నిండు సభలో మంత్రిని నిలదీసిన సొంత పార్టీ ఎమ్మెల్యే, జానపద గాయని మైథిలి ఠాకూర్

బీహార్ శాసనసభ బడ్జెట్ సమావేశంలో ప్రభుత్వ ఆసుపత్రుల దయనీయ పరిస్థితి మరోసారి చర్చనీయాంశంగా మారింది. ఈసారి, యువ ఎమ్మెల్యే, ప్రఖ్యాత జానపద గాయని మైథిలి ఠాకూర్ ఈ అంశాన్ని చాలా బలంగా లేవనెత్తారు. ప్రశ్నోత్తరాల సమయంలో, ఆమె తన నియోజకవర్గంలోని ఆసుపత్రి శిథిలావస్థను ఉదహరించారు. ప్రభుత్వం లిఖితపూర్వక ప్రతిస్పందనను పూర్తిగా తిరస్కరించారు. కాగితంపై పరిస్థితి బాగానే ఉన్నట్లు కనిపించినప్పటికీ, క్షేత్రస్థాయిలో వాస్తవికత పూర్తిగా భిన్నంగా ఉందని ఆమె అన్నారు.

తన నియోజకవర్గంలోని ఆసుపత్రి భవనం చాలా శిథిలావస్థకు చేరుకుందని, ఏ క్షణంలోనైనా పెద్ద ప్రమాదం జరగవచ్చని మైథిలి ఠాకూర్ వివరించారు. పైకప్పు నుండి ప్లాస్టర్ నిరంతరం పడిపోతుందని, గోడలకు పగుళ్లు ఉంటాయని, వర్షాకాలంలో వార్డుల్లోకి నీరు లీక్ అవుతుందని ఆమె అన్నారు. అయినప్పటికీ, రోగులకు అక్కడే చికిత్స అందిస్తున్నారు, గర్భిణీ స్త్రీలను చేర్చుకుంటున్నారు. పిల్లలను అక్కడే ఉంచుతున్నారు. ఇది ప్రజల ప్రాణాలకు ముప్పు అని ఆమె ప్రభుత్వం దృష్టికి తీసుకువచ్చారు.

ప్రభుత్వం లిఖిపూర్వక ప్రతిస్పందనపై తన అసంతృప్తిని వ్యక్తం చేస్తూ, మైథిలి ఠాకూర్ స్పష్టంగా పేర్కొంది, “ఈ ప్రతిస్పందనతో నేను ఏమాత్రం సంతృప్తి చెందలేదు. భవనం దీన స్థితిలో లేదని, దానికి మరమ్మతులు మాత్రమే అవసరమని ప్రభుత్వం తరుఫున మంత్రి పేర్కొన్నారు. కానీ పరిస్థితి ఎంత దారుణంగా ఉందో నేను నా కళ్ళతో చూశాను.” అని మైథిలి మండిపడ్డారు. ఆసుపత్రిలో ఒక చిన్న గదిలో ఆరోగ్య సేవలు నిర్వహిస్తున్నారని, ప్రస్తుతం MBBS వైద్యులు లేరని ఆమె వివరించారు. గతంలో ఇద్దరు వైద్యులు ఉండేవారు, కానీ ఇప్పుడు ఎవరూ అందుబాటులో లేరని తెలిపారు. ప్రతి సంవత్సరం ఆరోగ్య బడ్జెట్ పెంచుతున్నప్పటికీ ఆసుపత్రులు ఎందుకు మెరుగుపడటం లేదని ఎమ్మెల్యే ప్రశ్నించారు . వైద్యులు, మందుల కొరత ఒక సమస్య అయినప్పటికీ, శిథిలావస్థలో ఉన్న భవనాలు ఎప్పుడైనా కూలిపోయే ప్రమాదం ఉందని అన్నారు. పెద్ద ప్రమాదం తర్వాత మాత్రమే కొత్త భవనాలు నిర్మిస్తారా అని ప్రభుత్వాన్ని ఎమ్మెల్యే మైథిలి ప్రశ్నించారు.

ఆరోగ్య మంత్రి స్పందిస్తూ.. ఈ విషయాన్ని ప్రభుత్వం తీవ్రంగా పరిగణిస్తోందన్నారు. అనేక ఆసుపత్రులకు కొత్త భవనాలు మంజూరు చేశామన్నారు. కొన్ని ప్రదేశాలలో పనులు జరుగుతున్నాయని శాసససభలో తెలిపారు. చాలా శిథిలావస్థలో ఉన్న భవనాలను గుర్తించి మరమ్మతు ప్రణాళికలు రూపొందించామని వెల్లడించారు. కానీ మైథిలి ఠాకూర్ ఈ సమాధానంతో సంతృప్తి చెందలేదు. తన ఆసుపత్రి చాలా సంవత్సరాలుగా జాబితాలో ఉందని, కానీ మరమ్మతులు ప్రారంభించలేదని, కొత్త భవనం నిర్మించలేదని ఆమె వెంటనే మరమ్మతులు చేపట్టాలని డిమాండ్ చేశారు.

వీడియో ఇక్కడ చూడండి..

ప్రశ్నలు పదే పదే లేవనెత్తడంతో సభలో వాతావరణం కాసేపు వేడెక్కింది. ప్రతిపక్ష ఎమ్మెల్యేలు మద్దతుగా టేబుల్‌ను చప్పట్లు కొట్టగా, అధికార పక్షం అసౌకర్యంగా కనిపించింది. తొలిసారి అసెంబ్లీలో మాట్లాడుతున్న మైథిలి ఠాకూర్, ప్రతిపక్ష నాయకురాలు తేజస్వి యాదవ్ లేకపోవడం గురించి కూడా బహిరంగంగా మాట్లాడారు.

మరిన్ని జాతీయ వార్తల కోసం ఇక్కడ క్లిక్ చేయండి..