చెరువుపై పడ్డ ఊరు.. మొత్తం ఊడ్చేశారుగా

చెరువు లూటీ. ఔను మీరు విన్నది నిజమే. చెరువునే లూటీ చేశారు. లూటీ అంటే నీళ్లను దోచుకోవడం కాదు. చెరువులోని చేపలను దోచుకోవడం. ఊరు ఊరంతా చెరువుపై పడటంతో ఆ ప్రాంతం కాస్తా జాతరను తలపించింది. మహబూబాబాద్ జిల్లా సీరోల్ మండలం గోపాతండా శివారులోని ‘బంధంకుంట’ చెరువు శనివారం ఈ విచిత్ర ఘట్టానికి వేదికైంది. సోమవారం మృగశిర కార్తె కావడంతో.. ఎలాగైనా ఈ పండగకు చేపల కూర వండుకోవాలనే ఆత్రుతతో వందలాది మంది గ్రామస్తులు ఒక్కసారిగా చెరువులోకి దిగిపోయారు. వలలు ఉన్నవారు వలలతో, లేనివారు చీరలు, లుంగీలతో దొరికిన కాడికి చేపలను పట్టుకుని పండగకు రెడీ అయిపోయారు. గ్రామస్తులంతా చేపలు దొరికాయనే ఆనందంలో ఉంటే, స్థానిక మత్స్యకారులు మాత్రం లబోదిబోమంటున్నారు. ఉప్పరగూడెం గ్రామానికి చెందిన మత్స్యకారులు ఈ బంధంకుంట చెరువును ప్రభుత్వం నుంచి లీజుకు తీసుకున్నారు. అప్పులు తెచ్చి మరీ చేప పిల్లలను వేసి పెంచారు. తీరా చేతికొచ్చే సమయానికి గ్రామస్తులు సామూహికంగా వచ్చి చేపలన్నింటినీ పట్టుకుపోవడంతో తాము రోడ్డున పడ్డామని ఆవేదన వ్యక్తం చేస్తున్నారు. ఈ లూటీ కారణంగా తమకు దాదాపు లక్షన్నర రూపాయల మేర నష్టం వాటిల్లిందని, కళ్లెదుటే తమ శ్రమ దోపిడీకి గురైందని మత్స్యకారులు కన్నీరుమున్నీరవుతున్నారు. మృగశిర ఉత్సాహం ఒకరిదైతే.. ఆ ఉత్సాహం మరొకరి జీవితాల్లో విషాదం నింపినట్లయింది.

మరిన్ని వీడియోల కోసం ఇక్కడ క్లిక్ చేయండి

Also Watch:

‘అణు చెత్త’ను తొలిసారిగా సమాధి చేస్తున్న ఫిన్లాండ్‌

కిటికీలు, అద్దాలతో పవర్ ప్రొడక్షన్.. ఈ టెక్నాలజీ వస్తే.. అందరికీ జీరో బిల్లులే

23 ఏళ్ల పోరాటం.. రూ.85 కోట్ల భరణం విడాకుల కేసులో ట్విస్ట్‌

బైక్‌ ట్యాక్సీ రైడర్‌గా.. ఓటమి భయం నుంచి బయటపడ్డాడు!

రూ.40 లక్షల జీతం.. బీఎండబ్ల్యూ కారు.. అయినా పేదవాడిగా ఫీలవుతున్నా!