Babar Azam : విమర్శించిన వాళ్ల నోళ్లు మూయించాడు.. గేల్ పవర్‌ను, కోహ్లీ క్లాస్‌ను కలిపేసి కొట్టిన బాబర్

Babar Azam : క్రికెట్ ప్రపంచంలో రికార్డుల రారాజు ఎవరంటే ఒకప్పుడు సచిన్, మొన్నటి వరకు కోహ్లీ.. కానీ ఇప్పుడు పాకిస్థాన్ స్టార్ బ్యాటర్ బాబర్ ఆజం పేరు మార్మోగిపోతోంది. టీ20 క్రికెట్‌లో బాబర్ సరికొత్త చరిత్ర సృష్టించాడు. అటు వెస్టిండీస్ విధ్వంసకర వీరుడు క్రిస్ గేల్, ఇటు టీమిండియా రన్ మెషీన్ విరాట్ కోహ్లీ రికార్డులను బద్దలు కొడుతూ టీ20ల్లో అత్యంత వేగంగా 12 వేల పరుగుల మైలురాయిని చేరుకున్న ఆటగాడిగా బాబర్ ఆజం నిలిచాడు. పిఎస్ఎల్ (PSL 2026)లో భాగంగా జరిగిన మ్యాచ్‌లో బాబర్ ఆజం సృష్టించిన ఈ వండర్ గురించి ఆసక్తికర విషయాలు తెలుసుకుందాం.

పాకిస్థాన్ సూపర్ లీగ్ (PSL) 2026 సీజన్‌లో పెషావర్ జల్మీ కెప్టెన్ బాబర్ ఆజం ఆగిపోని ఇంజిన్‌లా దూసుకుపోతున్నాడు. ఏప్రిల్ 9న కరాచీ కింగ్స్‌తో జరిగిన మ్యాచ్‌లో బాబర్ కేవలం 51 బంతుల్లో 10 ఫోర్లు, 2 సిక్సర్లతో 87 పరుగులు చేసి అజేయంగా నిలిచాడు. తనతో పాటు కుశాల్ మెండిస్ (109) కూడా రెచ్చిపోవడంతో పెషావర్ జల్మీ నిర్ణీత 20 ఓవర్లలో 246 పరుగుల భారీ స్కోరు సాధించింది. ఈ భారీ లక్ష్య ఛేదనలో కరాచీ కింగ్స్ కేవలం 87 పరుగులకే కుప్పకూలిపోవడంతో, బాబర్ సేన 159 పరుగుల భారీ తేడాతో విజయం సాధించి పాయింట్ల పట్టికలో రెండో స్థానానికి చేరింది.

ఈ మ్యాచ్‌కు ముందు బాబర్ 12 వేల టీ20 పరుగుల మైలురాయిని చేరుకోవడానికి కేవలం 13 పరుగుల దూరంలో ఉన్నాడు. ఇన్నింగ్స్ నాలుగో ఓవర్లోనే ఆ మైలురాయిని దాటి ప్రపంచ రికార్డును తన ఖాతాలో వేసుకున్నాడు. బాబర్ కేవలం 338 ఇన్నింగ్స్‌ల్లోనే ఈ ఘనత సాధించగా.. అంతకుముందు క్రిస్ గేల్ 343 ఇన్నింగ్స్‌ల్లో, విరాట్ కోహ్లీ 360 ఇన్నింగ్స్‌ల్లో ఈ మైలురాయిని చేరుకున్నారు. అంటే గేల్ కంటే 5 ఇన్నింగ్స్‌లు, కోహ్లీ కంటే ఏకంగా 22 ఇన్నింగ్స్‌ల ముందే బాబర్ ఈ ఫీట్ సాధించడం విశేషం.

గత మ్యాచ్‌లో హైదరాబాద్ కింగ్స్‌మెన్‌తో జరిగిన పోరులో మ్యాచ్ ఫినిష్ చేయలేకపోయావంటూ బాబర్ తీవ్ర విమర్శలు ఎదుర్కొన్నాడు. దీనిపై ప్రెస్ కాన్ఫరెన్స్‌లో విలేకరులు ప్రశ్నించగా బాబర్ అసహనం వ్యక్తం చేశాడు. “ఇకనైనా ఈ పోలికలు ఆపండి.. మీ అభిప్రాయాలను మీ దగ్గరే ఉంచుకోండి. నేను మ్యాచ్‌లు ఫినిష్ చేయలేననేది మీ అపోహ మాత్రమే” అంటూ ఘాటుగా సమాధానమిచ్చాడు. అన్నట్లుగానే తర్వాతి మ్యాచ్‌లోనే అజేయమైన ఇన్నింగ్స్‌తో జట్టును గెలిపించి విమర్శకుల నోళ్లు మూయించాడు.

టీ20 క్రికెట్‌లో అత్యంత వేగంగా 12 వేల పరుగులు చేసిన టాప్ 5 బ్యాటర్లు (ఇన్నింగ్స్‌ల వారీగా):

మొదటి స్థానం: బాబర్ ఆజం (పాకిస్థాన్) – కేవలం 338 ఇన్నింగ్స్‌ల్లో ఈ ఘనత సాధించి ప్రపంచ రికార్డు సృష్టించాడు.

రెండో స్థానం: క్రిస్ గేల్ (వెస్టిండీస్) – యూనివర్సల్ బాస్ 343 ఇన్నింగ్స్‌ల్లో ఈ మార్కును దాటి సుదీర్ఘకాలం అగ్రస్థానంలో ఉన్నాడు.

మూడో స్థానం: విరాట్ కోహ్లీ (భారత్) – రన్ మెషీన్ కోహ్లీ 360 ఇన్నింగ్స్‌ల్లో ఈ మైలురాయిని అందుకుని మూడో స్థానంలో నిలిచాడు.

నాలుగో స్థానం: డేవిడ్ వార్నర్ (ఆస్ట్రేలియా) – ఈ కంగారూ వీరుడు 368 ఇన్నింగ్స్‌ల్లో 12 వేల పరుగుల క్లబ్‌లో చేరాడు.

ఐదో స్థానం: జోస్ బట్లర్ (ఇంగ్లాండ్) – ఇంగ్లాండ్ విధ్వంసకర ఓపెనర్ బట్లర్ 405 ఇన్నింగ్స్‌ల్లో ఈ ఫీట్ సాధించాడు.

మరిన్ని క్రీడా వార్తల కోసం ఇక్కడ క్లిక్ చేయండి..