రోహిత్, విరాట్‌లకు అంత సీన్ లేదుగా.. ఐపీఎల్ హీస్టరీలో మెరుపు వీరులు వీరే.. అగ్రస్థానంలో ఐదుగురు..!

ప్రపంచంలోనే అత్యంత ఆదరణ పొందిన ఇండియన్ ప్రీమియర్ లీగ్ (ఐపీఎల్)లో బ్యాటర్ల జోరు ఎప్పుడూ నరాలు తెగే ఉత్కంఠను కలిగిస్తుంది. సాధారణంగా సిక్సర్లు, ఫోర్ల వర్షం కురిపించే రోహిత్ శర్మ, విరాట్ కోహ్లీ వంటి దిగ్గజాల పేర్లు మనకు గుర్తుకు వస్తాయి. కానీ, లీగ్ చరిత్రలో అత్యంత వేగంగా సెంచరీలు బాదిన రికార్డులు మాత్రం ఇతర విధ్వంసకర ఆటగాళ్ల ఖాతాలో ఉన్నాయి. ఆ టాప్-5 వీరులు ఎవరో ఓసారి చూద్దాం..

ఐపీఎల్ చరిత్రలో అత్యంత వేగవంతమైన సెంచరీలు..

ఐపీఎల్ అంటేనే పరుగుల వరద. ఇక్కడ రికార్డులు నమోదవుతుంటాయి. మళ్ళీ తుడిచిపెట్టుకుపోతుంటాయి. అయితే, కొన్ని ఇన్నింగ్స్‌లు మాత్రం చరిత్రలో సువర్ణాక్షరాలతో లిఖించబడ్డాయి. తక్కువ బంతుల్లోనే మూడంకెల స్కోరును అందుకున్న ఆ ఐదుగురు ఆటగాళ్లు వీరే:

1. క్రిస్ గేల్ (30 బంతులు): వెస్టిండీస్ విధ్వంసకర వీరుడు క్రిస్ గేల్ పేరు వింటేనే బౌలర్లు వణికిపోతారు. 2013లో పుణే వారియర్స్ ఇండియాపై కేవలం 30 బంతుల్లోనే శతకం పూర్తి చేసి గేల్ ప్రపంచ రికార్డు సృష్టించాడు. ఆ మ్యాచ్‌లో అతను మొత్తం 66 బంతుల్లో 175 పరుగులు చేసి అజేయంగా నిలిచాడు. ఇందులో 13 ఫోర్లు, 17 సిక్సర్లు ఉండటం విశేషం. ఈ రికార్డు ఇప్పటికీ పదిలంగానే ఉంది.

2. వైభవ్ సూర్యవంశీ (35 బంతులు): యువ సంచలనం వైభవ్ సూర్యవంశీ తన దూకుడుతో అందరినీ ఆశ్చర్యపరిచాడు. 2025 సీజన్‌లో గుజరాత్ టైటాన్స్‌పై కేవలం 35 బంతుల్లోనే సెంచరీ సాధించి ఈ జాబితాలో రెండో స్థానానికి చేరుకున్నాడు. అంతేకాకుండా సన్‌రైజర్స్ హైదరాబాద్‌పై కూడా 36 బంతుల్లో మరో శతకం బాది తనలోని నిలకడైన వేగాన్ని చాటుకున్నాడు.

3. యూసుఫ్ పఠాన్ (37 బంతులు): భారత మాజీ ఆల్ రౌండర్ యూసుఫ్ పఠాన్ 2010లో రాజస్థాన్ రాయల్స్ తరపున ఆడుతూ ముంబై ఇండియన్స్‌పై ఈ ఘనత సాధించాడు. కేవలం 37 బంతుల్లోనే సెంచరీ పూర్తి చేసి భారత అభిమానులను ఉర్రూతలూగించాడు. మైదానం నలుమూలలా భారీ సిక్సర్లు బాదడంలో పఠాన్ శైలే వేరు.

4. హెన్రిచ్ క్లాసెన్ (37 బంతులు): దక్షిణాఫ్రికా ఆటగాడు హెన్రిచ్ క్లాసెన్ 2025 సీజన్‌లో సన్‌రైజర్స్ హైదరాబాద్ జట్టు తరపున మెరుపులు మెరిపించాడు. కోల్‌కతా నైట్ రైడర్స్‌తో జరిగిన మ్యాచ్‌లో కేవలం 37 బంతుల్లోనే సెంచరీ మార్కును అందుకున్నాడు. స్పిన్, పేస్ అనే తేడా లేకుండా క్లాసెన్ చేసిన దాడి ఈ జాబితాలో అతనికి చోటు కల్పించింది.

5. డేవిడ్ మిల్లర్ (38 బంతులు): కిల్లర్ మిల్లర్‌గా పేరుగాంచిన డేవిడ్ మిల్లర్ 2013లో రాయల్ ఛాలెంజర్స్ బెంగళూరుపై విశ్వరూపం ప్రదర్శించాడు. పంజాబ్ కింగ్స్ తరపున ఆడుతూ కేవలం 38 బంతుల్లో శతకాన్ని బాదాడు. ఓడిపోతుందనుకున్న మ్యాచ్‌ను తన అద్భుతమైన ఫినిషింగ్‌తో గెలిపించి ఐపీఎల్ చరిత్రలో అత్యంత వేగవంతమైన సెంచరీల జాబితాలో చేరిపోయాడు.

మరిన్ని క్రీడా వార్తల కోసం ఇక్కడ క్లిక్ చేయండి..