Google Maps: గూగుల్ మ్యాప్స్లో అదిరే ఫీచర్.. ఈ చిన్న ట్రిక్తో మస్త్ పెట్రోల్ ఆదా.. ఇలా యాక్టివేట్ చేసుకోండి..
పెట్రోల్, డీజిల్ ధరలు సెంచరీ దాటి దూసుకుపోతున్న ఈ రోజుల్లో.. బైక్ లేదా కార్ బయటకు తీయాలంటేనే జేబులు తడుముకోవాల్సి వస్తోంది. అయితే నిత్యం ఆఫీసులకు, లాంగ్ ట్రిప్లకు ప్రయాణించే వారి కోసం గూగుల్ మ్యాప్స్ ఒక అదిరిపోయే గుడ్ న్యూస్ చెప్పింది. మీ జేబుకు చిల్లు పడకుండా, వాహనం మైలేజ్ను పెంచే ఒక సూపర్ ఫీచర్ను అందుబాటులోకి తెచ్చింది.
Updated on: Jun 08, 2026 | 2:01 PM
లీటర్ పెట్రోల్, డీజిల్ ధరలు సెంచరీ దాటి నిరంతరం పెరుగుతున్న ఈ రోజుల్లో.. బైక్ లేదా కార్ బయటకు తీయాలంటేనే సామాన్యుడు జేబులు తడుముకోవాల్సిన పరిస్థితి ఏర్పడింది. అయితే రోజూ ఆఫీసులకు, లాంగ్ ట్రిప్లకు ప్రయాణించే వారికి గూగుల్ మ్యాప్స్ ఒక అద్భుతమైన గుడ్ న్యూస్ చెప్పింది. మన జేబుకు చిల్లు పడకుండా, ఇంధన ఖర్చులను భారీగా తగ్గించే ఒక సూపర్ ఫీచర్ను అందుబాటులోకి తెచ్చింది. అదే ఫ్యూయల్-ఎఫిషియంట్ రూట్స్. సాధారణంగా మనం ఎక్కడికైనా వెళ్లాలంటే తక్కువ సమయం తీసుకునే రూట్ లేదా షార్ట్కట్లను వెతుకుతాం. కానీ ఈ ఫీచర్ సమయంతో పాటు మీ వాహనానికి అతి తక్కువ ఇంధనం ఖర్చయ్యే మైలేజ్ ఫ్రెండ్లీ మార్గాన్ని పక్కాగా చూపిస్తుంది. ఆండ్రాయిడ్, ఐఫోన్ యూజర్లకు అందుబాటులో ఉన్న ఈ స్మార్ట్ ఫీచర్ అసలు ఎలా పనిచేస్తుంది? దీన్ని మొబైల్లో ఎలా యాక్టివేట్ చేసుకోవాలో ఇప్పుడు చూద్దాం.
గూగుల్ మ్యాప్స్ ఇంధన పొదుపును ఎలా లెక్కిస్తుంది?
ఈ ఫీచర్ కేవలం దూరాన్ని మాత్రమే కాకుండా.. రోడ్డుపై ఉండే ట్రాఫిక్ పరిస్థితులు, రోడ్డులోని ఎత్తుపల్లాలు, మొత్తం దూరం, వాహనం ప్రయాణించాల్సిన సగటు వేగం వంటి అనేక కీలక అంశాలను ఏఐ సాంకేతికతతో విశ్లేషిస్తుంది. భారీ ట్రాఫిక్, తరచుగా బ్రేకులు వేయాల్సిన సిగ్నల్స్ ఉన్న రోడ్లను నివారించడం ద్వారా ఇది మీ వాహనం ఇంధన వినియోగాన్ని గణనీయంగా తగ్గిస్తుంది.
మీ ఇంజన్ రకాన్ని బట్టి రూట్ మార్పు..
గూగుల్ మ్యాప్స్ ప్రకారం.. ఇంజన్ రకాన్ని బట్టి ఇంధనం ఆదా అయ్యే పద్ధతులు మారుతుంటాయి. ఉదాహరణకు
డీజిల్ కార్లు: హైవేలపై ప్రయాణించినప్పుడు మెరుగైన మైలేజీని ఇస్తాయి.
హైబ్రిడ్ – ఎలక్ట్రిక్ వాహనాలు: సిటీ ట్రాఫిక్లో ఎక్కువ సమర్థవంతంగా పనిచేస్తాయి.
ఒకవేళ మీరు మీ వాహన రకాన్ని యాప్లో ఎంచుకోకపోతే.. గూగుల్ మ్యాప్స్ డిఫాల్ట్గా పెట్రోల్ వాహనాన్ని బేస్ చేసుకుని మార్గాలను సూచిస్తుంది. కాబట్టి మీ ఇంజన్ రకాన్ని ఖచ్చితంగా సెట్ చేసుకోవడం చాలా ముఖ్యం.
1 నిమిషంలో యాక్టివేట్ చేసుకోండిలా
- ఈ ఫీచర్ను మీ ఫోన్లో ఆన్ చేసుకోవడానికి ఒక్క నిమిషం కూడా పట్టదు..
- మొదట మీ మొబైల్లో Google Maps యాప్ తెరవండి.
- పైన కుడివైపున ఉన్న మీ ప్రొఫైల్ ఫోటోపై ట్యాప్ చేయండి.
- అక్కడ కింద ఉన్న సెట్టింగ్స్ ఆప్షన్కు వెళ్లండి.
- ఆ తర్వాత నావిగేషన్పై క్లిక్ చేయండి.
- కొద్దిగా కిందకు స్క్రోల్ చేస్తే రూట్ ఆప్షన్స్ కనిపిస్తాయి.
- అందులో Prefer fuel-efficient routes అనే ఆప్షన్ను ఆన్ చేయండి.
- ఆ వెంటనే కింద ఉండే ఇంజన్ టైప్ పై క్లిక్ చేసి.. పెట్రోల్, డీజిల్, హైబ్రిడ్ లేదా ఎలక్ట్రిక్లలో మీ వాహన రకాన్ని ఎంచుకోండి.
పెట్రోల్, డీజిల్, డబ్బు ఆదా కావడం అనేది పూర్తిగా మీ డ్రైవింగ్ శైలి, ప్రయాణ మార్గంపై ఆధారపడి ఉంటుంది. మరింకెందుకు ఆలస్యం, వెంటనే మీ గూగుల్ మ్యాప్స్లో ఈ చిన్న సెట్టింగ్ మార్చుకుని పెట్రోల్ బిల్లు తగ్గించుకోండి.
