రిషికేశ్‌లో తప్పిన భారీ రైలు ప్రమాదం.. పట్టాలు తప్పిన ఉజ్జయిని ఎక్స్‌ప్రెస్ బోగీలు!

ఉత్తరాఖండ్‌లోని పవిత్ర పుణ్యక్షేత్రం రిషికేశ్‌లో సోమవారం (మే 18) రాత్రి పెను రైలు ప్రమాదం తృటిలో తప్పింది. యోగనగరి రైల్వే స్టేషన్ సమీపంలో జరిగిన ఈ ఘటన స్థానికులను భయాందోళనలకు గురిచేసింది. షంటింగ్ పనుల సమయంలో ఉజ్జయిని ఎక్స్‌ప్రెస్‌కు చెందిన ఇంజన్, మరికొన్ని బోగీలు పట్టాలు తప్పడంతో ఒక్కసారిగా కలకలం రేగింది.

మంగళవారం ప్రయాణం కోసం సిద్ధం చేయాల్సిన ఉజ్జయిని ఎక్స్‌ప్రెస్ రైలును సోమవారం రాత్రి లోకో పైలట్ షంటింగ్ చేస్తున్నారు. ఈ క్రమంలో రైలును యార్డ్ వైపు మళ్లించి ట్రాక్ మారుస్తుండగా, ఖండ్ గ్రామం సమీపంలో ఊహించని ప్రమాదం జరిగింది. రైలు అదుపుతప్పి పట్టాలు తప్పడమే కాకుండా, ఒక బోగీ వేగంగా వెళ్లి రైల్వే స్తంభాన్ని బలంగా ఢీకొట్టింది. ఈ ధాటికి ఆ స్తంభం పూర్తిగా ధ్వంసమైంది. ప్రమాదం జరిగిన సమయంలో పెద్ద శబ్దం రావడంతో చుట్టుపక్కల ప్రాంతాలు ఒక్కసారిగా కంపించాయి. ఏం జరుగుతుందో అర్థం కాక సమీపంలోని గ్రామస్థులు భారీ సంఖ్యలో ఘటనా స్థలానికి పరుగులు తీశారు.

ఈ ప్రమాదంలో అత్యంత ఊరటనిచ్చే విషయం ఏమిటంటే, ఆ సమయంలో రైలు పూర్తిగా ఖాళీగా ఉంది. కేవలం మెయింటెనెన్స్ కోసం రైలును షంటింగ్ చేస్తుండటంతో ప్రయాణికులు ఎవరూ లేరు. ఒకవేళ ఇదే ఘటన ప్రయాణికులతో నిండి ఉన్న సమయంలో జరిగి ఉంటే, పరిస్థితి ఊహకందని విధంగా అత్యంత దారుణంగా ఉండేదని అధికారులు భావిస్తున్నారు.

సమాచారం అందిన వెంటనే స్థానిక పోలీసులు, జీఆర్‌పీ, ఆర్‌పీఎఫ్ బృందాలు అక్కడకు చేరుకున్నాయి. భారీగా తరలివచ్చిన జనసమూహాన్ని నియంత్రించి, సహాయక చర్యలను పర్యవేక్షించాయి. సీనియర్ రైల్వే అధికారులు మరియు ఇంజనీర్ల బృందం కూడా వెంటనే చేరుకుని, పరిస్థితిని సమీక్షించారు. “బ్రేక్ వ్యవస్థలో తలెత్తిన సాంకేతిక లోపం వల్ల రైలు అదుపు తప్పినట్లు ప్రాథమికంగా భావిస్తున్నాం. లోకో పైలట్ అజాగ్రత్త కూడా ఉండవచ్చు. దీనిపై పూర్తిస్థాయి విచారణకు ఆదేశించాం,” అని జీఆర్‌పీ ఎస్పీ అరుణా భారతి వెల్లడించారు.

పట్టాలు తప్పిన ఇంజన్, బోగీలను తిరిగి ట్రాక్‌పైకి తెచ్చేందుకు సాంకేతిక బృందాలు రాత్రంతా శ్రమించాయి. దెబ్బతిన్న బోగీలను ప్రధాన రైలు నుండి వేరు చేశారని సీనియర్ కమర్షియల్ మేనేజర్ మహేష్ యాదవ్ తెలిపారు. ఈ ప్రమాదం ప్రధాన లైన్‌లో కాకుండా యార్డ్ సమీపంలోని ట్రాక్‌పై జరగడంతో, రిషికేశ్ వచ్చే ఇతర రైళ్ల రాకపోకలకు ఎటువంటి ఆటంకం కలగలేదు. అన్ని రైలు సర్వీసులు షెడ్యూల్ ప్రకారం యథావిధిగా నడుస్తున్నాయి.

ఈ ఘటన ప్రాణనష్టం కలిగించకపోయినా, రైల్వే భద్రతా వ్యవస్థలపై అనేక ప్రశ్నలను లేవనెత్తింది. నిత్యం వేలాది మంది భక్తులు వచ్చే రిషికేశ్ వంటి ప్రాంతంలో ఇలాంటి సాంకేతిక లోపాలు తలెత్తడం భద్రతా వైఫల్యమేనా?, షంటింగ్ సమయంలో పాటించాల్సిన జాగ్రత్తలను విస్మరించారా? అనే అనుమానాలు కలుగుతున్నాయి. ఏది ఏమైనా, ఒక పెను విపత్తు తృటిలో తప్పడంతో అందరూ ఊపిరి పీల్చుకున్నారు. దర్యాప్తు కమిటీ నివేదిక వచ్చిన తర్వాతే అసలు కారణాలు పూర్తిస్థాయిలో వెలుగులోకి రానున్నాయి.

మరిన్ని జాతీయ వార్తల కోసం ఇక్కడ క్లిక్ చేయండి..