టోక్యో ఒలింపిక్స్ రేసులో ఉన్నా.. ఆట మానేదే లేదు.. స్పష్టం చేసిన స్టార్ షట్లర్ సైనా నెహ్వాల్
వచ్చే ఏడాది జరగబోయే టోక్యో ఒలింపిక్స్ రేసులో తాను ఉన్నట్లు స్టార్ షట్లర్ సైనా నెహ్వాల్ తెలిపారు. కానీ అంతకంటే ముందు పలు టోర్నమెంట్‌లు కూడా గెలవాలని ఆమె అన్నారు.
Saina Nehwal Olympics: వచ్చే ఏడాది జరగబోయే టోక్యో ఒలింపిక్స్ రేసులో తాను ఉన్నట్లు స్టార్ షట్లర్ సైనా నెహ్వాల్ తెలిపారు. కానీ అంతకంటే ముందు పలు టోర్నమెంట్‌లు కూడా గెలవాలని ఆమె అన్నారు.
అందరూ ఒలింపిక్స్ గురించే ఆలోచిస్తారని తెలుసు. ఎందుకంటే అది చాలా పెద్ద ఈవెంట్‌. కానీ అంతకంటే ముందు చాలా టోర్నమెంట్‌ల గురించి కూడా ఆలోచించాలి. టాప్‌ 20లో ఉన్న ఆటగాళ్లను ఓడించి, నేను మళ్లీ నా సత్తా చాటుకోవాలి. ముందు ఏడు-ఎనిమిది టోర్నమెంట్‌లలో నేను ఆడాలి. ఆ తరువాతే ఒలింపిక్స్ గురించి ఆలోచిస్తా. కానీ కచ్చితంగా నేను ఒలింపిక్స్ రేసులో ఉన్నా. అందుకోసం నేను మరింత కష్టపడాల్సి ఉంటుంది అని సైనా చెప్పుకొచ్చారు.
జకోవిచ్‌, ఫెదరర్‌, నాదల్‌, సెరెనా వంటి గొప్ప ఆటగాళ్లు వయస్సు పెరిగే కొద్ది బాగా ఆడారు. నేను వారిని ఉదాహరణలుగా తీసుకున్నా. వారు సాధించినప్పుడు, నేను ఎందుకు సాధించలేను. చాలా సార్లు నేను ఆడలేనేమో అనుకున్నా. కానీ నన్ను నేను ప్రోత్సహించుకొని ముందుకు సాగా. నాకు ఫైట్ చేయడం ఇష్టం. ఇంట్లో కూర్చొని నేను ఏం చేయలేను. ఇదే నా జీవితం, ఇదే నా ఉద్యోగం అని సైనా తెలిపారు. మళ్లీ నంబర్ 1 అయ్యేందుకు తాను కష్టపడతానని ఈ షట్లర్ వివరించారు.
