గంభీర్కు షాకిచ్చిన బీసీసీఐ.. జింబాబ్వే పర్యటన నుంచి ఔట్.. కొత్త బాధ్యతలు ఎవరికంటే?
Gautam Gambhir Replaced: బీసీసీఐ తీసుకున్న ఈ నిర్ణయం భారత క్రికెట్లో కొత్త ఒరవడికి నాంది పలుకుతోంది. ఒకే సమయంలో రెండు జట్లను బరిలోకి దించడం ద్వారా యువ ఆటగాళ్లకు అంతర్జాతీయ వేదికలపై మంచి అనుభవం లభిస్తుంది. అదే సమయంలో లక్ష్మణ్ లాంటి అనుభవజ్ఞుడి చేతుల్లో యువ జట్టు సురక్షితంగా ఉంటుందని క్రికెట్ విశ్లేషకులు భావిస్తున్నారు. ఈ సరికొత్త వ్యూహం టీమ్ ఇండియాకు ఎలాంటి విజయాలను అందిస్తుందో వేచి చూడాలి.
Updated on: Jul 07, 2026 | 1:39 PM
Gautam Gambhir Replaced: భారత క్రికెట్ అభిమానులకు అత్యంత ఆశ్చర్యకరమైన వార్త. టీమ్ ఇండియా ప్రధాన కోచ్ గౌతమ్ గంభీర్ త్వరలో జరగబోయే జింబాబ్వే పర్యటనతో పాటు ప్రతిష్టాత్మక ఆసియా క్రీడలకు దూరం కానున్నారు. బిజీ షెడ్యూల్ కారణంగా బీసీసీఐ ఈ కీలక నిర్ణయం తీసుకుంది. గంభీర్ స్థానంలో భారత జట్టుకు మార్గదర్శకత్వం వహించబోయే ఆ దిగ్గజం ఎవరో ఓసారి చూద్దాం..
ఒకే సమయంలో రెండు సవాళ్లు.. బీసీసీఐ వ్యూహాత్మక నిర్ణయం..
భారత క్రికెట్ నియంత్రణ మండలి (బీసీసీఐ) ప్రస్తుతం ఆటగాళ్లపైనే కాకుండా కోచింగ్ సిబ్బందిపై కూడా పడుతున్న పనిభారాన్ని తగ్గించే పనిలో పడింది. రాబోయే కాలంలో భారత జట్టు అంతర్జాతీయ క్రికెట్ క్యాలెండర్ చాలా బిజీగా మారడమే దీనికి ప్రధాన కారణం. ముఖ్యంగా ఈ ఏడాది సెప్టెంబర్, అక్టోబర్ నెలల్లో టీమ్ ఇండియా ఒకేసారి రెండు వేర్వేరు చోట్ల మ్యాచ్లు ఆడాల్సి ఉంది. ఒకవైపు చైనాలోని హాంగ్జౌ వేదికగా ప్రతిష్టాత్మక ఆసియా క్రీడలు జరగనుండగా, అదే సమయంలో స్వదేశంలో వెస్టిండీస్తో పరిమిత ఓవర్ల సిరీస్ ప్రారంభం కానుంది. ఈ రెండు కీలక బాధ్యతలను ఒకే కోచింగ్ బృందం పర్యవేక్షించడం అసాధ్యం కావడంతో, బీసీసీఐ కోచింగ్ బాధ్యతలను విభజించాలని నిర్ణయించింది.
గంభీర్ స్థానంలో హెడ్ కోచ్గా వీవీఎస్ లక్ష్మణ్..!
ఈ ఊపిరి సలపని షెడ్యూల్ కారణంగా, జింబాబ్వే పర్యటనతో పాటు ఆసియా క్రీడలకు భారత జట్టు ప్రధాన కోచ్ గౌతమ్ గంభీర్ అందుబాటులో ఉండటం లేదు. ఆయన స్థానంలో జాతీయ క్రికెట్ అకాడమీ (ఎన్సీఏ) అధినేత, భారత మాజీ స్టార్ బ్యాట్స్మెన్ వీవీఎస్ లక్ష్మణ్ తాత్కాలిక ప్రధాన కోచ్గా బాధ్యతలు స్వీకరించనున్నారు. లక్ష్మణ్కు ఇలాంటి బాధ్యతలు కొత్తేమీ కాదు. గతంలో కూడా రాహుల్ ద్రవిడ్ అందుబాటులో లేని సమయంలో ఆయన పలు అంతర్జాతీయ పర్యటనల్లో భారత జట్టును విజయవంతంగా నడిపించారు. ముఖ్యంగా గత ఆసియా క్రీడల్లో భారత జట్టు పసిడి పతకం గెలవడంలో లక్ష్మణ్ కోచింగ్ కీలక పాత్ర పోషించింది.
కొత్త కోచింగ్ బృందం వివరాలు ఇవే..!
కేవలం ప్రధాన కోచ్ మాత్రమే కాకుండా, ఈ రెండు పర్యటనల కోసం సరికొత్త సహాయక సిబ్బందిని కూడా బీసీసీఐ సిద్ధం చేసింది. లక్ష్మణ్కు తోడుగా భారత మాజీ స్పిన్నర్ సునీల్ జోషి బౌలింగ్ కోచ్గా వ్యవహరించనున్నారు. అలాగే మాజీ బ్యాట్స్మెన్ హృషికేష్ కనిత్కర్ బ్యాటింగ్ కోచ్గా బాధ్యతలు పంచుకోనున్నారు. ఈ త్రయం జింబాబ్వే పర్యటన ముగించుకుని, ఆ వెంటనే ఆసియా క్రీడల్లో బరిలోకి దిగే భారత యువ జట్టుకు దిశానిర్దేశం చేయనుంది. మరోవైపు, సీనియర్ ఆటగాళ్లతో కూడిన ప్రధాన జట్టుకు స్వదేశంలో జరిగే వెస్టిండీస్ సిరీస్ కోసం గౌతమ్ గంభీర్ తన సేవలను కొనసాగిస్తారు.
వెస్టిండీస్ భారత పర్యటన షెడ్యూల్..
స్వదేశంలో వెస్టిండీస్తో జరిగే సిరీస్ సెప్టెంబర్ 27 నుంచి అక్టోబర్ 17 వరకు జరగనుంది. ఇందులో భాగంగా మూడు వన్డేలు, ఐదు టీ20 మ్యాచ్లు జరుగుతాయి. వన్డే మ్యాచ్లు తిరువనంతపురం, గువహటి, చండీగఢ్లలో జరగనుండగా, టీ20 మ్యాచ్లు లక్నో, రాంచీ, ఇండోర్, హైదరాబాద్, బెంగళూరు వేదికలుగా జరగనున్నాయి. ఆసియా క్రీడల తేదీలు ఈ సిరీస్ ప్రారంభ మ్యాచ్లతో ముడిపడి ఉండటం వల్లే బోర్డు ఈ విధమైన ముందస్తు ఏర్పాట్లు చేసింది.
మరిన్ని క్రీడా వార్తల కోసం ఇక్కడ క్లిక్ చేయండి..
