Yash Dhull: రంజీల్లో దుమ్మురేపుతున్న యశ్ధుల్.. ఫామ్లోకి వచ్చిన రహానె, పుజారా..
భారత అండర్-19 వరల్డ్కప్ కెప్టెన్గా అదరగొట్టి, జట్టును ఛాంపియన్గా నిలబెట్టిన యశ్ధుల్.. రంజీల్లో కూడా దుమ్మురేపుతున్నాడు...
Updated on: Feb 21, 2022 | 8:15 AM
భారత అండర్-19 వరల్డ్కప్ కెప్టెన్గా అదరగొట్టి, జట్టును ఛాంపియన్గా నిలబెట్టిన యశ్ధుల్.. రంజీల్లో కూడా దుమ్మురేపుతున్నాడు. తొలి మ్యాచ్లోనే రెండు సెంచరీలు బాదాడు. తొలి ఇన్నింగ్స్లో శతకం నమోదు చేసిన ధూల్.. రెండో ఇన్నింగ్స్లో కూడా మరో సెంచరీ కొట్టి అందరినీ ఆశ్చర్యపరిచాడు. రంజీల్లో అరంగేట్రం మ్యాచ్లోనే రెండు ఇన్నింగ్స్లో రెండు శతకాలు బాదిన మూడో ఆటగాడిగా నిలిచాడు. అంతకుముందు ఈ ఘనత నారీ కాంట్రాక్టర్, విరాగ్ అవతేల పేరిట ఉంది.
దిల్లీకి ఆడుతున్న ధుల్.. తమిళనాడుతో మ్యాచ్లోని రెండో ఇన్నింగ్స్లో 200 బంతుల్లో 100 పరుగులు చేశాడు. ఇందులో 13 బౌండరీలు ఉన్నాయి. అంతకుముందు తొలి ఇన్నింగ్స్లో 113 పరుగులు చేశాడు. టీమ్ఇండియా టెస్టు జట్టులో స్థానం కోల్పోయి బీసీసీఐ వేటుకు గురైన రహానె-పుజారా ద్వయం మళ్లీ రంజీ మ్యాచ్లతో ఫామ్ అందుకుంది.
సౌరాష్ట్రతో మ్యాచ్లో సెంచరీ బాదిన రహానె ఫామ్లోకి వచ్చాడు. మరోవైపు పుజారా.. తొలిఇన్నింగ్స్లో డకౌట్ అయినా రెండో ఇన్నింగ్స్ నిలకడగా ఆడి 83 బంతుల్లో 91 పరుగులు చేశాడు. ఇందులో 16 ఫోర్లు, ఓ సిక్సర్ ఉన్నాయి. ఈసారి రంజీ ట్రోఫీని రెండు విడతలుగా నిర్వహించనున్నారు. ఫిబ్రవరి 10న ప్రారంభమైన ఈ టోర్నీ తొలి దశ మార్చి 15 వరకు కొనసాగుతుంది. ఐపీఎల్ పూర్తయ్యాక మే 30 నుంచి జూన్ 26 వరకు రెండో దశ టోర్నీ జరుగుతుంది.
