ప్రణయ్ హత్య కేసు నిందితుడి మృతి.. అసలేం జరిగిందంటే?

హైదరాబాద్‌: చర్లపల్లి జైలులో జీవిత ఖైదు అనుభవిస్తున్న ఖైదీ మృతి చెందాడు. ప్రణయ్ హత్య కేసులో ఏ4 నిందితుడిగా ఉన్న అబ్దుల్ బారీకి అకస్మాత్తుగా గుండెపోటు వచ్చినట్లు అధికారులు చెప్తున్నారు. పరిస్థితిని గమనించిన జైలు అధికారులు వెంటనే అతడిని గాంధీ ఆసుపత్రికి తరలించారు. అయితే చికిత్స పొందుతూ అబ్దుల్ బారీ మృతి చెందినట్లు తెలుస్తోంది.

ప్రణయ్ హత్య కేసులో అబ్దుల్ బారీకి జీవిత ఖైదు శిక్ష పడింది. అప్పటి నుంచి చర్లపల్లి జైలులో శిక్ష అనుభవిస్తున్నాడు. ఇంతలో జైలు ప్రాంగణంలోనే అతడికి అకస్మాత్తుగా ఛాతిలో నొప్పి, అనారోగ్య లక్షణాలు కనిపించడంతో అధికారులు అత్యవసరంగా ఆసుపత్రికి తరలించినట్లు అధికారులు వెల్లడించారు.

అయితే అబ్దుల్ బారీకి గుండెపోటు రావడానికి దారితీసిన పరిస్థితులు ఏమిటి? జైలులో అతడి ఆరోగ్య పరిస్థితి ఎలా ఉంది? గతంలో ఏమైనా అనారోగ్య సమస్యలు ఉన్నాయా? అనే అంశాలపై కూడా అధికారులు వివరాలు సేకరిస్తున్నట్లు చెప్తున్నారు.

మరోవైపు, ఖైదీ మృతిపై జైలు అధికారులు అధికారికంగా పూర్తి వివరాలు వెల్లడించాల్సి ఉంది. మృతదేహానికి వైద్య పరీక్షలు, పోస్టుమార్టం అనంతరం మరణానికి సంబంధించిన పూర్తి కారణాలు స్పష్టమయ్యే అవకాశం ఉంది. ఘటనపై జైలు అధికారులు, పోలీసులు వివరాలు సేకరిస్తున్నారు.

ప్రణయ్ హత్య కేసులో జీవిత ఖైదు అనుభవిస్తున్న కీలక నిందితుడు జైల్లోనే మృతి చెందడం ఇప్పుడు చర్చనీయాంశంగా మారింది. అసలు ఏం జరిగింది? అబ్దుల్ బారీ ఆరోగ్య పరిస్థితి ఎలా ఉంది? అతడి మృతికి గుండెపోటే కారణమా? అనే ప్రశ్నలకు అధికారిక దర్యాప్తులో సమాధానం లభించాల్సి ఉంది.