MI vs RCB: ముంబై ఇండియన్స్కు బిగ్ రిలీఫ్.. బెంగళూరుతో పోరుకు స్టార్ ఆల్ రౌండర్ రెడీ..!
ఐపీఎల్ 2026 సీజన్లో వరుస ఓటములతో సతమతమవుతున్న ముంబై ఇండియన్స్కు ఎట్టకేలకు ఒక శుభవార్త అందింది. రాయల్ ఛాలెంజర్స్ బెంగళూరుతో జరగనున్న కీలక పోరుకు ముందు ఆ జట్టు స్టార్ ఆల్ రౌండర్ జట్టులోకి చేరనున్నారు. పాయింట్ల పట్టికలో వెనుకబడిన హార్దిక్ పాండ్యా సేనకు ఈ పరిణామం కొండంత బలాన్ని ఇస్తుందని విశ్లేషకులు భావిస్తున్నారు. అభిమానులు కూడా ఈ మార్పు కోసం ఆసక్తిగా ఎదురుచూస్తున్నారు.
Updated on: Apr 10, 2026 | 9:55 PM
MI vs RCB: న్యూజిలాండ్ అనుభవజ్ఞుడైన స్పిన్ ఆల్ రౌండర్ మిచెల్ సాంట్నర్ పూర్తి ఫిట్నెస్ సాధించాడు. గాయం కారణంగా ఈ సీజన్ ఆరంభ మ్యాచ్లకు దూరమైన ఆయన, ఇప్పుడు బెంగళూరుతో జరిగే 20వ మ్యాచ్లో బరిలోకి దిగడానికి సిద్ధంగా ఉన్నట్లు సమాచారం. శుక్రవారం ముంబైలోని వాంఖడే స్టేడియంలో జరిగిన శిక్షణలో ఆయన సుమారు 45 నిమిషాల పాటు బౌలింగ్ ప్రాక్టీస్ చేశాడు. కేవలం బౌలింగ్ మాత్రమే కాకుండా ఫీల్డింగ్లోనూ చురుగ్గా పాల్గొని తన ఫిట్నెస్ను నిరూపించుకున్నాడు. వరుసగా రెండు మ్యాచ్ల్లో ఓడిపోయిన ముంబై జట్టుకు సాంట్నర్ రాక నైతిక బలాన్ని ఇవ్వడమే కాకుండా, స్పిన్ విభాగంలో పట్టునిస్తుందని యాజమాన్యం ఆశిస్తోంది.
విల్ జాక్స్ రాకపై సందిగ్ధత..
ఒకవైపు సాంట్నర్ అందుబాటులోకి వచ్చినా, ఇంగ్లాండ్ బ్యాటింగ్ ఆల్ రౌండర్ విల్ జాక్స్ ఇంకా జట్టుతో కలవలేదు. వ్యక్తిగత కారణాల వల్ల ఆయన మరికొంత కాలం విరామం కోరినట్లు ప్రధాన కోచ్ గతంలోనే ప్రకటించాడు. ఆయన ఎప్పుడు భారత్కు వస్తారనే దానిపై ప్రస్తుతం స్పష్టత లేదు. దీనివల్ల ముంబై మిడిల్ ఆర్డర్లో భారీ హిట్టర్ కొరత కనిపిస్తోంది.
బెంగళూరుతో పోరు.. తప్పక గెలవాల్సిన మ్యాచ్..
హార్దిక్ పాండ్యా నేతృత్వంలోని ముంబై ఇండియన్స్ ఆదివారం సాయంత్రం తమ సొంత మైదానంలో డిఫెండింగ్ ఛాంపియన్స్ బెంగళూరును ఎదుర్కోనుంది. పాయింట్ల పట్టికలో ఎనిమిదవ స్థానంలో ఉన్న ముంబైకి ఇది అత్యంత కీలకమైన మ్యాచ్. కోల్కతాతో జరిగిన మొదటి మ్యాచ్లో ఘనవిజయం సాధించినా, ఆ తర్వాత ఢిల్లీ, రాజస్థాన్ చేతుల్లో ఘోర పరాజయాలను చవిచూసింది. ప్లేఆఫ్స్ రేసులో నిలవాలంటే ఈ మ్యాచ్లో విజయం సాధించడం ముంబైకి అనివార్యం. వాంఖడే పిచ్ స్పిన్నర్లకు, బ్యాటర్లకు అనుకూలించే అవకాశం ఉన్నందున, సాంట్నర్ పాత్ర ఇక్కడ కీలకం కానుంది.
మరిన్ని క్రీడా వార్తల కోసం ఇక్కడ క్లిక్ చేయండి..
