IND vs WI: రేపటికి వాయిదా పడిన టీమిండియా విక్టరీ.. సరికొత్త హిస్టరీ లిఖించనున్న గిల్ సేన

India vs West Indies, 2nd Test: ఢిల్లీ టెస్ట్ లో గెలవడానికి భారత జట్టు ఇంకా 58 పరుగుల దూరంలో ఉంది. వెస్టిండీస్ పై 121 పరుగుల లక్ష్యాన్ని ఛేదించే క్రమంలో భారత జట్టు ఒక వికెట్ నష్టానికి 63 పరుగులు చేసింది. నాల్గవ రోజు ఆట ముగిసే సమయానికి, కేఎల్ రాహుల్ 25 పరుగులతో, సాయి సుదర్శన్ 30 పరుగులతో నాటౌట్ గా ఉన్నారు. ఇద్దరూ ఇప్పటికే యాభై పరుగుల భాగస్వామ్యం నెలకొల్పారు. యశస్వి జైస్వాల్ 8 పరుగుల తర్వాత అవుటయ్యాడు.

ఫాలో ఆన్ చేసిన వెస్టిండీస్ జట్టు రెండో ఇన్నింగ్స్‌లో 390 పరుగులకు ఆలౌట్ అయింది. జస్టిన్ గ్రీవ్స్ (50), జేడెన్ సీల్స్ (32) 10వ వికెట్‌కు 113 బంతుల్లో 79 పరుగులు జోడించారు. ఒకానొక సమయంలో వెస్టిండీస్ ఇన్నింగ్స్ ఓటమి ప్రమాదంలో పడింది. జాన్ కాంప్‌బెల్ (115), షాయ్ హోప్ (103) సెంచరీలు సాధించి ఇన్నింగ్స్ ఓటమిని నివారించారు. ఈ ఇద్దరూ మూడో వికెట్‌కు 177 పరుగులు జోడించారు.

భారత్ తరపున జస్ప్రీత్ బుమ్రా, కుల్దీప్ యాదవ్ చెరో మూడు వికెట్లు పడగొట్టారు. మహమ్మద్ సిరాజ్ రెండు వికెట్లు పడగొట్టారు. రవీంద్ర జడేజా, వాషింగ్టన్ సుందర్ చెరో వికెట్ తీశారు. మ్యాచ్ మూడో రోజు, వెస్టిండీస్ తొలి ఇన్నింగ్స్‌లో 248 పరుగులకు ఆలౌట్ అయింది. భారత్ తన తొలి ఇన్నింగ్స్‌ను 518/5 వద్ద డిక్లేర్ చేసిన సంగతి తెలిసిందే.