పాక్ సెమీస్ భవితవ్యం.. ‘టాస్‌’ చేతిలో

క్రికెట్ వరల్డ్‌కప్‌ సెమీ ఫైనల్‌కు చేరకుంది. ఈ క్రమంలో ఆస్ట్రేలియా, భారత్, ఇంగ్లండ్ దేశాలు సెమీస్‌కు బెర్త్‌ను కన్ఫర్మ్ చేసుకోగా.. నాలుగో స్థానం కోసం న్యూజిలాండ్, పాకిస్తాన్ జట్టు పోటీ పడుతున్నాయి. అయితే రన్‌రేట్‌లో పాక్ కంటే మెరుగ్గా ఉన్న న్యూజిలాండ్‌కే నాలుగో స్థానం కన్ఫర్మ్ అని అందరూ భావిస్తున్నప్పటికీ.. బంగ్లాదేశ్‌పై గెలిచి ఎలాగైనా ఈ సెమీస్‌లోకి ఎంట్రీ ఇవ్వాలని పాక్ అనుకుంటోంది. ఈ నేపథ్యంలో పాకిస్తాన్ ముందు భారీ లక్ష్యంతో పాటు సవాళ్లు కూడా ఉన్నాయి. ఇంకా చెప్పాలంటే శుక్రవారం నాటి మ్యాచ్‌లో పాక్ భవితవ్యం టాస్ నుంచే మొదలవుతుంది.

రేపటి మ్యాచ్‌లో టాస్ గెలిచి మొదటి బ్యాటింగ్ చేస్తేనే పాక్‌కు కాస్త ఊరటగా ఉంటుంది. అలాకాకుండా ఒకవేళ బంగ్లాదేశ్ టాస్ గెలిచి బ్యాటింగ్ ఎంచుకుంటే మాత్రం పాక్ సెమీస్ ఆశలు గల్లంతయినట్లే. ఇదంతా కాకుండా టాస్ గెలిచి బ్యాటింగ్ చేపట్టినా.. పాక్ ముందు భారీ లక్ష్యం ఉంది. మ్యాచ్‌ గెలిస్తే పాక్‌కు 2 పాయింట్లు వచ్చి న్యూజిలాండ్‌తో సమానంగా ఉన్నప్పటికీ.. రన్‌రేట్ విషయంలో ఆ దేశం ముందు 316పరుగుల లక్ష్యం ఉంది. ఉదాహరణకు పాకిస్తాన్ 450పరుగులు చేసి, 129 పరుగులకే బంగ్లా ఓడించాలి. లేదంటే 400 పరుగులు చేసి, 316పరుగుల తేడాతో.. 350 పరుగులు చేసి 312 పరుగుల తేడాతో బంగ్లాదేశ్‌ను ఓడించాల్సి వస్తుంది. అంటే క్రికెట్ చరిత్రలో కనీవినీ ఎరుగని రీతిలో పాక్ విజయం సాధించాలి. మరి పాక్ భవితవ్యం ఎలా ఉందో తెలుసుకోవాలంటే ఒక్క రోజు ఆగాల్సిందే.