వ్యవసాయ చట్టాలకు వ్యతిరేకంగా అమెరికాలో నిరసనలు.. జాతిపిత గాంధీ విగ్రహం ధ్వంసం.. ఖలిస్థానీ మద్దతుదారుల దుశ్చర్య..

Mahatma Gandhi’s statue Defaced: అమెరికాలో దారుణం చోటు చేసుకుంది. వాషింగ్టన్‌లోని భారత రాయబార కార్యాలయం ముందు ఉన్న మహాత్మా గాంధీ విగ్రహాన్ని ఖలిస్థానీ మద్దతుదారులు ధ్వంసం చేశారు. విగ్రహానికి రంగులు పూసి బ్యానర్లు కప్పేశారు. భారత్​లో కొత్తగా తీసుకొచ్చిన సాగు చట్టాలకు వ్యతిరేకంగా సిక్కు-అమెరికన్లు చేపట్టిన నిరసనల సందర్భంగా ఈ ఘటన చోటు చేసుకుంది.

ఇండియాలో నిరసనలు చేస్తోన్న రైతులకు సంఘీభావంగా.. గ్రేటర్​ వాషింగ్టన్​ డీసీ, మేరీలాండ్​, వర్జీనియాలతో పాటు న్యూయార్క్​, న్యూజెర్సీ, పెన్సిల్వేనియా, ఇండియానా, ఓహియో, నార్త్​ కరోలినా వంటి రాష్ట్రాల నుంచి వందల మంది సిక్కులు ఆందోళనలు చేపట్టారు. వాషింగ్టన్​ డీసీలోని భారత రాయబార కార్యాలయం వద్ద కార్ల ర్యాలీ నిర్వహించారు.

అయితే.. శాంతియుతంగా జరుగుతున్న నిరసనల్లో వేర్పాటువాద సిక్కులు ఖలిస్థానీ జెండాలు, భారత వ్యతిరేక పోస్టర్లు, బ్యానర్లతో ప్రవేశించటంతో ఉద్రిక్తంగా మారాయి. వారంతా ‘ద రిపబ్లిక్​ ఆఫ్​ ఖలిస్థాన్​’కు చెందినవారిగా పేర్కొన్నారు. ఈ సందర్భంగా చాలా మంది ఖలిస్థానీ అనుకూల సిక్కు యువత.. మహాత్మా గాంధీ విగ్రహం వద్దకు వెళ్లి భారత్​కు వ్యతిరేకంగా నినాదాలు చేశారు. పోస్టర్లను గాంధీ విగ్రహంపై ఉంచారు. కాగా, ఈ ఘటన పట్ల వాషింగ్టన్ మెట్రోపాలిటన్ అధికారులు భారత రాయబార కార్యాలయానికి క్షమాపణలు తెలిపారు. అటు ఈ ఘటనపై పోలీసులు పలువురు ఆందోళనకారులపై కేసు నమోదు చేసి దర్యాప్తు చేస్తున్నారు.