AI వల్ల జాబ్స్‌ పోతాయా? కొత్త జాబ్స్‌ పుట్టుకొస్తాయా? కేంద్ర ప్రభుత్వ అడ్వైజర్‌ ఏం చెబుతున్నారంటే..?

ఆర్టిఫిషియల్ ఇంటెలిజెన్స్ (AI) దూకుడు చూసి ముందు ఆశ్చర్యపోయినా ఉద్యోగులు పోతాయని, ఇప్పుడున్న మ్యాన్‌పవర్‌ను ఏఐ రీప్లేస్‌ చేస్తుందని చాలా మంది భయపడ్డారు. ఇప్పటికీ ఏఐతో ముప్పు పొంచి ఉందా? లేదా కొత్త అవకాశాలకు అంది నాంది పలుకుతుందా? అనే విషయంపై క్లారిటీ లేదు. అయితే ప్రస్తుతం ఏఐ సృష్టిస్తున్న సంచలనాలు చూసి ప్రపంచం మొత్తం బిత్తరపోతుంది. భవిష్యత్తులో ఏఐని కంట్రోల్‌ చేయగలమా అనే భయం అయితే టెక్‌ నిపుణుల్లో ఉన్న మాట వాస్తవం. ఆ విషయం పక్కనపెడితే.. ఏఐ వల్ల ఉన్న జాబ్స్‌ పోతాయా? కొత్త జాబ్స్‌ క్రియేట్‌ అవుతాయా? అనే అంశంపై భారత ప్రభుత్వ అత్యున్నత శాస్త్ర సలహాదారు స్పందించారు. మరి ఆయన ఏమన్నారో ఇప్పుడు తెలుసుకునే ప్రయత్నం చేద్దాం..

AI ఇంపాక్ట్ సమ్మిట్‌కు ముందు జరిగిన ఒక ఇంటర్వ్యూలో భారత ప్రభుత్వ ప్రధాన శాస్త్రీయ సలహాదారు అజయ్ కుమార్ సూద్ మాట్లాడుతూ.. ఈ అభివృద్ధి చెందుతున్న సాంకేతిక పరిజ్ఞానంలో దేశ యువతకు శిక్షణ ఇవ్వడానికి ప్రయత్నాలు జరుగుతున్నాయని అన్నారు. టూల్స్, డేటాసెట్‌లు. సమస్య పరిష్కార వాతావరణాలకు ఆచరణాత్మకంగా బహిర్గతం చేయడానికి ప్రభుత్వం టైర్-2, టైర్-3 నగరాల్లో మరిన్ని AI, డేటా ప్రయోగశాలలను ఏర్పాటు చేస్తోందని సూద్ చెప్పారు.

ఇది ఒక కొత్త విధ్వంసక సాంకేతికత. కొత్త సాంకేతికత వచ్చినప్పుడల్లా ఉద్యోగాల పునఃసమీక్ష జరుగుతుంది. కానీ అదే సమయంలో కొత్త ఉద్యోగాలు పుట్టుకొస్తాయి అని ఆయన అన్నారు. 1990లలో కంప్యూటర్ల పరిచయంతో కూడా ఇలాంటి అనుమానాలే నెలకొన్నాయి. కానీ ఏమైంది ఐటీ రంగం కోట్లాది ఉద్యోగాలను తీసుకొచ్చిందని తెలిపారు. గత సాంకేతిక మార్పులను ప్రతిబింబిస్తూ, కంప్యూటర్ యుగం ప్రారంభంలో ఉద్యోగ నష్టాల భయాలు నిరాధారమైనవని సూద్ అన్నారు.

దేశవ్యాప్త విస్తరణ..

AI టెక్నాలజీల ప్రభావం దేశవ్యాప్తంగా విస్తరించేలా చూడటంపై ప్రభుత్వం దృష్టి సారించిందని అజయ్‌ తెలిపారు. AI ఇంపాక్ట్ సమ్మిట్ నుండి భారత్‌ ప్రాథమిక ఆశయం ఏమిటంటే.. ఉమ్మడి ప్రాధాన్యతలు, ఉమ్మడి దృష్టి ఆధారంగా AI భవిష్యత్తు దిశపై ప్రపంచ దృష్టికోణాన్ని పెంపొందించడం అని సూద్ అన్నారు. AI ఇంపాక్ట్ సమ్మిట్ అనే పేరు సూచించినట్లుగా.. ప్రజలు, ప్రధాన వాటాదారులు, సంస్థలు AI ప్రభావాన్ని ఎలా అనుభవించవచ్చో చూడాలనుకుంటున్నాం అని ఆయన అన్నారు. ఉత్పత్తి నాణ్యతను మెరుగుపరచడానికి సూక్ష్మ, చిన్న, మధ్య తరహా సంస్థలు (MSMEలు) AIని స్వీకరించాలని ఆయన గట్టిగా సమర్థించారు.

మరిన్ని టెక్‌ వార్తల కోసం ఇక్కడ క్లిక్‌ చేయండి