Sankranti 2023: పండుగ ఒక్కటే కానీ పద్ధతులు అనేకం.. అదే సంక్రాంతి.. దీని విశేషాలేమిటో తెలుసుకుందాం రండి..

సంక్రాంతి పండుగ అంటేనే కొత్త వెలుగులు. పండుగ రాకముందు నుంచే చిన్న పిల్లలు వీధివీధిలో గాలిపటాలతో అలరిస్తుంటారు. ఇక సూర్యభగవానుడు ధనుస్సు రాశిని వదిలి మకరరాశిలోకి ప్రవేశించినప్పుడు మకర సంక్రాంతి..

Sankranti Festival

శివలీల గోపి తుల్వా |
Updated on: Jan 05, 2023 | 5:41 PM

సంక్రాంతి పండుగ అంటేనే కొత్త వెలుగులు. పండుగ రాకముందు నుంచే చిన్న పిల్లలు వీధివీధిలో గాలిపటాలతో అలరిస్తుంటారు. ఇంకా చెప్పుకోవాలంటే భారతదేశం అంటేనే పండుగల దేశం. ఇక్కడ ప్రతి రోజూ ఏదో ఒక పేరుతో పండుగలు జరుగుతూనే ఉంటాయి. ఈ క్రమంలోనే సూర్యభగవానుడు ధనుస్సు రాశిని వదిలి మకరరాశిలోకి ప్రవేశించినప్పుడు మకర సంక్రాంతి జరుపుకుంటారు. మకర సంక్రాంతి పండుగ దాదాపుగా జనవరి నెలలోనే వస్తుంది. ప్రతి ఏటా సూర్యుడు వరుసగా 12 రాశులలోనూ సంచరిస్తాడు. ఈ క్రమంలోనే సూర్యుడు మకరరాశిలోకి ప్రవేశించే రోజును మనం మకర సంక్రాంతిగా జరుపుకుంటాం. అలాగే భగీరథుడు గంగను భూలోకానికి తీసుకువచ్చి.. సాగరులకు శాప విమోచనం చేయించింది ఈ రోజే అని శాస్త్రాలు చెబుతున్నాయి కూడా. మకర సంక్రాంతి రోజున పుణ్యనదులలో స్నానం చేసి నువ్వులు, బెల్లం, చెరకు, శెనగపప్పు, నువ్వుల లడ్డూ, బియ్యం, కూరగాయలు, పప్పులు దానం చేసే సంప్రదాయం కూడా ఉంది.

అయితే మన దేశంలో అనేక ఆచారాలు, సాంప్రదాయాలను పాటించే ప్రజలు ఉన్నారు. వీటిని కాపాడుకుంటూనే ఆయా ప్రజలు తమ తమ పండుగలను చేసుకుంటారు. ఇదే క్రమంలో మకర సంక్రాంతి పండుగను కూడా దేశవ్యాప్తంగా ఉన్న వివిధ ఆచారాలను పాటించే ప్రజలు.. వివిధ పేర్లతో జరుపుకుంటారు. కొన్ని ప్రాంతాలలో మకర సంక్రాంతిని లోహ్రీ అని అంటే మరి కొన్ని ప్రాంతాలలో దీనినే మాఘీ అంటారు. ఈ జనవరి 14న జరుపుకునే ఈ సంక్రాంతిని ఏ రాష్ట్రంలో ఏ పేరుతో జరుపుకుంటారో ఇప్పుడు తెలుసుకుందాం..

