IPL 2026 : హిస్టరీలో ఇదే ఫస్ట్ టైం.. ఒకే మ్యాచులో ఏకంగా 34 సిక్సర్లు, 6 హాఫ్ సెంచరీలు.. ఇది కదా క్రికెట్ అంటే

IPL 2026 : ఐపీఎల్ 2026 సీజన్ రికార్డుల మీద రికార్డులను తిరగరాస్తోంది. శనివారం కోల్‌కతా నైట్ రైడర్స్ (KKR), గుజరాత్ టైటాన్స్ (GT) మధ్య జరిగిన మ్యాచ్ టి20 క్రికెట్ చరిత్రలోనే ఒక మైలురాయిగా నిలిచిపోయింది. పరుగుల వరద, సిక్సర్ల సునామీతో ఈడెన్ గార్డెన్స్ హోరెత్తిపోయింది. ఈ మ్యాచ్‌లో రెండు జట్లు కలిపి ఏకంగా 465 పరుగులు సాధించాయి. ఇందులో విశేషం ఏమిటంటే.. ఒక్కరు కూడా సెంచరీ కొట్టకపోయినా, ఏకంగా ఆరుగురు బ్యాటర్లు హాఫ్ సెంచరీలు బాది ప్రపంచ రికార్డు సృష్టించారు. టి20 క్రికెట్ హిస్టరీలో ఒకే మ్యాచ్‌లో ఆరుగురు బ్యాటర్లు 50+ స్కోరు చేయడం ఇదే మొదటిసారి.

టాస్ ఓడి బ్యాటింగ్‌కు దిగిన కోల్‌కతా నైట్ రైడర్స్ నిర్ణీత 20 ఓవర్లలో 247 పరుగుల భారీ స్కోరు సాధించింది. ఫిన్ అలెన్ ఆరంభం నుంచే గుజరాత్ బౌలర్లపై విరుచుకుపడ్డాడు. ఆ తర్వాత బ్యాటింగ్‌కు వచ్చిన గుజరాత్ కూడా ఏమాత్రం తగ్గలేదు. లక్ష్య ఛేదనలో పట్టుదలతో ఆడి 218 పరుగులు చేసింది. మొత్తంగా ఈ మ్యాచ్‌లో 34 సిక్సర్లు నమోదయ్యాయి. కేకేఆర్ 29 పరుగుల తేడాతో విజయం సాధించినప్పటికీ, ఇరు జట్ల బ్యాటర్లు చూపించిన పరాక్రమం అభిమానులకు కళ్లవిందు చేసింది.

ఆ ఆరుగురు హాఫ్ సెంచరీ వీరులు వీరే

ఈ చారిత్రాత్మక మ్యాచ్‌లో రెండు జట్ల నుండి ముగ్గురు చొప్పున బ్యాటర్లు హాఫ్ సెంచరీలు బాదారు:

కేకేఆర్ తరపున:

1. ఫిన్ అలెన్: కేవలం 35 బంతుల్లో 10 సిక్సర్లతో 93 పరుగులు చేసి సెంచరీ చేజార్చుకున్నాడు.

2. అంగ్క్రిష్ రఘువంశీ: 44 బంతుల్లో 82 పరుగులు చేసి నాటౌట్‌గా నిలిచాడు.

3. కామెరూన్ గ్రీన్: 28 బంతుల్లో మెరుపు వేగంతో 52 పరుగులు సాధించాడు.

గుజరాత్ తరపున:

4. శుభ్‌మన్ గిల్: కెప్టెన్ ఇన్నింగ్స్ ఆడుతూ 49 బంతుల్లో 85 పరుగులు చేశాడు.

5. జోస్ బట్లర్: 35 బంతుల్లో 57 పరుగులు చేసి గట్టి పోటీ ఇచ్చాడు.

6. సాయి సుదర్శన్: మ్యాచ్ మధ్యలో గాయపడి రిటైర్డ్ హర్ట్‎గా వెళ్లినప్పటికీ, మళ్ళీ క్రీజులోకి వచ్చి 53 పరుగులు పూర్తి చేసి నాటౌట్‌గా నిలిచాడు.

ఐపీఎల్ 2026.. రికార్డుల వేట

ఈ సీజన్‌లో పరుగుల దాహం తీరడం లేదు. ఇప్పటివరకు జరిగిన మ్యాచ్‌ల్లోనే 52 సార్లు 200+ స్కోర్లు నమోదయ్యాయి. గత సీజన్ మొత్తం కలిపి ఇన్ని స్కోర్లు రాగా, ఈసారి ఇంకా 74 మ్యాచ్‌లు మిగిలి ఉండగానే ఈ ఫీట్ సాధించడం విశేషం. ఇదే ఊపు కొనసాగితే ఐపీఎల్ 2026 చరిత్రలో అత్యధిక రికార్డులు నమోదైన సీజన్‌గా నిలిచిపోనుంది. నేడు ఆర్సీబీ వర్సెస్ పంజాబ్ మ్యాచ్ ఉండటంతో, మరో పరుగుల విందు కోసం ఫ్యాన్స్ ఆత్రుతగా ఎదురుచూస్తున్నారు.

మరిన్ని క్రీడా వార్తల కోసం ఇక్కడ క్లిక్ చేయండి..