NASA Artemis-1: ఆర్టెమిస్-1 ప్రయోగానికి మూడోసారి ముహూర్తం.. నవంబర్‌ 14న నింగిలోకి..
ప్రపంచం మొత్తం ఎంతో ఆసక్తిగా ఎదురుచూస్తోన్న ఆర్టెమిస్-1 ప్రయోగానికి మూడోసారి ముహూర్తం ఫిక్సైంది. ఇప్పటికే రెండుసార్లు వాయిదా పడిన ఆర్టెమిస్-1..
Updated on: Oct 14, 2022 | 7:59 AM
ప్రపంచం మొత్తం ఎంతో ఆసక్తిగా ఎదురుచూస్తోన్న ఆర్టెమిస్-1 ప్రయోగానికి మూడోసారి ముహూర్తం ఫిక్సైంది. ఇప్పటికే రెండుసార్లు వాయిదా పడిన ఆర్టెమిస్-1.. ముచ్చటగా మూడోసారి ప్రయోగానికి రెడీ అవుతోంది. ఈసారి ఫ్లోరిడా నుంచి కాకుండా హాంగర్‌ నుంచి నింగిలోకి పంపేందుకు ఏర్పాట్లు చేస్తోంది నాసా. చంద్రుడిపైకి మనిషిని పంపేందుకు నాసా తలపెట్టిన ఈ ప్రాజెక్ట్‌ చివరి నిమిషంలో ఆగిపోతూ వచ్చింది. ఈ ఏడాది ఆగస్ట్‌ 29న మొదటిసారి ఆర్టెమిస్-1 ప్రయోగానికి సిద్ధమైంది నాసా. ఫ్లోరిడాలోని కెనెడీ అంతరిక్ష కేంద్రం నుంచి నింగిలోకి పంపేందుకు కౌంట్‌డౌన్‌ మొదలుపెట్టింది. అయితే, రాకెట్‌ దూసుకెళ్లాల్సిన చివరి నిమిషంలో ఆయిల్‌ లీకేజీని గుర్తించి నిలిపివేసింది.
ఆ తర్వాత సెప్టెంబర్‌ 3న తిరిగి ప్రయోగానికి సిద్ధమైన నాసాకు మళ్లీ అదే సమస్య తలెత్తడంతో మరోసారి ఆగిపోయింది. ఇప్పుడు, ముచ్చటగా మూడోసారి ఆర్టెమిస్-1 ప్రయోగానికి ముహర్తం నిర్ణయించింది నాసా. నవంబర్‌ 14న ఆర్టెమిస్-1ని చంద్రుడిపైకి పంపేందుకు సిద్ధమవుతోంది. అయితే, లాంచ్‌ ప్యాడ్‌ను ఫ్లోరిడా నుంచి హాంగర్‌కు మార్చింది నాసా. ఫ్లోరిడాలో హరికేన్స్‌ బీభత్సం సృష్టిస్తుండటంతో ఆర్టెమిస్-1ను హాంగర్‌ నుంచి ప్రయోగించబోతోంది. నవంబర్‌ 4 నాటికి హాంగర్‌ లాంఛ్‌ ప్యాడ్ దగ్గరకు ఆర్టెమిస్-1ను షిఫ్ట్‌ చేయనున్నారు. నాసా అనుకున్నట్టు జరిగితే నవంబర్‌ 14న నింగిలోకి దూసుకుపోనుంది ఆర్టెమిస్-1.
మళ్లీ ఏదైనా తేడా జరిగితే మాత్రం నవంబర్‌ 16 లేదా 19న మరో ల్యాంఛ్ ప్యాడ్ నుంచి ప్రయోగం చేపట్టేందుకు బ్యాకప్‌ డేట్స్‌ని కూడా రెడీ చేసుకుంది నాసా. చంద్రుడిపై శాశ్వత నివాసాలే లక్ష్యంగా ఈ ప్రయోగం చేపడుతోంది నాసా. ఆర్టెమిస్-1ని మారవరహితంగా పంపుతోంది. ఇది సక్సెసైతే మానవ సహిత ప్రయోగాలు చేపట్టేందుకు ప్లాన్‌ చేస్తోంది నాసా. మరి, నాసా అత్యంత ప్రతిష్టాత్మకంగా చేపట్టిన ఆర్టెమిస్-1 ప్రయోగం మూడోసారైనా సవ్యంగా సాగుతుందా? లేదా? చూడాలి.
మరిన్ని సైన్స్&టెక్నాలజీ వార్తల కోసం ఈ లింక్ క్లిక్ చేయండి..
