Video: 6,6,6,6,6,6,6,4.. 13 బంతుల్లో హాఫ్ సెంచరీ.. చెన్నై చిన్నోడి బీభత్సం చూశారా?

Urvil Patel Fastest Fifty: చెన్నైలోని చెపాక్ వేదికగా జరిగిన ఈ పోరులో మొదట బ్యాటింగ్ చేసిన లక్నో 202 పరుగుల భారీ స్కోరు సాధించింది. లక్ష్య ఛేదనలో సంజూ శాంసన్ వికెట్ పడిన తర్వాత క్రీజులోకి వచ్చిన ఉర్విల్ పటేల్, మొదటి బంతి నుంచే విరుచుకుపడ్డాడు. పవర్ ప్లే ముగిసేసరికి చెన్నై స్కోరును ఒక వికెట్ నష్టానికి 97 పరుగులకు చేర్చాడు. 384.62 స్ట్రైక్ రేట్‌తో బ్యాటింగ్ చేసిన ఉర్విల్ పటేల్, లక్నో బౌలర్ల ఆత్మవిశ్వాసాన్ని పూర్తిగా దెబ్బతీశాడు. ఈ ఇన్నింగ్స్‌లో అతను ఏకంగా 7 భారీ సిక్సర్లు, ఒక ఫోర్ బాదాడు.

జైస్వాల్ రికార్డు సమం.. డివిలియర్స్ అధిగమనం..

ఈ అద్భుత ఇన్నింగ్స్‌తో ఉర్విల్ పటేల్ పలు చారిత్రక రికార్డులను తన పేరిట లిఖించుకున్నాడు. గతంలో యశస్వి జైస్వాల్ 13 బంతుల్లో సాధించిన వేగవంతమైన అర్థశతక రికార్డును ఉర్విల్ పటేల్ ఇప్పుడు సమం చేశాడు. అంతేకాకుండా, కేవలం 10 బంతుల్లోనే 42 పరుగులు సాధించడం ద్వారా, 2015లో ముంబైపై ఏబీ డివిలియర్స్ నెలకొల్పిన 41 పరుగుల రికార్డును కూడా తుడిచిపెట్టేశాడు. మైదానంలో అతను సిక్సర్లు బాదుతుంటే లక్నో ఫీల్డర్లు ప్రేక్షకులుగా మిగిలిపోయారు.

తండ్రికి అంకితం.. భావోద్వేగ వేడుక..

🚨 Urvil Patel has now matched Yashasvi Jaiswal’s record for the fastest fifty in IPL history, 50 off just 13 balls 🥶

Absolute carnage from Urvil tonight 💛#IPL2026 #UrvilPatel #CSKvsLSG #Iplpic.twitter.com/h1ewsKqmk7

— Shehzade (@Shehzade_18) May 10, 2026

తన అర్థశతకం పూర్తయిన వెంటనే ఉర్విల్ పటేల్ తన జేబులో నుంచి ఒక చిన్న కాగితాన్ని తీసి ప్రేక్షకులకు చూపించాడు. ఆ చిట్టీపై “ఇది మీ కోసమే నాన్న” (This is for you Papa) అని రాసి ఉంది. ఈ భావోద్వేగ క్షణం మైదానంలోని అభిమానులను ఎంతగానో ఆకట్టుకుంది. తన తండ్రికి ఈ చారిత్రక ఇన్నింగ్స్‌ను అంకితం ఇస్తూ అతను జరుపుకున్న వేడుక సామాజిక మాధ్యమాల్లో వైరల్‌గా మారింది.

ఓవర్‌కు మూడు సిక్సర్లు.. బౌలర్ల బేజారు..

ఐదవ ఓవర్ వేసిన ఆవేశ్ ఖాన్ బౌలింగ్‌లో వరుసగా మూడు సిక్సర్లు బాది ఉర్విల్ పటేల్ తన ప్రతాపాన్ని మొదలుపెట్టాడు. ఆ తర్వాతి ఓవర్లో దిగ్వేష్ రాఠీని కూడా వదలకుండా రెండు సిక్సర్లు, ఒక ఫోర్ బాదాడు. మొహమ్మద్ షమీ వేసిన ఏడవ ఓవర్ రెండో బంతికి సిక్సర్ బాది తన అర్థశతకాన్ని పూర్తి చేశాడు. అతని మెరుపు దాడితో మ్యాచ్ పూర్తిగా చెన్నై వైపు మొగ్గింది. యువ ఆటగాడైన ఉర్విల్ పటేల్ చూపిన ఈ తెగువ చెన్నై జట్టుకు ప్లేఆఫ్స్ దిశగా కొండంత బలాన్ని ఇచ్చింది. లక్నో జట్టు ఎంత ప్రయత్నించినా ఉర్విల్ పటేల్ విధ్వంసం ముందు తలవంచక తప్పలేదు.