పాము కాటుతో చనిపోయిన మహిళ.. మూడేళ్ళ తర్వాత బయటపడ్డ నిజం..!

మహారాష్ట్రలో ఒక షాకింగ్ కేసు వెలుగులోకి వచ్చింది. దాదాపు మూడు సంవత్సరాల క్రితం జరిగిన ఒక మహిళ మరణం మిస్టరీని పోలీసులు ఛేదించారు. ఆమె భర్తతో సహా నలుగురిని పోలీసులు అరెస్టు చేశారు. ఇది సాధారణ హత్య కాదని, ఆ మహిళను విషపూరిత పాము కాటు వేయించి హత్య చేసినట్లు పోలీసులు గుర్తించారు. ఈ దారుణ ఘటన థానే జిల్లాలోని బద్లాపూర్‌లో చోటు చేసుకుంది.

ఈ సంఘటన జూలై 10, 2022న బద్లాపూర్ తూర్పులోని ఉజ్వల్‌దీప్ సొసైటీలో జరిగింది. నీర్జా రూపేష్ అంబేకర్ అనే మహిళ తన ఇంట్లో మరణించారు. మొదట్లో పోలీసులు ప్రమాదవశాత్తు మరణంగా కేసు నమోదు చేశారు. ఆ సమయంలో దర్యాప్తులో ఎటువంటి అనుమానాలు తలెత్తలేదు. కానీ తరువాత, కొంతమంది సాక్షుల వాంగ్మూలాలలో వైరుధ్యాలు బయటపడటంతో, పోలీసులు కేసును తిరిగి దర్యాప్తు చేయాల్సి వచ్చింది. విస్తృత దర్యాప్తు, సాంకేతిక పరీక్షలో దిగ్భ్రాంతికరమైన విషయం వెల్లడైంది.

మృతురాలి భర్త, 40 ఏళ్ల రూపేష్ అంబేకర్, తన భార్య నీర్జాతో నిత్యం గొడవ పడేవాడని పోలీసులు గుర్తించారు. ఈ వివాదాలతో విసిగిపోయిన రూపేష్, నీర్జాను అంతమొందించడానికి ప్రమాదకరమైన కుట్ర పన్నాడు. రూపేష్ ఇద్దరు స్నేహితులు, రిషికేశ్ రమేష్ చల్కే, 25 ఏళ్ల కునాల్ విశ్వనాథ్ చౌదరి కూడా ఈ కుట్రలో పాలుపంచుకున్నారు. తమ ప్రణాళికను అమలు చేయడానికి నిందితులు చేతన్ విజయ్ దుధానే (36) అనే పాముల రక్షణ వాలంటీర్‌ను సంప్రదించారని పోలీసులు వెల్లడించారు. దుధానే వారికి విషపూరితమైన పామును అందించాడు. కుట్రదారులు ఆ పామును ఉపయోగించి నీర్జాను కాటేయించారని పోలీసులు నిర్ధారించారు. ఫలితంగా ఆమె మరణించింది. పాము కాటును ప్రజలు ప్రమాదంగా భావించి చట్టం నుండి సులభంగా తప్పించుకుంటారని నిందితులు భావించారు.

అయితే, పోలీసుల అప్రమత్తత, ఖచ్చితమైన సాంకేతిక దర్యాప్తు వారి భ్రమలను పటాపంచలు చేశాయి. ఈ సంఘటన జరిగిన దాదాపు మూడు సంవత్సరాల తరువాత, పోలీసులు హత్య కేసు నమోదు చేసి, నలుగురు నిందితులను అరెస్టు చేశారు. ఈ సంచలనాత్మక కేసు దర్యాప్తు ఇంకా కొనసాగుతోందని, అరెస్టు చేసిన నిందితులందరినీ క్షుణ్ణంగా విచారిస్తున్నామని సీనియర్ ఇన్‌స్పెక్టర్ నితిన్ పాటిల్ తెలిపారు.

మరిన్ని క్రైమ్ వార్తల కోసం ఇక్కడ క్లిక్ చేయండి..