స్టాలిన్ మెలిక… ఎవరికెరుక…

కేంద్రంలో మళ్లీ ఎన్డీయే వస్తుందన్న ఎగ్జిట్ పోల్స్ ఫలితాలతో డీఎంకే అధినేత స్టాలిన్ ఆలోచనలో పడ్డారు. నిన్నటి వరకు కాంగ్రెస్ పక్షాన మాట్లాడిన స్టాలిన్… ఇవాళ సంచలన వ్యాఖ్యలు చేశారు. మొన్న కేసీఆర్ ఫెడరల్ టూర్‌లో భాగంగా ఆయన కాంగ్రెస్‌తో ఉంటామని.. వీలైతే మీరు కూడా కాంగ్రెస్‌కి మద్దతు తెల్పండంటూ తేల్చి చెప్పారు. అయితే నిన్న వచ్చిన ఎగ్జిట్ పోల్స్ నేపథ్యంలో… స్టాలిన్ రూట్ మార్చారు. కేంద్రంలో ఏ కూటమిలో చేరే విషయాన్ని ఎన్నికల ఫలితాల తర్వాతే తాము నిర్ణయిస్తామని తెలిపారు. మే 23 సాయంత్రానికి పూర్తి ఫలితాలు వెల్లడవుతాయని.., ఇప్పుడే ఢిల్లీలో యూపీఏ పక్ష పార్టీలతో సమావేశం జరపడం వల్ల ప్రయోజనం ఉండదని అభిప్రాయపడ్డారు. స్టాలిన్ చేసిన ఈ వ్యాఖ్యలు యూపీఏ పక్ష పార్టీల్లో చర్చనీయాంశమైంది.