IPL 2026 : బ్యాటర్లకు దడ పుట్టించే టాప్ 5 బౌలర్లు.. ఐపీఎల్ చరిత్రలో వికెట్ల సునామీ సృష్టించింది వీరే

IPL 2026 : క్రికెట్ పండగ ఐపీఎల్ (IPL) అంటేనే బ్యాటర్ల రాజ్యమని అందరూ అనుకుంటారు. సిక్సర్లు, ఫోర్ల హోరులో బౌలర్లు బలి అవుతుంటారని భావిస్తారు. కానీ తన నైపుణ్యంతో బ్యాటర్లను ముప్పుతిప్పలు పెట్టి, వికెట్లను వేటాడే బౌలర్లు కూడా ఈ లీగ్‌లో చరిత్ర సృష్టించారు. ఐపీఎల్ 2026 సీజన్ మార్చి 28 నుంచి ప్రారంభం కానున్న నేపథ్యంలో, ఈ లీగ్ చరిత్రలో అత్యధిక వికెట్లు తీసి రికార్డులకెక్కిన టాప్ 5 బౌలర్ల గురించి ఆసక్తికర విషయాలు ఇక్కడ ఉన్నాయి. ఈ జాబితాలో భారతీయ బౌలర్ల ఆధిపత్యం స్పష్టంగా కనిపిస్తోంది.

1. యుజువేంద్ర చాహల్

ఐపీఎల్ చరిత్రలో అత్యధిక వికెట్లు తీసిన బౌలర్‌గా చాహల్(Yuzvendra Chahal) నంబర్ 1 స్థానంలో ఉన్నాడు. 2013 నుంచి 2025 వరకు ఆడిన ఈ లెగ్ స్పిన్నర్ మొత్తం 221 వికెట్లు తన ఖాతాలో వేసుకున్నాడు. ఆర్‌సీబీ, రాజస్థాన్ రాయల్స్ వంటి జట్లకు ఆడిన చాహల్, క్లిష్టమైన సమయాల్లో వికెట్లు తీయడంలో దిట్ట. కేవలం 22.76 సగటుతో వికెట్లు తీస్తూ ఐపీఎల్‌లో అత్యంత విజయవంతమైన బౌలర్‌గా నిలిచాడు.

2. భువనేశ్వర్ కుమార్

రెండో స్థానంలో ఉన్న భువనేశ్వర్ కుమార్ (Bhuvneshwar Kumar) ఐపీఎల్‌లో భారత పేస్ బౌలింగ్‌కు వెన్నెముకగా నిలిచాడు. ఇప్పటివరకు 190 మ్యాచ్‌లలో 198 వికెట్లు పడగొట్టాడు. ఈ 2026 సీజన్‌లో ఆయన మరో రెండు వికెట్లు తీస్తే 200 వికెట్ల మైలురాయిని అందుకున్న మొదటి భారతీయ ఫాస్ట్ బౌలర్‌గా చరిత్ర సృష్టిస్తాడు. ఒక ఇన్నింగ్స్‌లో 19 పరుగులకే 5 వికెట్లు తీయడం ఈయన కెరీర్ బెస్ట్ ప్రదర్శన.

3. సునీల్ నరైన్

కోల్‌కతా నైట్ రైడర్స్ స్టార్ బౌలర్ సునీల్ నరైన్(Sunil Narine) 192 వికెట్లతో మూడో స్థానంలో ఉన్నాడు. ఈ జాబితాలో ఉన్న అందరికంటే అత్యుత్తమ ఎకానమీ రేటు (6.79) కలిగిన బౌలర్ ఈయనే. అంటే బ్యాటర్లు నరైన్ బౌలింగ్‌లో పరుగులు తీయడానికి చాలా ఇబ్బంది పడతారు. తన వైవిధ్యమైన బంతులతో వికెట్లు తీస్తూ కేకేఆర్ వరుస విజయాల్లో కీలక పాత్ర పోషిస్తున్నాడు.

4. పీయూష్ చావ్లా

నరైన్‌తో సమానంగా 192 వికెట్లతో పీయూష్ చావ్లా (Piyush Chawla) నాలుగో స్థానంలో కొనసాగుతున్నాడు. ముంబై ఇండియన్స్, పంజాబ్ కింగ్స్, కేకేఆర్ వంటి జట్లకు ఆడిన ఈయన, తన అనుభవంతో ఇప్పటికీ ప్రత్యర్థి బ్యాటర్లను బోల్తా కొట్టిస్తున్నాడు. లెగ్ స్పిన్‌తో పాటు గూగ్లీలను సంధించి వికెట్లు తీయడంలో చావ్లా శైలే వేరు.

5. రవిచంద్రన్ అశ్విన్

ఈ జాబితాలో ఐదో స్థానంలో ఉన్న రవిచంద్రన్ అశ్విన్ (Ravichandran Ashwin) 221 మ్యాచ్‌లలో 187 వికెట్లు సాధించాడు. క్యారమ్ బాల్స్ వేయడంలో దిట్ట అయిన అశ్విన్, బ్యాటర్ల వీక్‌నెస్ ఆధారంగా బౌలింగ్ చేస్తూ వికెట్లు పడగొడతాడు. విభిన్నమైన బౌలింగ్ యాక్షన్లు, టెక్నిక్స్‌తో ఐపీఎల్‌లో అత్యంత మేధావి బౌలర్‌గా ఈయన గుర్తింపు పొందాడు.

మరిన్ని క్రీడా వార్తల కోసం ఇక్కడ క్లిక్ చేయండి..