వినాయక చవితి

వినాయక చవితిని గణేష్ చతుర్థి లేదా వినాయక చతుర్థి అని కూడా అంటారు. కైలాస పర్వతం నుండి గణేశుడు తన తల్లి పార్వతీదేవితో కలిసి భూమికి వచ్చిన సందర్భంగా జరుపుకునే హిందూ పండుగ ఇది. ఈ పండుగలో భాగంగా మట్టి వినాయక విగ్రహాలను ఇళ్లు, బహిరంగ ప్రదేశాల్లో ప్రతిష్టించి ప్రత్యేక పూజలు నిర్వహిస్తారు. నవరాత్రి పూజల తర్వాత అనంత చతుర్దశి పదో రోజున వినాయకుని విగ్రహాన్ని నిమజ్జనం చేస్తారు. ఈ ఏడాది ఆగస్టు 27వ తేదీ బుధవారం వినాయక చవితి పండుగను జరుపుకోనున్నారు.

గణేశ చతుర్థి పూజ సమయంలో గణేశుడికి మోదకం, లడ్డూ నైవేద్యంగా పెడతారు. గణేశుడికి ఇవి అంటే చాలా ఇష్టం అని నమ్ముతారు. భక్తి శ్రద్ధలతో పూజా కార్యక్రమాలు నిర్వహిస్తారు. వినాయక చవితి రోజు భక్తులు ఉపవాసం ఉంటారు. పది రోజులు ప్రత్యేక పూజల తర్వాత గణపయ్య విగ్రహాలకు బహిరంగ ఊరేగింపుతో నది, సముద్రం లేదా సమీపంలోని జలాశయాల వద్ద అత్యంత కోలాహలంగా నిమజ్జనం నిర్వహిస్తారు. హైదరాబాద్‌లో హుస్సేన్ సాగర్‌తో పాటు ఇతర జలాశయాల్లో భారీ గణనాథుల విగ్రహాల నిమజ్జనం నిర్వహించడం సాంప్రదాయంగా వస్తోంది.