Hyderabad: ఊరెళ్తున్న కుటుంబాన్ని చిక్కుల్లో పడేసిన చైనా మాంజా.. ప్రాణాపాయ స్థితిలో చిన్నారి.. మెడకు చుట్టుకుని..
చైనా మాంజా చిన్నారుల పాలిట మృత్యుపాశంగా మారుతోంది. సంక్రాంతి వచ్చిందంటే చాలు చైనా మాంజాతో పిల్లలు, పెద్దలతోపాటు జంతువుల ప్రాణాలు ప్రమాదంలో పడుతున్నాయి. ఇలాంటి ఘటన తాజాగా హైదరాబాద్ నగరంలో చోటుచేసుకుంది.
చైనా మాంజా చిన్నారుల పాలిట మృత్యుపాశంగా మారుతోంది. సంక్రాంతి వచ్చిందంటే చాలు చైనా మాంజాతో పిల్లలు, పెద్దలతోపాటు జంతువుల ప్రాణాలు ప్రమాదంలో పడుతున్నాయి. ఇలాంటి ఘటన తాజాగా హైదరాబాద్ నగరంలో చోటుచేసుకుంది. సంక్రాంతి పండుగ వేళ ఓ కుటుంబంలో చైనా మాంజా తీవ్ర విషాదాన్ని నింపింది. ప్రస్తుతం పాప ప్రాణాపాయ స్థితిలో కొట్టుమిట్టాడుతోంది. ఈ విషాద ఘటన హైదరాబాద్‌లోని నాగోల్ ఫ్లైఓవర్‌పై శుక్రవారం చోటు చేసుకుంది. హైదరాబాద్‌లో నివాసం ఉంటున్న దంపతులు సంక్రాంతి పండుగ కోసం చిన్నారితో కలిసి బైక్‌పై సొంత గ్రామానికి వెళ్లేందుకు బయలు దేరారు. ఈ క్రమంలో నాగోల్ ఫ్లై‌ఓవర్ మీదుగా వెళ్తుండగా చైనా మాంజా నాలుగేళ్ల చిన్నారి మెడకు చుట్టుకుంది. అది గమనించే లోపే బైక్ కొంత దూరం వరకు వెళ్లింది. అప్పటికే పాప మెడ చాలా వరకు కోసుకుపోయి రక్తం ధారలా వచ్చింది. ఈ ఘటనలో నాలుగేళ్ల చిన్నారికి మెడ తీవ్రగాయాలయ్యాయి. ప్రస్తుతం పాప పరిస్థితి విషమంగా ఉన్నట్లు వైద్యులు తెలిపారు.
అయితే, చైనా మాంజా పాప మెడకు చుట్టుకోగానే.. చిన్నారి గట్టిగా అరిచింది. దీంతో తల్లిదండ్రులు బైక్ ఆపి చూడగా మెడ నుంచి రక్తం వస్తుండటంతో వెంటనే.. సమీపంలోని ఆస్పత్రికి తరలించినట్లు పేర్కొన్నారు. ఈ ఘటనకు సంబంధించి మరిన్ని వివరాలు తెలియాల్సి ఉంది.
కాగా, చైనా మంజా చాలా ప్రమాదకరమైందని, దాన్ని ఉపయోగించొద్దంటూ పోలీసులు ఇప్పటికే హెచ్చరికలు జారీ చేశారు. దాని విక్రయాలపై కూడా నిషేధం విధించారు.
అయినప్పటికీ.. కొంత మంది వ్యాపారులు చైనా మాంజాలను అమ్ముతుండటంతో ఇలాంటి ఘటనలు చోటుచేసుకుంటున్నాయి.
మరిన్ని తెలంగాణ వార్తల కోసం..
