ఒకే ఇన్నింగ్స్‌లో 4 ఓవర్లు మెయిడెన్లే.. పొట్టి ఫార్మాట్‌లో డేంజరస్ బౌలర్లు.. బ్యాటర్లకు బడితపూజే..

క్రికెట్‌లో ఎప్పుడు ఏం జరుగుతుందో చెప్పలేం. క్రికెట్ అనేది అన్ ప్రిడక్టబుల్ గేమ్ అని చెబుతుంటారు. టీ20 క్రికెట్‌లో నాలుగు మెయిడెన్ ఓవర్లు బౌలింగ్ చేయడం గురించి ఎప్పుడైనా ఆలోచించారా.? ఏ బౌలర్ కూడా ఇలా ఊహించలేడు. చాలామందికి ఇది ఒక జోక్‌గా కూడా అనిపించవచ్చు. అయితే, ఈ 20-ఓవర్ల ఫార్మాట్‌లో ఇప్పటికే ఈ అసాధ్యమైన రికార్డు సాధ్యమైంది. టీ20 అంతర్జాతీయ క్రికెట్‌లో తమ 4 మెయిడెన్ ఓవర్లను బౌలింగ్ చేసిన బౌలర్లు ప్రపంచంలో ముగ్గురు మాత్రమే ఉన్నారు. అలాంటి ముగ్గురు దిగ్గజాలను ఓసారి చూద్దాం..

1. సాద్ బిన్ జాఫర్ (కెనడా): నవంబర్ 14, 2021న జరిగిన ఐసీసీ పురుషుల టీ20 ప్రపంచ కప్ లో భాగంగా ఈ రికార్డ్ నమోదైంది. అమెరికాస్ రీజియన్ క్వాలిఫైయర్ మ్యాచ్‌లో పనామాతో జరిగిన మ్యాచ్‌లో కెనడా ఎడమచేతి వాటం స్పిన్నర్ సాద్ బిన్ జాఫర్ ఈ రికార్డ్ లిఖించాడు. తన 4 ఓవర్ల కోటాలో 4 మెయిడెన్ ఓవర్లు బౌలింగ్ చేశాడు. సాద్ బిన్ జాఫర్ 4 మెయిడెన్ ఓవర్లు బౌలింగ్ చేసి, ఒక్క పరుగూ ఇవ్వకుండా రెండు వికెట్లు కూడా తీసుకున్నాడు. ఈ మ్యాచ్‌లో ముందుగా బ్యాటింగ్ చేసిన కెనడా 20 ఓవర్లలో ఒక వికెట్ నష్టానికి 245 పరుగులు చేసి పనామాకు 246 పరుగుల లక్ష్యాన్ని నిర్దేశించింది. దీనికి సమాధానంగా, పనామా 17.2 ఓవర్లలో 37 పరుగులకు ఆలౌట్ అయింది. కెనడా 208 పరుగుల తేడాతో మ్యాచ్‌ను గెలుచుకుంది.

2. లాకీ ఫెర్గూసన్ (న్యూజిలాండ్): జూన్ 17, 2024న పాపువా న్యూ గినియాతో జరిగిన టీ20 ప్రపంచ కప్ మ్యాచ్‌లో న్యూజిలాండ్ ఫాస్ట్ బౌలర్ లాకీ ఫెర్గూసన్ తన 4 ఓవర్లలో నాలుగు మెయిడెన్ బౌలింగ్ చేశాడు. లాకీ ఫెర్గూసన్ ఒక్క పరుగు కూడా ఇవ్వకుండా 4 మెయిడెన్ ఓవర్లు బౌలింగ్ చేసి 3 వికెట్లు పడగొట్టాడు. పాపువా న్యూ గినియా 19.4 ఓవర్లలో 78 పరుగులకు ఆలౌట్ అయింది. దీనికి ప్రతిస్పందనగా, న్యూజిలాండ్ కేవలం 12.2 ఓవర్లలోనే లక్ష్యాన్ని చేరుకుంది. న్యూజిలాండ్ 46 బంతులు మిగిలి ఉండగానే ఏడు వికెట్ల తేడాతో మ్యాచ్‌ను గెలుచుకుంది.

3. ఆయుష్ శుక్లా (హాంకాంగ్): ఆగస్టు 31, 2024న జరిగిన ఐసీసీ పురుషుల టీ20 ప్రపంచ కప్ ఆసియా క్వాలిఫయర్ ఏ మ్యాచ్‌లో హాంకాంగ్ బౌలర్ ఆయుష్ శుక్లా ఈ రికార్డును సాధించాడు. మంగోలియాతో జరిగిన ఈ మ్యాచ్ లో తన 4 ఓవర్ల కోటాలో ఈ మీడియం పేసర్ 4 మెయిడెన్ ఓవర్లు బౌలింగ్ చేశాడు. ఆయుష్ శుక్లా ఒక్క పరుగు కూడా ఇవ్వకుండా 4 మెయిడెన్ ఓవర్లు బౌలింగ్ చేసి ఒక వికెట్ కూడా తీసుకున్నాడు. ఈ మ్యాచ్‌లో, మంగోలియా 14.2 ఓవర్లలో 17 పరుగులకు ఆలౌట్ అయింది. దీనికి సమాధానంగా, హాంకాంగ్ కేవలం 1.4 ఓవర్లలోనే లక్ష్యాన్ని చేరుకుంది. హాంకాంగ్ 110 బంతులు మిగిలి ఉండగానే తొమ్మిది వికెట్ల తేడాతో మ్యాచ్‌ను గెలుచుకుంది.