జాగిలం షైనీకి పోలీస్ లాంఛనాలతో అంతిమ వీడ్కోలు.. దీని ప్రత్యేకతలేంటో తెలుసా..?

షైనీ.. ఈ పేరు ఎక్కడో విన్నట్టుంది కదూ. యస్‌.. అదే పోలీస్‌ డాగ్‌. ఉమ్మడి ఖమ్మం జిల్లా డాగ్‌స్క్వాడ్‌గా దాదాపు పదేళ్లుగా సేవలందించింది. ఎన్నో కేసుల పరిష్కారంలో కీలకంగా వ్యవహరించింది. కానీ.. ఇప్పుడు షైనీ లేదు. కొంతకాలంగా అనారోగ్యంతో బాధపడుతూ మృతి చెందింది. విశ్వాసానికి మారుపేరైనా షైనీ అంత్యక్రియలను పోలీసులు ఘనంగా నిర్వహించారు. షైనీ మృతి తీరని లోటని పోలీసులు దాని సేవలు కొనియాడారు.

భద్రాద్రి కొత్తగూడెం జిల్లా పోలీస్ డాగ్ స్క్వాడ్‌లో విధులు నిర్వర్తిస్తున్న పోలీస్ జాగిలం అనారోగ్యంతో బాధపడుతూ మరణించింది. గత నెల రోజులుగా బ్లడ్ క్యాన్సర్ వ్యాధితో బాధపడుతూ బుధవారం(సెప్టెంబర్ 11) తుది శ్వాస విడిచింది. పేలుడు పదార్థాలను కనిపెట్టడంలో నైపుణ్యత కలిగిన షైనీ మరణించడం భద్రాద్రి జిల్లాకు తీరని లోటని అడిషనల్ ఎస్పీ పంకజ్ పరితోష్ తెలిపారు. జిల్లా ఎస్పీ రోహిత్ రాజు ఆదేశాలతో జాగీలం షైనికి ఘనంగా అంతిమ వీడ్కోలు కార్యక్రమాన్ని ఏర్పాటు చేశారు.

2014 సంవత్సరంలో జన్మించిన పోలీస్ జాగిలం షైనీ 2016లో జిల్లా పోలీస్ డాగ్ స్క్వాడ్‌లో విధులలో చేరి సుమారుగా పది సంవత్సరాల పాటు తన సేవలను అందించింది. 30కి పైగా పేలుడు పదార్థాలను గుర్తించిన ఘటనలో పాల్గొని సమర్థవంతంగా విధులను నిర్వర్తించిందని పోలీసులు తెలిపారు. జిల్లాలో VIP ల పర్యటనల్లో విధులు నిర్వర్తించడం, ల్యాండ్ మైన్స్ ను గుర్తించడం వంటి సేవలను అందించింది. ఎక్కువ శాతం మావోయిస్టు ప్రభావిత ప్రాంతాల్లో తన సేవలు అందించిందని తెలిపారు.

అనంతరం షైనీ భౌతికకాయానికి పోలీసు అధికారులు పూలమాలలు వేసి నివాళులర్పించారు. ఓఎస్డి కార్యాలయంలోని డాగ్ స్క్వాడ్ నుండి అంతిమయాత్రగా బయలుదేరి జిల్లా పోలీస్ హెడ్ క్వార్టర్స్ నందు షైనీకి సాంప్రదాయబద్ధంగా అంత్యక్రియలు నిర్వహించారు.

వీడియో చూడండి..

మరిన్ని హ్యుమన్ ఇంట్రెస్ట్ వార్తల కోసం ఇక్కడ క్లిక్ చేయండి..