3.8 కోట్ల ఏళ్ల క్రితం అగ్నిపర్వత బూడిదలో పెనవేసుకుని ఉండి పోయిన నాలుగు పాములు..! శాస్త్రవేత్తలకే షాకిచ్చే నిజాలు..?
పురావస్తు శాస్త్రం, ప్రాచీన జీవుల పరిశోధనల్లో తరచూ అనేక అద్భుతాలు వెలుగు చూస్తుంటాయి. తాజాగా అమెరికాలోని వ్యోమింగ్లో లభించిన ఒక పురాతన శిలాజం శాస్త్రవేత్తలను తీవ్ర ఆశ్చర్యానికి గురిచేసింది. సుమారు 3.8 కోట్ల సంవత్సరాల క్రితంనాటి ఒకే బిలంలో పెనవేసుకుని ఉన్న నాలుగు పాముల శిలాజాలను పరిశోధకులు కనుగొన్నారు. అసలు ఏం జరిగింది?
Updated on: Aug 21, 2026 | 6:13 PM
సాధారణంగా పాములు ఒంటరిగా జీవించే అలవాటు ఉన్న జీవులుగా భావిస్తారు. అయితే, వ్యోమింగ్ ప్రాంతంలోని ఇయోసిన్ యుగానికి చెందిన రాతి పొరల్లో కనుగొన్న ఈ శిలాజంలో నాలుగు పాములు ఒకదానికొకటి చుట్టుకుని, ఒకే బిలంలో సురక్షితంగా ఉన్నట్లు స్పష్టంగా కనిపిస్తోంది. తీవ్రమైన చలి వాతావరణం లేదా విషమ పరిస్థితుల నుంచి తట్టుకోవడానికి, తమ శరీర ఉష్ణోగ్రతను కాపాడుకోవడానికి ఇవి ఒకే చోట చేరి ఉండి ఉంటాయని భావిస్తున్నారు. అదే సమయంలో అనూహ్యంగా మట్టిచరియలు లేదా శిథిలాలు పడి అవి లోపల చిక్కుకుపోయి ప్రాణాలు కోల్పోయి ఉండవచ్చని శాస్త్రవేత్తలు అంచనా వేస్తున్నారు.
ప్రాచీన కాలంలో కూడా పాములకు ఒకేచోట సమూహంగా ఉండే ప్రవర్తన లేదా పరస్పర సహకార ధోరణి ఉందనడానికి ఇది అత్యంత ప్రాచీనమైన, స్పష్టమైన భౌతిక ఆధారంగా నిలిచింది. భూమి పొరల్లో మిలియన్ల సంవత్సరాల పాటు చెక్కుచెదరకుండా, ఒకే చోట నాలుగు పాముల అస్థిపంజరాలు లభించడం జీవపరిణామ క్రమాన్ని అధ్యయనం చేయడానికి ఎంతో ఉపయోగపడుతుంది.
ఈ పరిశోధన ఫలితాలు పాముల పరిణామ క్రమం, వాటి పురాతన జీవనశైలిపై కొత్త వెలుగును ప్రసరింపజేస్తున్నాయని శాస్త్రవేత్తలు వెల్లడించారు. ఒకేచోట గుమిగూడే ఈ స్వభావం ఆధునిక కాలంలో కొన్ని జాతుల పాముల్లో కనిపిస్తున్నప్పటికీ, ఇది కోట్లాది సంవత్సరాల క్రితమే ప్రారంభమైందని ఈ శిలాజం రుజువు చేస్తోందని స్పష్టం చేశారు.
మరిన్ని ట్రెండింగ్ న్యూస్ కోసం క్లిక్ చేయండి..
