Hyderabad: పెద్దమ్మ గుడిలో విషాదం.. కొత్త కారు పూజకు వచ్చిన వృద్ధుడినే బలిగొన్న కారు..!

హైదరాబాద్ జూబ్లీహిల్స్‌లోని పెద్దమ్మ గుడి వద్ద విషాదకర ఘటన చోటుచేసుకుంది. కొత్తగా కొనుగోలు చేసిన కారుకు పూజ చేయించేందుకు ఆలయానికి వచ్చిన 70 ఏళ్ల వృద్ధుడు అదే కారు కింద పడి మృతి చెందాడు. పూజ పూర్తయిన అనంతరం కారు ముందుకు తీసే క్రమంలో జరిగిన ప్రమాదం కుటుంబంలో తీవ్ర విషాదాన్ని నింపింది. దీంతో కేసు నమోదు చేసుకున్న పోలీసులు దర్యాప్తు చేపట్టారు.

రామచంద్రరావు అనే 70 ఏళ్ల వ్యక్తి తన కుమార్తె ఇంటికి వచ్చారు. ఆయన మేనల్లుడు కొత్తగా కారు కొనుగోలు చేయడంతో దానికి పూజ చేయించేందుకు కుటుంబ సభ్యులు, బంధువులతో కలిసి జూబ్లీహిల్స్‌లోని పెద్దమ్మ ఆలయానికి వెళ్లారు. కుటుంబ సభ్యులంతా ఆనందంగా కారు పూజ కార్యక్రమంలో పాల్గొన్నారు. పూజ పూర్తయిన తర్వాత కారును అక్కడి నుంచి ముందుకు తీసుకెళ్లేందుకు ప్రయత్నించారు. అయితే కారు కదిలించే సమయంలో ప్రమాదవశాత్తు యాక్సిలరేటర్‌పై బలంగా కాలు పడినట్లు తెలుస్తోంది. దీంతో కారు ఒక్కసారిగా ముందుకు దూసుకెళ్లింది. ఆ సమయంలో కారు సమీపంలో ఉన్న రామచంద్రరావును ఢీకొట్టింది.

కారు ఢీకొనడంతో రామచంద్రరావుకు తీవ్ర గాయాలయ్యాయి. ఊహించని ప్రమాదంతో అక్కడున్న కుటుంబ సభ్యులు, బంధువులు తీవ్ర ఆందోళనకు గురయ్యారు. వెంటనే ఆయనను చికిత్స కోసం సమీపంలోని ఆస్పత్రికి తరలించారు. వైద్యులు అత్యవసర చికిత్స అందించినప్పటికీ పరిస్థితి విషమంగా మారింది. చివరకు తెల్లవారుజామున చికిత్స పొందుతూ రామచంద్రరావు మృతి చెందారు. కొత్త కారు పూజ కోసం ఆలయానికి వచ్చిన కుటుంబంలో కాసేపటికే విషాదం నెలకొంది. ఆనందంగా ప్రారంభమైన పూజ కార్యక్రమం.. కుటుంబ సభ్యుడి మృతితో కన్నీటి విషాదంగా మారింది. రామచంద్రరావు మృతితో కుటుంబ సభ్యులు తీవ్రంగా విలపించారు.

ఈ ఘటనపై సమాచారం అందుకున్న పోలీసులు ప్రమాదానికి సంబంధించిన వివరాలను సేకరిస్తున్నారు. కారు ఎలా అదుపుతప్పింది? ప్రమాద సమయంలో డ్రైవర్ పరిస్థితి ఏమిటి? వంటి అంశాలపై దర్యాప్తు చేస్తున్నారు. ఆలయ పరిసరాల్లోని పరిస్థితులు, ప్రత్యక్ష సాక్షుల వివరాలు, అందుబాటులో ఉన్న సీసీటీవీ దృశ్యాలను పరిశీలిస్తున్నారు. ఈ ప్రమాదానికి గల పూర్తి కారణాలు పోలీసుల దర్యాప్తులో తేలాల్సి ఉంది.

మరిన్ని క్రైమ్ వార్తల కోసం ఇక్కడ క్లిక్ చేయండి..