ట్రంప్ మరో సంచలన నిర్ణయం.. 200 కి పైగా ఆహార ఉత్పత్తులపై సుంకాలను ఎత్తివేత!

అమెరికా అధ్యక్షుడు డొనాల్డ్ ట్రంప్ సర్కార్ దెబ్బకు దిగివచ్చింది. దేశంలోని అనేక వస్తువులపై విధించిన సుంకాలకు సంబంధించి ఒక ప్రధాన ఉత్తర్వును జారీ చేశారు. గొడ్డు మాంసం, కాఫీ, కొన్ని రకాల పండ్లు సహా అనేక వస్తువులపై సుంకాలను ఎత్తివేస్తూ కార్యనిర్వాహక ఉత్తర్వుపై ట్రంప్ శుక్రవారం (నవంబర్ 14) సంతకం చేశారు. పెరుగుతున్న ధరలు, ద్రవ్యోల్బణం ఇబ్బందులకు గురైన వినియోగదారుల నుండి వస్తున్న ఒత్తిడికి ప్రతిస్పందనగా ట్రంప్ ఈ చర్య తీసుకున్నారు.

నవంబర్ నెలలో జరిగిన ఆఫ్-ఇయర్ ఎన్నికలలో ఓటర్లు ఆర్థిక ఆందోళనలను తమ ప్రధాన ప్రాధాన్యతగా పేర్కొన్నారు. అదే సమయంలో, దేశం తీవ్రమైన ఆర్థిక సమస్యల కారణంగా వర్జీనియా, న్యూజెర్సీలలో రిపబ్లికన్ అభ్యర్థులు ఘోర పరాజయాలను చవిచూడాల్సి వచ్చింది. దీంతో అధ్యక్షులు డొనాల్డ్ ట్రంప్ దిద్దుబాటు చర్యలు మొదలు పెట్టారు. ఇందులో భాగంగానే సుంకాల ఎత్తివేత నిర్ణయం వచ్చింది.

గొడ్డు మాంసం, కాఫీ, టీ, పండ్ల రసం, కోకో, సుగంధ ద్రవ్యాలు, అరటిపండ్లు, నారింజ, టమోటాలు, కొన్ని ఎరువులపై సహా 200 కి పైగా ఆహార ఉత్పత్తులపై సుంకాలను ఎత్తివేస్తూ అధ్యక్షుడు డొనాల్డ్ ట్రంప్ ప్రభుత్వం కార్యనిర్వాహక ఉత్తర్వు జారీ చేసింది. అమెరికాలో ద్రవ్యోల్బణం, కిరాణా ధరల నిరంతర పెరుగుదల దృష్ట్యా ఇది ట్రంప్ సుంకాల విధానంలో ఒక ప్రధాన మార్పుగా భావిస్తున్నారు. అయితే అమెరికాలో ద్రవ్యోల్బణం లేదని ట్రంప్ ఇప్పటికీ వాదిస్తున్నారు. ఈ ఏడాది ఏప్రిల్‌లో ట్రంప్ చాలా దేశాల నుండి దిగుమతులపై సుంకాలను విధించారు. అయితే, ఆర్థిక నిపుణుల నుండి దీనికి విరుద్ధంగా ఆధారాలు ఉన్నప్పటికీ, సుంకాలు వినియోగదారుల ధరలను పెంచమని ట్రంప్, అతని అధికారులు చాలా కాలంగా వాదిస్తోంది.

అమెరికాలో పెరుగుతున్న గొడ్డు మాంసం ధరలు ప్రత్యేక ఆందోళన కలిగిస్తున్నాయి. ట్రంప్ వాటిని తగ్గించడానికి సమర్థవంతమైన చర్యలు తీసుకుంటానని ఇప్పటికే సూచించారు. అతిపెద్ద గొడ్డు మాంసం ఎగుమతిదారు బ్రెజిల్ నుండి దిగుమతులపై విధించిన సుంకాలు కూడా ధరల పెరుగుదలకు ప్రధాన కారణం..!

ఇదిలావుంటే, ఈక్వెడార్, గ్వాటెమాల, ఎల్ సాల్వడార్, అర్జెంటీనా దేశాలలో ఉత్పత్తి అయ్యే వ్యవసాయ ఉత్పత్తులపై దిగుమతి సుంకాలను తగ్గించడానికి రూపొందించిన ఫ్రేమ్‌వర్క్ ఒప్పందాలను అమెరికా కుదుర్చుకున్నట్లు ప్రకటించిన తర్వాత అధ్యక్షుడు ఈ కార్యనిర్వాహక ఉత్తర్వుపై సంతకం చేశారు. కాఫీ దిగుమతిని పెంచడానికి సహాయపడటానికి దానిపై సుంకాలను తగ్గిస్తున్నట్లు ట్రంప్ ఈ వారం ప్రారంభంలో సూచించారు.

మరిన్ని అంతర్జాతీయ వార్తల కోసం ఇక్కడ క్లిక్ చేయండి..