Andhra Pradesh: అద్భుతం.. సీతారాముల కళ్యాణానికి అతిధిగా వచ్చిన గరుడపక్షి..!

Andhra Pradesh: ఆంధ్రప్రదేశ్‌‌లోని బాపట్ల జిల్లాలో గల ప్రముఖ వైష్ణవ క్షేత్రమైన చదలవాడ రఘునాయక స్వామి వారి కళ్యాణ మహోత్సవం అంగరంగ వైభవంగా నిర్వహించారు. జిల్లాలోని నాగులుప్పలపాడు మండలం చదలవాడ గ్రామంలో అగస్త్య మహాముని ప్రతిష్టించిన ఈ దేవాలయానికి ఎంతో చారిత్రాత్మక ప్రాధాన్యత ఉంది. అయితే ప్రతి ఏటా చైత్ర శుద్ధ దశమి నుంచి 16 రోజుల పాటు ఈ దేవాలయంలో కళ్యాణ మహోత్సవాలను వైభవంగా నిర్వహిస్తారు. ఈ కళ్యాణ వేడకల్లో ఒక ప్రత్యేకత ఉంది. అదే, స్వామివారి కళ్యాణం రోజున స్వామివారికి తలంబ్రాలు పోసే సమయంలో ఒక గరుడపక్షి వచ్చి ఆలయంపై మూడు ప్రదిక్షణలు చేసి వెళుతుంది. ప్రతి ఏడాదిలాగే ఈసారి కూడా ఓ గరుడ పక్షి ఆకాశంలో చక్కర్లు కొట్టింది.

కళ్యాణ క్రతువును ప్రారంభించిన సమయంలో ఎప్పటిలాగానే ఈ ఏడాది కూడా స్వామి వారికి తలంబ్రాలు పోసే సమయంలో గరుడపక్షి వచ్చి ఆలయంపై మూడు ప్రదక్షిణలు చేసి వెళ్లింది. భక్తులు గరుడపక్షిని చూసి భక్తితో మైమరచిపోయారు. జై శ్రీరామ్‌ అంటూ నినాదాలు చేశారు. కన్నులపండువగా నిర్వహించిన ఈ కళ్యాణ వేడకుల్లో స్వామి వారికి సంతనూతలపాడు ఎమ్మెల్యే సుధాకర్‌బాబు పట్టువస్త్రాలు సమర్పించారు. ఈ కళ్యాణ వేడుకల్లో పెద్ద సంఖ్యలో భక్తులు పాల్గొన్నారు.

ఇక ఈ దేవాలయానికి ఎంతో చారిత్రాత్మక ప్రాధాన్యత ఉంది. సీతాదేవిని రావణాసురుడు అపహరించిన సమయంలో ఆమెను వెతుక్కుంటూ శ్రీరాముడు ఈ ప్రాంతానికి వచ్చాడని చెబుతారు. ఇక్కడ తనకు సహాయ సహకారాలు అందించిన వానర సైన్యాన్ని నాలుగు భాగాలుగా విభజించి నాలుగు దిక్కులకు పంపారని, అందువల్లే ఈ గ్రామానికి చాతుర్వాటిక అనే పేరు వచ్చిందని స్థానిక పూజారులు తెలిపారు.

Also read:

Soil Auction: గుప్పెడు మట్టికి రూ. 3.85 కోట్లు.. ఆ మట్టి స్పెషల్ ఏంటో తెలిస్తే నోరెళ్లబెడతారు..

Tollywood Drugs Case: టాలీవుడ్‌ను వీడేదేలే అంటున్న ‘మత్తు’.. డ్రగ్స్ పోయి గంజాయ్ వచ్చే..

Big Shock: అమ్మాయిల వైపు అదే పనిగా చూస్తున్నారా? అయితే, ఈ వార్తపై కూడా ఓ లుక్కేయండి..!