దేవుడి పేరుతో వ్యాపారమా!? ఇది సనాతన ధర్మ స్ఫూర్తికి తూట్లు పొడవటం కాదా!?

సర్వదర్శనం లేని ఆలయమే లేదు మనదేశంలో. పేదవాళ్లు సైతం ఉచితంగా దర్శించుకోవచ్చు. దేవుడిని డబ్బుతో తూకం వేయం అనే వాళ్లకు సైతం సర్వదర్శనం వెసులుబాటు ఉంది. మరి… విశాఖలో ఇదేం దందా. ఆర్‌కే బీచ్ రోడ్‌లోని ఆన్‌మూల్ విల్లాలో మే 22 నుంచి శ్రీ గరుడ అయోధ్య రామ మందిరం నమూనా పేరుతో ఎగ్జిబిషన్ మొదలుపెట్టారు. ఈ నెలాఖరు వరకు స్థానికులు సందర్శించేందుకు అనుమతి తీసుకున్నారు. బాలరాముడిని చూసేందుకు అయోధ్య వరకు వెళ్లలేని వారికి ఇదో వరం లాంటిది అని పెద్ద ఎత్తున ప్రచారం చేశారు. నమూనాను కూడా అచ్చంగా అయోధ్య మందిరాన్ని పోలేలా సెట్టింగ్ వేశారు. ఆ తరువాత మొదలుపెట్టారు అసలు వ్యాపారం. ఎగ్జిబిషన్‌లోకి ఎంటర్‌ కాగానే చెప్పులు విప్పండి అంటారు. జతకో 5 రూపాయలు. సరే.. ఆలయంలోకి పాదరక్షలతో వెళ్లొద్దు కాబట్టి.. ఆ 5 రూపాయలేదో ఇచ్చేస్తాం మనం. అలా చెప్పులు విప్పి లోపలికి వెళ్లగానే 50 రూపాయల కౌంటర్‌ను అడ్డంగా పెట్టారు. విమర్శలు రాగానే ఇప్పుడు ఉచిత దర్శనం పెట్టారనుకోండి. కాని, ఆ క్షణం వరకు జరిగిందేమిటి? 50 రూపాయల టికెట్‌ తీసుకుంటేనే దర్శనం. కనీసం దూరం నుంచి చూసే భాగ్యం కూడా కల్పించలేదు. దీన్ని పక్కా వ్యాపారం అనక ఇంకేం అంటారు. చెప్పులు విప్పి లోపలికి వెళ్లిన తరువాత.. విధి లేని పరిస్థితుల్లో 50 రూపాయల టికెట్‌ తీసుకోవాల్సిందే ఎవరైనా. ఇంత దాకా వచ్చాక చూడకపోతే ఎలా...