Asia Cup Trophy : ఆసియా కప్ ట్రోఫీ వివాదంపై కీలక భేటీ.. మొహసిన్ నఖ్వీ, దేవజిత్ సైకియా మధ్య ఏం జరిగింది?

Asia Cup Trophy : భారత్, పాకిస్తాన్ క్రికెట్ బోర్డుల మధ్య వివాదాస్పదంగా మారిన ఆసియా కప్ ట్రోఫీ అంశంపై కీలక పరిణామం చోటుచేసుకుంది. ఇటీవల దుబాయ్‌లో జరిగిన అంతర్జాతీయ క్రికెట్ మండలి సమావేశాల సందర్భంగా, బీసీసీఐ కార్యదర్శి దేవ్జీత్ సైకియా, పీసీబీ ఛైర్మన్ మొహసిన్ నఖ్వి ప్రత్యేకంగా సమావేశమయ్యారు. సుమారు ఒక నెల రోజులుగా అపరిష్కృతంగా ఉన్న ఈ ట్రోఫీ వివాదాన్ని వీలైనంత త్వరగా పరిష్కరించాలని ఇద్దరు పెద్దలు అంగీకరించినట్లు దేవజిత్ సైకియా వెల్లడించారు. ఈ ఇద్దరు ప్రతినిధుల సమావేశానికి ఐసీసీ మధ్యవర్తిత్వం వహించడం గమనార్హం.

బీసీసీఐ కార్యదర్శి దేవ్జీత్ సైకియా దుబాయ్‌లో పీసీబీ ఛైర్మన్ మొహసిన్ నఖ్వితో భేటీ అయ్యారు. ఇది అధికారిక ఐసీసీ సమావేశం కానప్పటికీ, ఈ వివాదం పరిష్కారం కోసం ఐసీసీ బయట ఈ భేటీని ఏర్పాటు చేసింది. ఇద్దరు బోర్డు పెద్దలు ఆసియా కప్ ట్రోఫీకి సంబంధించిన వివాదాన్ని వీలైనంత త్వరగా ముగించాలని అంగీకరించారు. ఈ చర్చలు సజావుగా సాగడానికి సంజోగ్ గుప్తా, ఇమ్రాన్ ఖ్వాజా మధ్యవర్తులుగా వ్యవహరించినట్లు టైమ్స్ ఆఫ్ ఇండియా వెల్లడించింది.

దేవ్జీత్ సైకియా మాట్లాడుతూ.. “పీసీబీ చీఫ్ మొహసిన్ నఖ్వితో మా సమావేశం సానుకూలంగా జరిగింది. ఈ వివాదం ఐసీసీ అధికారిక ఎజెండా కానప్పటికీ, దానిని పరిష్కరించడానికి ప్రత్యేకంగా సమావేశాన్ని ఏర్పాటు చేసినందుకు ఐసీసీకి ధన్యవాదాలు. ఇద్దరు నాయకులు సమస్యను త్వరగా పరిష్కరించాలని కోరుకుంటున్నారు.” అని తెలిపారు.

సెప్టెంబర్ 28న జరిగిన ఆసియా కప్ ఫైనల్ మ్యాచ్‌లో భారత్, పాకిస్తాన్‌ను 5 వికెట్ల తేడాతో ఓడించి కప్ గెలుచుకుంది. అయితే, ఈ విజయం సాధించి ఒక నెల రోజులు గడిచినా భారత జట్టుకు ఇప్పటికీ ఆసియా కప్ ట్రోఫీ దక్కలేదు. గతంలో ఈ వివాదంపై తీవ్ర చర్చ జరిగింది. మొహసిన్ నఖ్వి ఐసీసీ సమావేశానికి హాజరు కాకపోవచ్చునని వార్తలు వచ్చినా, ఆయన హాజరై బీసీసీఐ ప్రతినిధులతో మాట్లాడారు.

ట్రోఫీ వివాదాన్ని పరిష్కరించడానికి గతంలో కూడా అనేక సమావేశాలు జరిగాయని, కానీ వాటిలో ముఖ్యమైన విషయాలపై చర్చించినా పరిష్కారం దొరకలేదని దేవజిత్ సైకియా పేర్కొన్నారు. ఈ బోర్డు సమావేశాల్లో బీసీసీఐ తరపున వివిధ నాయకులు ప్రాతినిధ్యం వహించారు. దేవజిత్ సైకియా బీసీసీఐ తరపున ప్రాతినిధ్యం వహించారు. సీఈసీ సమావేశంలో బీసీసీఐ తరపున అరుణ్ సింగ్ ధూమల్ పాల్గొన్నారు.

మరిన్ని క్రికెట్‌ వార్తల కోసం ఇక్కడ క్లిక్ చేయండి..

ఫుల్ స్కోర్ బోర్డ్ కోసం ఇక్కడ క్లిక్ చేయండి..