KCR: పొలాల బాట పట్టిన కేసీఆర్‌.. రైతులతో స్వయంగా మాట్లాడుతూ..

మాజీ ముఖ్యమంత్రి, బీఆర్‌ఎస్‌ అధినేత కేసీర్‌ పొలాల బాట పట్టారు. ఎండిపోతున్న పంటలను స్వయంగా పరిశీలించేందుకు… పొలం బాట పట్టారు బీఆర్‌ఎస్ అధ్యక్షుడు కేసీఆర్‌. నష్టం తీవ్రత ఎక్కువగా ఉన్న జనగామ,సూర్యాపేట, నల్గొండ జిల్లాల్లో పర్యటించిన ఆయన పొలం గట్ల మీద రైతులతో ముచ్చటించారు. వారి బాగోగులు అడిగి తెలుసుకున్నారు.

ఎర్రవల్లి వ్యవసాయక్షేత్రం నుంచి రోడ్డు మార్గంలో జనగామ జిల్లాకు బయల్దేరిన కేసీఆర్‌కు.. అడుగడుగునా బీఆర్‌ఎస్‌ శ్రేణులు ఘనస్వాగతం పలికాయి. బీఆర్‌ఎస్ నాయకులతో కలిసి ధరావంత్‌ తండాలో.. ఎండిపోయిన పంటలను పరిశీలించిన కేసీఆర్‌, రైతులను పరామర్శించారు. తమ గోడుకు కేసీఆర్‌ ముందు వెళ్లబోసుకున్నారు రైతులు. తమను ఆదుకోవాలని మొరపెట్టుకున్నారు.

జనగామజిల్లా నుంచి నేరుగా సూర్యాపేట జిల్లా తుంగతుర్తి నియోజకవర్గానికి వెళ్లారు కేసీఆర్‌. వెలుగుపల్లిలో ఎండిన పంటలను పరిశీలించిన కేసీఆర్ వరి పంటను పరిశీలించిన కేసీఆర్‌… రైతులతో మాట్లాడి ధైర్యం చెప్పారు. గతేడాది ఇదే సమయంలో పంటలు పచ్చగా కళకళలాడేవని గుర్తు చేశారు.

అయితే, జిల్లాల పర్యటన సందర్భంగా..కేసీఆర్‌ ప్రయాణిస్తున్న బస్సును ఒకేరోజు రెండు జిల్లాల్లో పోలీసులు తనిఖీ చేశారు. ఎన్నికల కోడ్‌ కారణంగా.. తొలుత జనగామ జిల్లాలోని మొండ్రాయి చెక్‌పోస్ట్‌ దగ్గర బస్సును అనువణువూ చెక్‌ చేశారు. ఆ తర్వాత సూర్యాపేట జిల్లా ఎర్కారంలో కేసీఆర్‌ బస్సును మరోసారి ఆపిన పోలీసులు .. తనిఖీ చేశాకే ముందుకు అనుమతించారు. అధికారుల తనిఖీలకు కేసీఆర్‌ కూడా సహకరించారు. కేసీఆర్‌ పర్యటనలో బీఆర్‌ఎస్‌ ఎమ్మెల్యేలు, మాజీ మంత్రులు… ఎంపీ అభ్యర్థులు పాల్గొన్నారు.

మరిన్ని తెలంగాణ వార్తల కోసం క్లిక్ చేయండి..