Vaibhav Sooryavanshi: ఫైనల్‌కి దూసుకెళ్లిన వైభవ్ టీమ్..! చివరి సారిగా ఫైనల్ ఎప్పుడు ఆడిందో తెలిస్తే ఆశ్చర్యపోతారు

Vaibhav Sooryavanshi: ఈస్ట్ జోన్ జట్టు దులీప్ ట్రోఫీలో చారిత్రాత్మక ఘట్టాన్ని నమోదు చేసింది. మంగళవారం నాడు సెంట్రల్ జోన్‌తో జరిగిన సెమీఫైనల్ మ్యాచ్ మూడో రోజునే ఈస్ట్ జోన్ విజయాన్ని అందుకోగా, 14 ఏళ్ల సుదీర్ఘ విరామం తర్వాత ఆ జట్టు ఫైనల్‌కు చేరడం విశేషం. చివరిసారిగా 2012వ సంవత్సరంలో ఈస్ట్ జోన్ జట్టు ఖితాబీ పోరుకు అర్హత సాధించింది. ఇప్పుడు మళ్లీ ఇన్నాళ్లకు సెంట్రల్ జోన్‌ను చిత్తు చేసి టైటిల్ పోరుకు అర్హత సాధించడంతో ఆ జట్టు సభ్యులు సంబరాల్లో మునిగిపోయారు.

ఓవర్‌నైట్ స్కోరు 45/3తో మ్యాచ్ మూడో రోజు ఆట ప్రారంభించిన సెంట్రల్ జోన్ బ్యాటర్లు ఈస్ట్ జోన్ పేస్ ధాటికి నిలవలేకపోయారు. మూడో రోజు కేవలం 113 పరుగులు మాత్రమే జోడించి 158 పరుగులకు ఆలౌట్ అయ్యారు. సెంట్రల్ జోన్ ఒక దశలో 97 పరుగులకే 8 వికెట్లు కోల్పోయి ఘోరమైన పతన అంచున నిలిచింది. అమన్ మోఖాడే 41 పరుగులు చేయగా, ఆఖర్లో రింకూ సింగ్ (20), హర్ష్ దూబే (24), అర్షద్ ఖాన్ (25) కొద్దిసేపు పోరాడటంతో సెంట్రల్ జోన్ 150 పరుగుల మార్కును దాటగలిగింది. ఈస్ట్ జోన్ బౌలర్లలో ముకేశ్ కుమార్ 4 వికెట్లు, మహమ్మద్ షమీ 3 వికెట్లతో విరుచుకుపడ్డారు.

159 పరుగుల స్వల్ప లక్ష్యంతో బరిలోకి దిగిన ఈస్ట్ జోన్‌కు యంగ్ సెన్సేషన్ వైభవ్ సూర్యవంశీ, అభిమన్యు ఈశ్వరన్ మంచి శుభారంభాన్ని అందించారు. 15 ఏళ్ల వైభవ్ 43 బంతుల్లో 3 ఫోర్లు, 2 సిక్సర్లతో 40 పరుగులు చేయగా, ఈశ్వరన్‌తో కలిసి తొలి వికెట్‌కు 61 పరుగుల భాగస్వామ్యాన్ని నెలకొల్పారు. ఈశ్వరన్ 24 పరుగులు చేసి అవుట్ అయ్యారు. ఆ తర్వాత విరాట్ సింగ్ (12), కుమార్ కుషాగ్ర (22) కొద్దిసేపటికే వెనుదిరగడంతో పాటు అనుకూల్ రాయ్ సున్నాకే అవుట్ కావడంతో మ్యాచ్‌లో కొంత ఉత్కంఠ నెలకొంది. హర్ష్ దూబే 4 వికెట్లు తీసి ఈస్ట్ జోన్‌ను కాస్త భయపెట్టారు.

వికెట్లు పడుతున్న వేళ కెప్టెన్ ఈశాన్ కిషన్ ఎంతో ఒత్తిడిని జయించి బాధ్యతాయుతమైన ఇన్నింగ్స్ ఆడారు. ఆయన 41 బంతుల్లో 4 ఫోర్లు, ఒక సిక్సర్‌తో నాటౌట్‌గా 39 పరుగులు చేసి జట్టును విజయం దిశగా నడిపించారు. సుదీప్ కుమార్ ఘరామీ (14)తో కలిసి 5వ వికెట్‌కు 26 పరుగులు జోడించి జట్టు స్కోరును 150 దాటించారు. చివరికి మహమ్మద్ శమి 5 బంతుల్లో 8 పరుగులు చేసి బౌండరీతో ఈస్ట్ జోన్‌కు 39.3 ఓవర్లలో 4 వికెట్ల తేడాతో విజయాన్ని ఖాయం చేశారు.

మ్యాచ్‌ మొత్తం రెండు ఇన్నింగ్స్‌ల్లో కలిపి 7 వికెట్లు (తొలి ఇన్నింగ్స్‌లో 3, రెండో ఇన్నింగ్స్‌లో 4) పడగొట్టిన పేసర్ ముకేశ్ కుమార్‌కు ప్లేయర్ ఆఫ్ ది మ్యాచ్ పురస్కారం లభించింది. కాగా, తొలి ఇన్నింగ్స్‌లో ఈస్ట్ జోన్ తరఫున వైభవ్ సూర్యవంశీ 92 పరుగుల సంచలన ఇన్నింగ్స్ ఆడిన సంగతి తెలిసిందే. రెండు జట్లు తమ తొలి ఇన్నింగ్స్‌ల్లో 266 పరుగులే చేయడంతో సమంగా నిలిచాయి.

మరిన్ని క్రీడా వార్తల కోసం ఇక్కడ క్లిక్ చేయండి..