IPL 2026 Points Table Update : హమ్మయ్య.. పాయింట్ల పట్టికలో కాస్త పైకి ఎక్కిన షారూఖ్ టీం.. ముంబై పరిస్థితి మాత్రం దారుణం

IPL 2026 Points Table Update : ప్రస్తుతం ఐపీఎల్ 2026 సీజన్ రసవత్తరంగా కొనసాగుతోంది. లీగ్ మొదటి సగం ముగిసే సమయానికి పాయింట్ల పట్టికలో అనూహ్యమైన మార్పులు చోటు చేసుకుంటున్నాయి. ముఖ్యంగా కోల్‌కతా నైట్ రైడర్స్ (KKR) ఎట్టకేలకు పాయింట్ల పట్టికలో అట్టడుగు నుంచి కాస్త పైకి లేచింది. గత కొన్ని వారాలుగా టేబుల్ చివరకే పరిమితం అయిన కోల్‌కతా, లక్నోపై సాధించిన ఉత్కంఠ విజయంతో రెండు పాయింట్లు తెచ్చుకుని పైకి ఎగబాకింది. అదే సమయంలో లక్నో సూపర్ జెయింట్స్ (LSG) పరిస్థితి అగమ్యగోచరంగా మారింది. ఈ సీజన్‌లో కేకేఆర్ పుంజుకోవడం, లక్నో పతనం కావడం పాయింట్ల పట్టిక ఈక్వేషన్లను పూర్తిగా మార్చేసింది.

కోల్‌కతా నైట్ రైడర్స్ అభిమానులు ఎంతో కాలంగా ఎదురుచూస్తున్న మార్పు ఇది. ఈ సీజన్ మొదలైనప్పటి నుంచి పాయింట్ల పట్టికలో 10వ స్థానానికే పరిమితమైన కేకేఆర్, లక్నోపై సూపర్ ఓవర్‌లో సాధించిన అద్భుత విజయంతో 8వ స్థానానికి చేరుకుంది. ప్రస్తుతం కోల్‌కతా ఆడిన 8 మ్యాచ్‌ల్లో రెండు విజయాలు, ఒక ఫలితం తేలని మ్యాచ్‌తో కలిపి 5 పాయింట్లను తన ఖాతాలో వేసుకుంది. రింకూ సింగ్ ఫామ్‌లోకి రావడం, సునీల్ నరైన్ మళ్ళీ మ్యాజిక్ చేస్తుండటంతో కేకేఆర్ క్యాంప్‌లో ఉత్సాహం నెలకొంది.

మరోవైపు లక్నో సూపర్ జెయింట్స్ పరిస్థితి ఇప్పుడు అత్యంత దారుణంగా తయారైంది. ఈ సీజన్‌లో ఇప్పటివరకు ఆడిన 8 మ్యాచ్‌ల్లో ఏకంగా 6 మ్యాచ్‌ల్లో ఓటమి పాలైంది. ముఖ్యంగా తన సొంత గడ్డపై ఆడిన ఏ ఒక్క మ్యాచ్‌లోనూ లక్నో గెలవకపోవడం అభిమానులను తీవ్ర నిరాశకు గురిచేస్తోంది. నెట్ రన్ రేట్ (-1.10) కూడా చాలా తక్కువగా ఉండటంతో లక్నో ఇప్పుడు 10వ స్థానానికి పడిపోయింది. ఇక్కడి నుంచి లక్నో ప్లేఆఫ్స్ చేరాలంటే మిగిలిన అన్ని మ్యాచ్‌ల్లో గెలవడంతో పాటు ఇతర జట్ల ఫలితాలపై ఆధారపడాల్సి ఉంటుంది.

పాయింట్ల పట్టికలో అగ్రస్థానం కోసం తీవ్రమైన పోటీ నెలకొంది. పంజాబ్ కింగ్స్ ఏడు మ్యాచ్‌ల్లో ఆరు విజయాలతో, 13 పాయింట్లు సాధించి నెంబర్ వన్ స్థానంలో దర్జాగా కూర్చుంది. ఒక్క మ్యాచ్ కూడా ఓడిపోని ఏకైక జట్టుగా పంజాబ్ రికార్డు క్రియేట్ చేస్తోంది. ఇక రాయల్ ఛాలెంజర్స్ బెంగళూరు (RCB) కూడా తన జోరును కొనసాగిస్తోంది. 7 మ్యాచ్‌ల్లో 5 విజయాలతో 10 పాయింట్లు సాధించి రెండో స్థానంలో నిలిచింది. సన్‌రైజర్స్ హైదరాబాద్ (SRH), రాజస్థాన్ రాయల్స్ (RR) కూడా 10 పాయింట్లతో ఉన్నప్పటికీ, నెట్ రన్ రేట్ విషయంలో బెంగళూరు మెరుగ్గా ఉంది.

గుజరాత్ టైటాన్స్ 8 మ్యాచ్‌ల్లో 4 విజయాలతో 5వ స్థానంలో ఉండగా, చెన్నై సూపర్ కింగ్స్ (CSK) 6వ స్థానంలో ఉంది. ఢిల్లీ క్యాపిటల్స్ కూడా 6 పాయింట్లతో 7వ స్థానంలో కొనసాగుతోంది. ఐదుసార్లు ఛాంపియన్‌గా నిలిచిన ముంబై ఇండియన్స్ పరిస్థితి కూడా ఈసారి బాగోలేదు. 7 మ్యాచ్‌ల్లో కేవలం రెండు విజయాలతో 9వ స్థానానికి పడిపోయింది. కేకేఆర్ విజయంతో ముంబైకి కూడా ముప్పు పొంచి ఉంది. రాబోయే మ్యాచ్‌ల్లో ముంబై గెలవకపోతే వారి ప్లేఆఫ్స్ అవకాశాలు కూడా సంక్లిష్టంగా మారతాయి.

మరిన్ని క్రికెట్‌ వార్తల కోసం ఇక్కడ క్లిక్‌ చేయండి