సింగం 3 సీన్ రిపీట్.. ఇండియాలోకి అక్రమంగా నాలుగు కంటైనర్లు! తెరిచి చూసి అధికారులే షాక్..! మన దేశం డస్ట్బీనా?
గుజరాత్లో DRI సంచలన "ఆపరేషన్ డిజిస్క్రాప్" చేపట్టింది. 23 కోట్ల విలువైన పాత ల్యాప్టాప్లు, CPUలు, ఇతర ఎలక్ట్రానిక్ వ్యర్థాలను నాలుగు కంటైనర్లలో అక్రమంగా దిగుమతి చేసుకుంటున్న ముఠాను పట్టుకుంది. సూరత్ సూత్రధారిని అరెస్టు చేశారు. ఈ-వ్యర్థాలు పర్యావరణానికి ప్రమాదకరం కావడంతో కఠిన చర్యలు తీసుకున్నారు.
Updated on: Oct 05, 2025 | 7:05 AM
సూర్య హీరోగా వచ్చిన సింగం 3 మూవీ ఎవరైనా చూసి ఉంటే వారికి ఈ వార్త ఆ మూవీలోని ఓ పెద్ద సీన్ గుర్తుకు తెస్తుంది. సినిమాలో విలన్ ఆస్ట్రేలియా నుంచి ఎలాక్ట్రానిక్ వేస్ట్, మెడికల్ వేస్ట్ను కంటైనర్లలో పంపుతూ ఇండియాలో డంప్ చేస్తుంటాడు. అచ్చం అలాగే గుజరాత్లోకి ఓ నాలుగు కంటైనర్లు వచ్చాయి. వాటిని తెరిచిన అధికారులు దెబ్బకు షాక్ అయ్యారు. అందులో దాదాపు రూ.23 కోట్ల డిజి స్క్రాప్ ఉంది. “ఆపరేషన్ డిజిస్క్రాప్” అనే కోడ్నేమ్ కింద ముంబై డైరెక్టరేట్ ఆఫ్ రెవెన్యూ ఇంటెలిజెన్స్ (DRI) పెద్ద ఎత్తున పాత ,ఉపయోగించిన ల్యాప్టాప్లు, CPUలు, మదర్బోర్డులు, ప్రాసెసర్ చిప్లు, ఇతర ఎలక్ట్రానిక్ భాగాలను స్వాధీనం చేసుకుంది. వీటి విలువ సుమారు రూ.23 కోట్లు ఉంటుందని అంచనా.
ఈ ఆపరేషన్ సమయంలో ఈ అక్రమ దిగుమతిని నడిపించిన సూరత్కు చెందిన సూత్రధారిని కూడా DRI అరెస్టు చేసింది. భారతదేశంలోకి అక్రమంగా రవాణా చేయబడిన ఈ సరుకులో పర్యావరణానికి హానికరమైన వస్తువులు, ముఖ్యంగా ఈ-వ్యర్థాలు ఉన్నాయని DRI శనివారం ఒక ప్రకటనలో తెలిపింది. ఈ ఉపయోగించిన ల్యాప్టాప్లు, CPUలు, సంబంధిత ఎలక్ట్రానిక్ వస్తువులను నవా షెవా పోర్టులోని నాలుగు వేర్వేరు కంటైనర్లలో “అల్యూమినియం ట్రీట్ స్క్రాప్” సరుకుల్లో దాచి మోసపూరితంగా భారతదేశానికి దిగుమతి చేసుకున్నట్లు వివరణాత్మక దర్యాప్తులో వెల్లడైంది. ఈ నాలుగు కంటైనర్లలో ప్రతి ఒక్కటి ల్యాప్టాప్లు, CPUలు, ప్రాసెసర్ చిప్లు, అనేక ఇతర ఎలక్ట్రానిక్ భాగాలతో నిండి ఉన్నాయి, ఇవి ప్రకటించిన అల్యూమినియం స్క్రాప్ కొన్ని వరుసల వెనుక దాగి ఉన్నాయి. దాచిపెట్టే పద్ధతి ప్రామాణిక కస్టమ్స్ తనిఖీలు, నిబంధనలను దాటవేయడానికి జాగ్రత్త పడ్డారు.
ఈ ఆపరేషన్ ఫలితంగా 17,760 పాత, ఉపయోగించిన ల్యాప్టాప్లు, 11,340 మినీ లేదా బేర్బోన్ CPUలు, 7,140 ప్రాసెసర్ చిప్లు, ఇతర ఎలక్ట్రానిక్ భాగాలను స్వాధీనం చేసుకున్నారు. ఇవన్నీ కలిపి రూ.23 కోట్ల విలువైనవి. ఈ వస్తువులను 1962 కస్టమ్స్ చట్టంలోని సెక్షన్ 110 నిబంధనల ప్రకారం జప్తు చేశారు. విదేశీ వాణిజ్య విధానం (FTP) 2023, E-వేస్ట్ (నిర్వహణ) నియమాలు 2022, ఎలక్ట్రానిక్స్, ఐటీ వస్తువులు (తప్పనిసరి నమోదు) ఆర్డర్, 2021 వంటి బహుళ చట్టపరమైన చట్రాల ప్రకారం పాత, ఉపయోగించిన ల్యాప్టాప్లు, CPUలు, ఇలాంటి ఎలక్ట్రానిక్ ఉత్పత్తులను దిగుమతి చేసుకోవడాన్ని నిషేధించాయి. ప్రజారోగ్యం, పర్యావరణ భద్రతను పరిరక్షించే లక్ష్యంతో ఈ నిబంధనలు బ్యూరో ఆఫ్ ఇండియన్ స్టాండర్డ్స్ (BIS) భద్రత, లేబులింగ్ అవసరాలకు అనుగుణంగా ఉండాలి. ప్రభుత్వ విధానం ప్రకారం, అటువంటి నిషేధిత వస్తువులను తిరిగి ఎగుమతి చేయాలి లేదా నిరుపయోగంగా మార్చాలి, పర్యావరణ, ఆరోగ్య ప్రమాదాలను నివారించడానికి స్క్రాప్గా పారవేయాలి.
మరిన్ని జాతీయ వార్తల కోసం ఇక్కడ క్లిక్ చేయండి
