IPL 2026 : యార్కర్లు పని చేయడం లేదు.. స్వింగ్ అవ్వడం లేదు.. వికెట్ల వేటలో విఫలమవుతున్న స్టార్ బౌలర్లు

IPL 2026 : ఐపీఎల్ 2026 సీజన్ భారీ సిక్సర్లు, పరుగుల వరదతో హోరెత్తుతుంటే, మరోవైపు ప్రపంచ స్థాయి బౌలర్లు మాత్రం వికెట్లు తీయలేక చుక్కలు చూస్తున్నారు. సాధారణంగా బంతి చేతికి వస్తే బ్యాటర్లను వణికించే దిగ్గజ బౌలర్లు సైతం ఈ సీజన్‌లో ఇంకా తమ వికెట్ల ఖాతాను తెరవకపోవడం క్రికెట్ వర్గాల్లో పెద్ద చర్చకు దారితీస్తోంది. ముఖ్యంగా జస్ప్రీత్ బుమ్రా లాంటి యార్కర్ కింగ్ వరుసగా మూడు మ్యాచ్‌ల్లో ఖాళీ చేతులతో వెనుదిరగడం అభిమానులను విస్మయానికి గురిచేస్తోంది.

బుమ్రా యార్కర్లకు పవర్ తగ్గిందా?

ప్రపంచంలోనే అత్యుత్తమ డెత్ ఓవర్ల బౌలర్‌గా పేరున్న జస్ప్రీత్ బుమ్రా, ఈ ఐపీఎల్ సీజన్‌లో ముంబై ఇండియన్స్ తరపున ఆడిన మూడు మ్యాచ్‌ల్లోనూ వికెట్ తీయలేకపోయాడు. కోల్‌కతాతో జరిగిన మొదటి మ్యాచ్‌లో 4 ఓవర్లలో 35 పరుగులు ఇచ్చి వికెట్ సాధించలేదు. ఆ తర్వాత ఢిల్లీపై కేవలం 21 పరుగులే ఇచ్చి పొదుపుగా బౌలింగ్ చేసినా వికెట్ మాత్రం దక్కలేదు. ఇక రాజస్థాన్‌తో జరిగిన తాజా మ్యాచ్‌లో 3 ఓవర్లలో 33 పరుగులు సమర్పించుకుని ఖాళీ చేతులతో మిగిలిపోయాడు. బుమ్రా లాంటి బౌలర్ 11 ఓవర్లు వేసి ఒక్క వికెట్ కూడా తీయకపోవడం ఇదే మొదటిసారి కావచ్చు.

ముంబైకి బోల్ట్ భారం – చెన్నైకి అహ్మద్ టెన్షన్

బుమ్రాకు తోడుగా ఉంటాడనుకున్న మరో స్టార్ పేసర్ ట్రెంట్ బోల్ట్ కూడా ముంబై ఇండియన్స్ తరపున ఇంకా వికెట్ల ఖాతాను తెరవలేదు. పవర్ ప్లేలో వికెట్లు తీయడంలో దిట్ట అయిన బోల్ట్ ఈసారి విఫలమవుతుండటం ముంబై జట్టును వేధిస్తోంది. మరోవైపు, చెన్నై సూపర్ కింగ్స్ తరపున ఆడుతున్న నూర్ అహ్మద్, ఖలీల్ అహ్మద్ కూడా వికెట్ల వేటలో వెనుకబడ్డారు. ముఖ్యంగా ఖలీల్ అహ్మద్ భారీగా పరుగులు ఇస్తూ జట్టుకు భారంగా మారుతున్నాడు.

సంక్షోభంలో మరికొంతమంది స్టార్లు

సన్ రైజర్స్ హైదరాబాద్ భారీ ధర పెట్టి కొనుక్కున్న హర్షల్ పటేల్, పంజాబ్ కింగ్స్ యంగ్ స్టార్ అర్ష్‌దీప్ సింగ్ కూడా వికెట్ల కోసం తీవ్రంగా శ్రమిస్తున్నారు. కోల్‌కతా నైట్ రైడర్స్ మిస్టరీ స్పిన్నర్ వరుణ్ చక్రవర్తి మ్యాజిక్ కూడా ఈ సీజన్‌లో పని చేయడం లేదు. ఈ బౌలర్లందరూ ఎకానమీ పరంగా బాగున్నా, కీలక సమయాల్లో వికెట్లు తీసి జట్టును గెలిపించడంలో విఫలమవుతున్నారు. పిచ్‌లు బ్యాటింగ్‌కు అనుకూలంగా ఉండటం, ఇంపాక్ట్ ప్లేయర్ రూల్ వల్ల బ్యాటర్లు భయం లేకుండా ఆడుతుండటం బౌలర్లకు శాపంగా మారింది.

గణాంకాలు ఏం చెబుతున్నాయి?

ఐపీఎల్ చరిత్రలో మునుపెన్నడూ లేని విధంగా ఈ సీజన్ మొదటి పది రోజుల్లోనే 200కు పైగా స్కోర్లు నమోదయ్యాయి. బుమ్రా, బోల్ట్ లాంటి సీనియర్లు వికెట్లు తీయలేకపోతుంటే, మరోవైపు వైభవ్ సూర్యవంశీ వంటి కుర్రాళ్ళు వీరి బౌలింగ్‌ను చీల్చి చెండాడుతున్నారు. బౌలర్లు తమ వ్యూహాలను మార్చుకోకపోతే, ఈ సీజన్ వారి కెరీర్ లోనే అత్యంత ఘోరమైనదిగా మిగిలిపోయే అవకాశం ఉందని విశ్లేషకులు హెచ్చరిస్తున్నారు.

మరిన్ని క్రీడా వార్తల కోసం ఇక్కడ క్లిక్ చేయండి..