IND vs ENG: ఇంగ్లండ్ గడ్డపై సిరీస్ గెలవాలంటే.. ఆ రెండు పక్కా ఉండాల్సిందే..: సౌరవ్ గంగూలీ కీలక వ్యాఖ్యలు

India vs England: భారత్, ఇంగ్లాండ్‌ల మధ్య జూన్ 20 నుంచి ప్రారంభం కానున్న ఐదు టెస్టుల సిరీస్‌పై క్రికెట్ అభిమానుల్లో ఆసక్తి నెలకొంది. ఈ సిరీస్ కొత్త ప్రపంచ టెస్ట్ ఛాంపియన్‌షిప్ (WTC) సైకిల్‌కు నాంది పలకనుంది. ఈ నేపథ్యంలో టీమిండియా మాజీ కెప్టెన్, భారత క్రికెట్ దిగ్గజం సౌరవ్ గంగూలీ భారత్ గెలుపు అవకాశాలపై తన అభిప్రాయాలను పంచుకున్నారు. ప్రధానంగా రెండు అంశాలు భారత్ విజయంలో కీలక పాత్ర పోషిస్తాయని దాదా నొక్కి చెప్పారు, బ్యాటింగ్ ప్రదర్శనతోపాటు జస్ప్రీత్ బుమ్రా ఫిట్‌నెస్ కూడా కీలకమని తెలిపారు.

“ఇంగ్లాండ్ ఫేవరెట్‌గా కనిపిస్తున్నా..”

“ఇంగ్లాండ్ ఈ సిరీస్‌లో ఫేవరెట్‌గా కనిపిస్తున్నప్పటికీ, నాకు ఫేవరెట్‌గా అనిపించదు,” అని గంగూలీ రెవ్‌స్పోర్జ్‌తో మాట్లాడుతూ అన్నారు. “భారత బ్యాట్స్‌మెన్ బాగా రాణిస్తే, వారికి గెలిచే అవకాశం ఉంది. మేం యువ బ్యాటింగ్ లైనప్‌తో కోహ్లీ, రోహిత్ శర్మ లేకుండానే ఆస్ట్రేలియాలో (2020-21) గెలిచాం. కాబట్టి, ఇక్కడ ఎందుకు గెలవలేమని నాకు అనిపించడం లేదు” అని ఆయన ఆశాభావం వ్యక్తం చేశారు. విరాట్ కోహ్లీ, రోహిత్ శర్మలు టెస్ట్ ఫార్మాట్ నుంచి రిటైర్ అయిన నేపథ్యంలో, శుభ్‌మన్ గిల్ సారథ్యంలో భారత్ ఈ సిరీస్ ఆడనుంది.

బుమ్రా ఫిట్‌నెస్, వినియోగం: కీలక పాత్ర..

గంగూలీ మాటల్లో బుమ్రా ఫిట్‌నెస్‌కు ఎంత ప్రాధాన్యత ఇస్తున్నారో స్పష్టమవుతుంది. “ఐదు టెస్టుల సిరీస్‌కు బుమ్రా ఫిట్‌గా ఉండాలని ఆశిస్తున్నాను. ఒకవేళ అతనికి రెండో టెస్ట్ తర్వాత విరామం ఇచ్చి, నాల్గవ, ఐదవ టెస్ట్‌లకు తిరిగి తీసుకువచ్చినా పర్వాలేదు. ఎందుకంటే ఫిట్‌గా ఉన్న బుమ్రా చాలా ముఖ్యం,” అని గంగూలీ పేర్కొన్నారు.

అంతేకాకుండా, యువ కెప్టెన్ శుభ్‌మన్ గిల్‌కు బుమ్రాను ఎలా ఉపయోగించుకోవాలో కూడా గంగూలీ సూచించారు. “గిల్ బుమ్రాను వికెట్ తీసే బౌలర్‌గా ఉపయోగించుకోవాలి, చిన్న స్పెల్‌లలో బౌలింగ్ చేయించాలి, తద్వారా అతను ఐదు టెస్టులకు ఫిట్‌గా ఉంటాడు. అతన్ని ఎక్కువగా బౌలింగ్ చేయించకూడదు, రోజుకు 12-13 ఓవర్లకు మించకుండా చూసుకోవాలి.” అని గంగూలీ సలహా ఇచ్చారు. సిరాజ్, అర్ష్‌దీప్ వంటి ఇతర ఫాస్ట్ బౌలర్లు కూడా కీలక పాత్ర పోషించాలని గంగూలీ అభిప్రాయపడ్డారు. మ్యాచ్‌లు గెలవడానికి 20 వికెట్లు తీయడం అవసరమని, అందుకు నలుగురు ఫాస్ట్ బౌలర్లు ముఖ్యమని ఆయన అన్నారు.

శ్రేయాస్ అయ్యర్ లేకపోవడంపై గంగూలీ అసంతృప్తి..

శ్రేయాస్ అయ్యర్‌ను ఇంగ్లాండ్ సిరీస్‌కు ఎంపిక చేయకపోవడంపై గంగూలీ అసంతృప్తి వ్యక్తం చేశారు. గత ఏడాది కాలంగా అయ్యర్ అద్భుతంగా రాణిస్తున్నాడని, ముఖ్యంగా షార్ట్ బాల్స్‌ను సమర్థవంతంగా ఎదుర్కొంటున్నాడని గంగూలీ కితాబిచ్చారు. విరాట్ కోహ్లీ లేని లోటును శ్రేయాస్ అయ్యర్ మాత్రమే తీర్చగలడని ఆయన అభిప్రాయపడ్డారు.

శుభ్‌మన్ గిల్‌పై అంచనాలు..

శుభ్‌మన్ గిల్ టెస్ట్ కెప్టెన్‌గా తన తొలి అసైన్‌మెంట్‌ను ఇంగ్లాండ్ గడ్డపై ఎదుర్కోనున్నాడు. గంగూలీ ప్రకారం, గిల్ బ్యాటర్‌గా మరింత మెరుగుపడాలి. “సీమ్, స్వింగ్ అయ్యే ఈ పరిస్థితుల్లో అతను మరిన్ని పరుగులు చేయాలి. కొత్త బంతితో ఆడటం కష్టం. 100 పరుగులకు 2 వికెట్లు కోల్పోవడం, 20 పరుగులకు 4 వికెట్లు కోల్పోవడం వేరు. కాబట్టి, అతను తన డిఫెన్స్‌ను సరిదిద్దుకోవాలి, ఆఫ్ స్టంప్‌కు వెలుపల బంతులను వదిలేయడం నేర్చుకోవాలి,” అని గంగూలీ సూచించారు. గిల్ ఈ సిరీస్‌లో రాణిస్తే, అతడు భారత టెస్ట్ క్రికెట్‌లో హీరోగా నిలుస్తాడని గంగూలీ ధీమా వ్యక్తం చేశారు.

మొత్తంగా, భారత్ ఈ సిరీస్‌లో గెలవాలంటే బ్యాటింగ్, ముఖ్యంగా యువ బ్యాట్స్‌మెన్ రాణించడం, జస్ప్రీత్ బుమ్రా ఫిట్‌గా ఉండి తన అత్యుత్తమ బౌలింగ్‌ను అందించడం చాలా కీలకమని సౌరవ్ గంగూలీ విశ్లేషించారు.