కేసీఆర్‌ సారూ.. మాకు సపోర్ట్ ఇస్తారా..?

ఓ వైపు తెలంగాణలో అధికార టీఆర్ఎస్, ప్రతిపక్ష కాంగ్రెస్ మధ్య బద్ధ శత్రుత్వం కొనసాగుతున్న నేపథ్యంలో.. కేసీఆర్‌కు ఏపీ కాంగ్రెస్ అధ్యక్షుడు రఘువీరారెడ్డి రాసిన లేఖ రాజకీయాల్లో సంచలనం రేపుతోంది. తమకు మద్దతివ్వాలని కోరుతూ తాజాగా కేసీఆర్‌కు లేఖ రాశారు రఘువీరా. ఏపీకి ప్రత్యేక హోదాకు మద్దతు తెలిపిన కేసీఆర్‌కు ధన్యవాదాలు తెలిపిన రఘువీరా.. కేంద్రంలో కాంగ్రెస్ ప్రభుత్వ ఏర్పాటుకు మద్దతివ్వాలని ఆ లేఖలో పేర్కొన్నారు.

ఏపీకి అన్యాయం చేసిన బీజేపీకి మద్దతు ఇవ్వొద్దని తెలిపిన ఆయన.. కేంద్రంలో తమతో కలిసి ముందుకు రావాలని కోరారు. కాంగ్రెస్ అధికారంలోకి వస్తే ఏపీకి ప్రత్యేక హోదాపైనే తొలి సంతకమన్న రాహుల్ గాంధీ వ్యాఖ్యలను ఈ సందర్భంగా రఘువీరా గుర్తు చేశారు. అయితే ఇదే విషయంలో టీఆర్ఎస్‌తో పాటు టీడీపీ, వైసీపీ, జనసేన పార్టీలు కూడా మద్దతు ఇవ్వాలని రఘువీరా కోరారు.