మళ్లీ ఫైటర్ జెట్ ఎక్కిన వింగ్ కమాండర్ అభినందన్..

భారత వాయుసేనకు చెందిన వింగ్ కమాండరు అభినందన్ వర్ధమాన్ మళ్లీ ఫైటర్ జెట్ ఎక్కాడు. ఆరునెలల విరామం తర్వాత.. బుధవారం ఫైటర్ జెట్ కాక్‌పిట్‌లోకి ప్రవేశించారు. జమ్మూ కశ్మీర్‌లోని సైనిక స్థావరాలపై దాడులకు ప్రయత్నించిన పాకిస్తాన్ వైమానిక దళాన్ని తిప్పికొట్టే క్రమంలో భారతవాయుసేనకు చెందిన అభినందన్ నడిపిన మిగ్-21 యుద్ధవిమానం ఫిబ్రవరి 27న పాక్ భూభాగంలో కూలిపోయింది. వెంటనే ప్యారాచూట్ సహాయంతో కిందకు దూకిన అభినందన్.. పాక్ భూభాగంలో కాలు మోపాడు. దీంతో అభినందన్‌ను పాకిస్థాన్ అధికారులు అదుపులోకి తీసుకున్నారు. అనంతరం మూడు రోజుల తర్వాత విడుదల చేశారు. అయితే తీవ్రగాయాల పాలైన అభినందన్‌ వైద్యచికిత్స చేయించుకొని ఇటీవలే విధుల్లో చేరారు. ప్రస్తుతం రాజస్థాన్‌లోని వాయుసేన కేంద్రంలో అభినందన్ విధులు నిర్వర్తిస్తున్నాడు. పాక్ విమానాలను తిప్పి కొట్టి అత్యంత ధైర్య సాహసాలను ప్రదర్శించిన అభినందన్‌కు ఇటీవల భారత ప్రభుత్వం వీరచక్ర అవార్డుతో సత్కరించింది. భారతవాయుసేనకు చెందిన బెంగళూరులోని ఇన్‌స్టిట్యూట్ ఆఫ్ ఏరోస్పేస్ మెడిసిన్ అభినందన్‌ను మూడు వారాల క్రితం పరీక్షించి అతను యుద్ధవిమానం నడపవచ్చని ప్రకటించింది.