Vasuki: ఇది పురాణాల్లో చెప్పిన వాసుకి జాతి పామా..? ఎన్ని అడుగులు ఉందంటే..?

హిందూ పురాణాల ప్రకారం.. వాసుకి శివుని మెడను అలంకరించిన శక్తివంతమైన సర్ప రాజుగా చెబుతుంటారు. ఈ పాముకు ఎన్నో దైవిక శక్తులు ఉన్నాయన్నది హిందువుల విశ్వాసం. అయితే ఆశ్చర్యకరంగా, లక్షలాది సంవత్సరాల క్రితం భూమిపై సంచరించిన శక్తివంతమైన పురాతన సర్పం  శిలాజాలను ఒక పరిశోధన కనుగొనడం చర్చనీయాంశమైంది. ఈ భారీ సర్ప జాతి శిలాజాలకు శివుడి కంఠాభరణ సర్పమైన వాసుకి పేరు మీదుగా ‘వాసుకి ఇండికస్’ అని  పెట్టారు. పరిశోధకుల అభిప్రాయం ప్రకారం, ఈ పాములు సుమారు 47 మిలియన్ సంవత్సరాల క్రితం ఇప్పుడు భారతదేశంలో నివసించాయని అంచనా. ఇవి 36 నుండి 50 అడుగుల పొడవు ఉండి ఉంటాయని చెబుతున్నారు. ఈ అంతరించిపోయిన జాతి ఇప్పటివరకు ఉన్న అతిపెద్ద పాములలో ఒకటి కావచ్చట. సైంటిఫిక్ రిపోర్ట్స్ జర్నల్‌లో ప్రచురించబడిన ఈ పరిశోధనలు ఈ పురాతన సర్ప పరిమాణం, జీవనశైలి గురించి ఆసక్తికర విషయాలను తెలియజేశాయి.

ఇండియన్ ఇన్‌స్టిట్యూట్ ఆఫ్ టెక్నాలజీ రూర్కీ (IIT-రూర్కీ) పరిశోధకుల బృందం 2005లో గుజరాత్‌లోని కచ్‌లో పంధారో బొగ్గు గనిలో మొదట కనుగొనబడిన 27 శిలాజ వెన్నుపూసలపై అధ్యయనం చేసింది. మొదట్లో వాటిని మొసలి లాంటి సరీసృపాల శిలాజాలుగా భావించారు. లోతైన విశ్లేషణలో అవి పాముకు చెందినవని నిర్ధారించారు. వెన్నుపూస ఆకారం, నిర్మాణం మందపాటి, స్థూపాకార శరీరాన్ని కలిగి ఉందని చూపించింది. పూర్తి అస్థిపంజరం కనుగొనబడనప్పటికీ, పరిమాణ అంచనాల ప్రకారం ఈ జాతిని ఇప్పటివరకు తెలిసిన అతిపెద్ద పాములలో ఒకటిగా చెబుతున్నారు.