మాఘీ ఆచారం (Maghi): మకర సంక్రాంతిని మాఘి అని కూడా అంటారు. ముఖ్యంగా తూర్పు ఉత్తరప్రదేశ్, బీహార్, జార్ఖండ్‌లలో ఖిచ్డీని మకర సంక్రాంతి రోజున తయారు చేసి తింటారు. అందుకే దీనిని ఖిచ్డీ పండుగ అని కూడా అంటారు. గోరఖ్‌పూర్‌లోని గోరఖ్‌నాథ్ ఆలయానికి మకర సంక్రాంతి నాడు కిచ్డీని సమర్పించే సంప్రదాయం ఉంది. మాఘీ రోజు నుంచి ప్రయాగ్‌రాజ్‌లో మాఘమేళా ప్రారంభమవుతుంది.
పుష్య సంక్రాంతి (Pushya Sankranti): పశ్చిమ బెంగాల్‌లో మకర సంక్రాంతిని పుష్య సంక్రాంతి అంటారు. సూర్యుడు మకరరాశిలోకి ప్రవేశించడం పుష్య మాసంలోనే జరగడంతో ఇది పుష్య సంక్రాంతిగా ప్రసిద్ధి చెందింది. పుష్య సంక్రాంతి రోజున స్నానం చేసిన తర్వాత నల్ల నువ్వులను దానం చేస్తారు. సంవత్సరానికి ఒకసారి వచ్చే మకర సంక్రాంతి రోజున గంగా నదిలో స్నానం చేయడం అనేది కొందరు బెంగాలీలకు ఆచారంగా ఉంది. మకర సంక్రాంతి రోజున ప్రజలు గంగా నదికి వెళ్లి స్నానం చేస్తుంటారు.
ఉత్తరాయణ పండుగ (Uttarayana): గుజరాత్‌లో మకర సంక్రాంతిని ఉత్తరాయణ పండుగగా జరుపుకుంటారు. ఈ సందర్భంగా గాలిపటాలను ఎగురవేస్తారు గుజరాతీలు. ఈ పండుగలో పాల్గొనేందుకు ప్రపంచం నలుమూలల నుంచి ప్రజలు గుజరాత్‌కు వస్తుంటారు. ఉత్తరాయణం నాడు స్నానం చేసి ఉపవాసం ఉండాలనే నియమం గుజరాతీలకు ఆచారంగా ఉంది.
మకర సంక్రమణం (Makara Sankramana): కర్ణాటకలో మకర సంక్రమన్‌గా జరుపుకునే ఈ పండుగ రోజు స్నానం చేసి దానం చేసే సంప్రదాయం కన్నడీగులకు ఉంది. సూర్యుడు ఒక రాశి నుంచి మరొక రాశిలోకి ప్రవేశించే సంచార కాలం కావడంతో దానిని సంక్రమణ లేదా రవాణ అంటారు.
బిహు (Bihu): అస్సాంలో మకర సంక్రాంతి రోజున బిహు జరుపుకుంటారు. ఈ రోజున ప్రజలు కొత్త పంటలు ధాన్యాలతో సంబరాలు చేసుకుంటారు. ఈ సందర్భంగా పలు రకాల వంటకాలను తయారుచేస్తారు అస్సామీలు.
పొంగల్(Ponagal): తమిళనాడులో మకర సంక్రాంతి మాదిరిగానే పొంగల్ జరుపుకుంటారు. ఈ రోజున సూర్య భగవానుడికి ఖీర్ లేదా పొంగల్ సమర్పిస్తారు తమిళులు.
భోగీ, సంక్రాంతి, కనుమ (Bhogi, Sankranti, Kanuma): ఆంధ్ర, తెలంగాణలో భోగి, మకర సంక్రాంతి, కనుమ అని మూడు రోజులు పండుగ జరుపుకుంటారు. కొత్త పంటలతో రకరకాల పిండి వంటలతో, కొత్త కోడళ్ళు, కొత్త అల్లుళ్లతో సెలబ్రేట్ చేసుకుంటారు తెలుగు ప్రజలు. ఇక్కడ ప్రత్యేకత ఏమిటంటే తెలుగువారు ఈ పండుగ రోజున తమ పశువులను కూడా పూజిస్తారు. ఈ క్రమంలోనే సంక్రాంతి రోజు జరిగే ఎడ్ల పందాలు, కోడి పందేలు చాలా ప్రాచుర్యం పొందాయి.
లోహ్రి(Lohri): పంజాబ్, ఢిల్లీ, హర్యానాతో సహా కొన్ని ఇతర ప్రదేశాలలో లోహ్రీని మకర సంక్రాంతికి ఒక రోజు ముందు జరుపుకుంటారు. కొత్త పంట వచ్చిన సందర్భంగా ఈ పండుగను జరుపుకుంటారు.