వాడిన మాస్క్, గ్లోవ్స్ని ఎలా పడేయాలంటే
కరోనా వైరస్ సోకకుండా ఉండేందుకు ముఖానికి మాస్క్, చేతికి గ్లౌజ్లు ధరించడం మంచిదని నిపుణులు హెచ్చరిస్తోన్న విషయం తెలిసిందే.
Updated on: Jul 24, 2020 | 9:33 AM
కరోనా వైరస్ సోకకుండా ఉండేందుకు ముఖానికి మాస్క్, చేతికి గ్లోవ్స్ ధరించడం మంచిదని నిపుణులు హెచ్చరిస్తోన్న విషయం తెలిసిందే. అయితే ఆ మాస్క్లు, గ్లౌజ్లను వాడే విషయంలో చాలా జాగ్రత్తలు తీసుకోవాలి. అలాగే వాడిన తరువాత వాటిని పడేసేటప్పుడు కూడా పలు జాగ్రత్తలు పాటించాలి. ఈ నేపథ్యంలో మాస్క్, గ్లోవ్స్లను వాడిన తరువాత పడేసే విషయంపై కేంద్ర కాలుష్య నియంత్రణ మండలి కొన్ని మార్గదర్శకాలు విడుదల చేసింది.
ఇంట్లో మాస్క్లు, గ్లోవ్స్లను వాడిన తరువాత, వాటిని ముక్కలుగా కత్తిరించి కనీసం 72 గంటల పాటు పేపర్ బ్యాగ్లో ఉంచి ఆ తరువాత మాత్రమే పారేయాలని కేంద్ర కాలుష్య నియంత్రణ మండలి తెలిపింది. వాణిజ్య సంస్థలు, షాపింగ్ మాల్స్, కార్యాలయాలు, సంస్థల్లో సాధారణ జనం వీటిని వాడిన తరువాత ప్రత్యేక బిన్లో మూడు రోజుల పాటు ఉంచి, ఆ తరువాత మామూలు డస్ట్బిన్లో వేయొచ్చని వెల్లడించింది. ఇక బయో మెడికల్ వేస్ట్ని పసుపురంగు బ్యాగుల్లో వేయాలని, ఈ పసుపు రంగు బ్యాగులను సాధారణ చెత్త కోసం వాడరాదని పేర్కొంది. అలాగే కరోనా రోగులు వాడిన ఖాళీ వాటర్ బాటిల్స్, మిగిలిపోయిన ఆహారాన్ని సాధారణ చెత్తతో పాటే వేయొచ్చని తాజా మార్గదర్శకాల్లో పేర్కొన్నారు.
