Ashwin: రోహిత్, కోహ్లీలకు సైలెంట్ గా సెటైర్ విసిరిన ఆష్ అన్న! ఇప్పటికైనా మీరు.. అంటూ ఘాటు వ్యాఖ్యలు
భారత క్రికెట్లో "సూపర్ స్టార్" కల్చర్ అనవసరమని రవిచంద్రన్ అశ్విన్ సంచలన వ్యాఖ్యలు చేశాడు. ఆటగాళ్లు జట్టు విజయాన్ని ముఖ్యం చేసుకోవాలని, సెలబ్రిటీ క్రేజ్ తగ్గాలని సూచించాడు. ఛాంపియన్స్ ట్రోఫీ 2025 కోసం భారత జట్టులో ఐదుగురు స్పిన్నర్ల ఎంపికపై ఆందోళన వ్యక్తం చేశాడు. అశ్విన్ వ్యాఖ్యలు భారత క్రికెట్లో కొత్త చర్చకు దారితీస్తూ, జట్టు సమతుల్యతపై కొత్త కోణాన్ని తీసుకొచ్చాయి.
భారత క్రికెట్లో “సూపర్ స్టార్” సంస్కృతి కొనసాగడం పట్ల మాజీ క్రికెటర్ రవిచంద్రన్ అశ్విన్ అసంతృప్తి వ్యక్తం చేశాడు. మేము క్రికెటర్లమే అని నటులమో లేదా సూపర్ స్టార్లము కాదని స్పష్టంగా వ్యాఖ్యానించాడు. రోహిత్ శర్మ, విరాట్ కోహ్లీ వంటి ఆటగాళ్లను ఉటంకిస్తూ, క్రికెటర్లు వ్యక్తిగత రికార్డుల కన్నా జట్టు విజయాన్ని ముఖ్యం చేసుకోవాలని సూచించాడు.
గత డిసెంబర్లో అంతర్జాతీయ క్రికెట్కు వీడ్కోలు పలికిన అశ్విన్, అప్పటి నుంచి యూట్యూబ్లో చురుగ్గా మారాడు. ‘ఆష్ కి బాత్’ అనే తన యూట్యూబ్ ఛానెల్లో భారత క్రికెట్ జట్టులో సెలబ్రిటీ కల్చర్ పెరుగుతున్నట్లు ఆందోళన వ్యక్తం చేశాడు.
“భారత క్రికెట్లో అన్ని విషయాలను సాధారణంగా తీసుకోవడం చాలా ముఖ్యం. మనం ఆటగాళ్లను ‘సూపర్ సెలబ్రిటీలుగా’ మార్చకూడదు. క్రికెట్ ఆట మాత్రమే కాదు, అది దేశం కోసం పోరాడే ఆటగాళ్ల గౌరవం కూడా. కాబట్టి, ఆటగాళ్లు సామాన్య ప్రేక్షకులకు సమానంగా ఉండాలి” అని ఆయన అన్నాడు.
అశ్విన్ తన వ్యాఖ్యలలో రోహిత్ శర్మ, విరాట్ కోహ్లీ పేర్లను ప్రస్తావిస్తూ, “వారు ఇప్పటికే ఎన్నో విజయాలు సాధించారు. ఇప్పుడు, ప్రతి సెంచరీ లేదా వ్యక్తిగత రికార్డు అంత ముఖ్యమైనది కాదు. జట్టు విజయం చాలా ముఖ్యం. అందరూ ఈ విషయాన్ని గుర్తుంచుకోవాలి” అని తెలిపాడు.
ఛాంపియన్స్ ట్రోఫీ 2025 కోసం భారత జట్టును ప్రకటించిన తర్వాత, భారత జట్టులో ఐదుగురు స్పిన్నర్ల ఎంపికపై అశ్విన్ కొంత ఆందోళన వ్యక్తం చేశాడు. “దుబాయ్ పిచ్లు స్పిన్నర్లకు అనుకూలమవుతాయా? మనం ఐదుగురు స్పిన్నర్లను ఎందుకు ఎంపిక చేసుకున్నాం? హార్దిక్ పాండ్యాతో పాటు ఇద్దరు ఎడమచేతి వాటం స్పిన్నర్లు ఉండడం సరైన వ్యూహమా?” అంటూ ప్రశ్నించాడు.
భారత స్పిన్ విభాగంలో అక్షర్ పటేల్, రవీంద్ర జడేజా, వాషింగ్టన్ సుందర్, కుల్దీప్ యాదవ్, వరుణ్ చక్రవర్తి ఉన్నా, జట్టులో ఫాస్ట్ బౌలర్లకు తగిన ప్రాధాన్యం కల్పించాలనే అభిప్రాయాన్ని వ్యక్తం చేశాడు. “ఒక స్పిన్నర్ను త్యాగం చేసి, మూడో ఫాస్ట్ బౌలర్ను జట్టులో చేర్చితే మంచి బ్యాలెన్స్ ఉంటుంది” అని సూచించాడు.
భారత జట్టుతో పాటూ సహాయక సిబ్బంది ఛాంపియన్స్ ట్రోఫీ కోసం దుబాయ్కు శనివారం బయలుదేరారు. ఫిబ్రవరి 19న బంగ్లాదేశ్తో తొలి మ్యాచ్ జరగనుంది. ఆసక్తికరమైన విషయం ఏమిటంటే, పాకిస్తాన్ ఆతిథ్య జట్టుగా ఉన్నప్పటికీ, భారత జట్టు దుబాయ్లో తమ మ్యాచ్లు ఆడాలని నిర్ణయించుకుంది.
అశ్విన్ చేసిన వ్యాఖ్యలు భారత క్రికెట్లో కొత్త చర్చకు దారితీశాయి. క్రికెటర్లు ‘సూపర్ స్టార్’లుగా కాకుండా, జట్టు విజయాన్ని ప్రధానంగా చూడాలన్న ఆయన అభిప్రాయం ఎంతవరకు ప్రాముఖ్యం పొందుతుందో చూడాలి. ఛాంపియన్స్ ట్రోఫీలో భారత జట్టు ఎలా ప్రదర్శిస్తుందో ఆసక్తిగా ఎదురుచూద్దాం!
మరిన్ని క్రీడా వార్తల కోసం ఇక్కడ క్లిక్ చేయండి..