మంజూరైతేనే బయటకు వచ్చే ఛాన్స్ ఉన్నట్టుగా టీడీపీ వర్గాలు చెబుతున్నాయి.

శ్రీకాకుళం జిల్లాలో ప్రస్తుతం కూన రవికుమార్ కేసుల ఘటన తీవ్ర చర్చకు దారితీస్తోంది. ముఖ్యంగా స్పీకర్ తమ్మినేనికి కూన సమీప బంధువు కూడా. అయినప్పటికీ వీరిద్దరిమధ్య ఉన్న రాజకీయ విభేదాలు కాస్తా వ్యక్తిగత వైరాలుగా మారాయనే వాదన వినిపిస్తోంది. ఇదిలా ఉంటే కూన రవికుమార్‌కు రాజకీయ గురువు స్వయానా తమ్మినేని కావడం గమనార్హం.