IPL 2025: 3,000 మంది పోలీసులతో భారీ భద్రతా! ‘షీ టీమ్స్’ తో పాటు సెక్యూరిటీ మాములుగా లేదుగా

హైదరాబాద్ నగరంలో ఐపీఎల్ 2025 కోసం భారీ స్థాయిలో భద్రతా ఏర్పాట్లు కొనసాగుతున్నాయి. మార్చి 23 నుంచి రాజీవ్ గాంధీ అంతర్జాతీయ క్రికెట్ స్టేడియంలో జరిగే ఈ టోర్నమెంట్‌లో తొమ్మిది మ్యాచ్‌లకు హైదరాబాద్ ఆతిథ్యమివ్వనుంది. ఈ నేపథ్యంలో, హైదరాబాద్ పోలీసులు అభిమానుల భద్రతను కాపాడేందుకు ప్రత్యేక చర్యలు తీసుకుంటున్నారు. స్టేడియం 39,000 మంది సామర్థ్యం కలిగి ఉండగా, రాచకొండ పోలీస్ కమిషనర్ సుధీర్ బాబు దాదాపు 3,000 మంది పోలీసు అధికారులను భద్రతా కర్తవ్యాలకు నియమించినట్లు ప్రకటించారు.

అదనంగా, మహిళా అభిమానుల రక్షణ కోసం ‘షీ టీమ్స్’ ప్రత్యేకంగా క్రమబద్ధమైన భద్రతా చర్యలు తీసుకుంటున్నాయి. వీటితో పాటు, మ్యాచ్‌ల తర్వాత ప్రేక్షకులు సురక్షితంగా తిరిగి వెళ్ళేలా ప్రజా రవాణా సౌకర్యాలను మెరుగుపరచాలని పోలీసులు సూచించారు. దీనిలో భాగంగా, మెట్రో రైలు సేవలను ఆలస్యంగా అందించాల్సిందిగా అధికారులను అభ్యర్థించారు. “ఇక్కడ తొమ్మిది మ్యాచ్‌లు జరుగుతాయి. స్టేడియంలో 39,000 మంది సామర్థ్యం ఉంది. దాదాపు 3,000 మంది పోలీసు అధికారులు విధుల్లో ఉన్నారు. మహిళల భద్రత కోసం ‘షీ టీమ్స్’ కూడా అందుబాటులో ఉన్నాయి. ప్రేక్షకులు మ్యాచ్ తర్వాత సురక్షితంగా తిరిగి వెళ్లేందుకు మెట్రో రైళ్లను ఆలస్యంగా నడపాలని అభ్యర్థించాం” అని సుధీర్ బాబు ANI వార్తా సంస్థకు వెల్లడించారు.

హైదరాబాద్ వేదిక ఐపీఎల్ 2025లో మొదటి క్వాలిఫైయర్, ఎలిమినేటర్ మ్యాచ్‌లకు ఆతిథ్యం ఇస్తుంది. గత ఏడాది సన్‌రైజర్స్ హైదరాబాద్ (SRH) అద్భుతమైన ప్రదర్శనతో ఫైనల్‌కు చేరుకుంది. అయితే, టైటిల్ పోరులో కోల్‌కతా నైట్ రైడర్స్ (KKR) చేతిలో ఓటమి పాలైంది. అయినప్పటికీ, ఈ ఏడాది SRH మంచి ప్రదర్శన చూపిస్తుందని అభిమానులు ఆశిస్తున్నారు. కెప్టెన్ పాట్ కమ్మిన్స్ నాయకత్వంలో జట్టు మరింత బలంగా మారింది. గత సంవత్సరం ఐపీఎల్ మెగా వేలానికి ముందు SRH నలుగురు కీలక ఆటగాళ్లను నిలుపుకుంది. వీరిలో కమ్మిన్స్, ట్రావిస్ హెడ్, హెన్రిచ్ క్లాసెన్, నితీష్ కుమార్ రెడ్డి ఉన్నారు.

ఈసారి జట్టు మరింత బలంగా ఉండేందుకు ఇషాన్ కిషన్, కమిందు మెండిస్‌లను తమ టీమ్‌లో చేర్చుకుంది. వీరితో పాటు బౌలింగ్ విభాగాన్ని మెరుగుపరిచేందుకు మహ్మద్ షమీ, హర్షల్ పటేల్, జయదేవ్ ఉనద్కట్‌లను తీసుకుంది. స్పిన్ విభాగంలో ఆడమ్ జంపా, రాహుల్ చాహర్‌లను జట్టులో భాగం చేసుకుంది. SRH ఐపీఎల్ 2025లో తమ తొలి రెండు మ్యాచ్‌లను హోం గ్రౌండ్‌లో ఆడనుంది. ఆ తర్వాత విశాఖపట్నంలో ఢిల్లీ క్యాపిటల్స్‌తో తలపడనుంది. అనంతరం, ఈడెన్ గార్డెన్స్‌లో డిఫెండింగ్ ఛాంపియన్ కోల్‌కతా నైట్ రైడర్స్‌తో పోటీ పడనుంది.

హైదరాబాద్ నగరంలోని అభిమానులు ఐపీఎల్ 2025 కోసం ఎంతో ఆసక్తిగా ఎదురుచూస్తున్నారు. వారి సౌకర్యం కోసం పోలీసులు విస్తృత భద్రతా చర్యలు చేపడుతున్నారు. నగరంలో ట్రాఫిక్ నియంత్రణ, స్టేడియం పరిసరాల్లో భద్రత, మెట్రో రైలు సేవలను మరింత అందుబాటులోకి తేవడం వంటి చర్యలు చేపడుతున్నారు. ఐపీఎల్ 2025 సీజన్‌లో SRH విజయం సాధిస్తుందా? గతేడాది మిస్సయిన ట్రోఫీని ఈసారి గెలుస్తుందా? అన్నది చూడాలి!

మరిన్ని క్రీడా వార్తల కోసం ఇక్కడ క్లిక్ చేయండి.