సరదాగా ఈతకు వెళ్లిన ఐదుగురు అమ్మాయిలు..! కొద్దిసేపట్లోనే తీవ్ర విషాదం..

ఓ ఐదుగురు అమ్మాయిలు సరదాగా ఈతకు వెళ్లారు. నీటిలోకి దూకారు.. కానీ, అంతలోనే ఐదుగురు కూడా నీట మునిగారు. ప్రమాదం గ్రహించి.. కేకలు వేయడంతో అక్కడున్న వారు వారిని కాపాడే ప్రయత్నం చేసినా.. అందులో ముగ్గురు మరణించారు. ఈ విషాద ఘటన బీహార్‌లోని మధుబనిలో చోటు చేసుకుంది. ముగ్గురు అమ్మాయిల మరణంతో ఆ గ్రామంలో విషాదఛాయలు అలుముకున్నాయి.

ఐదుగురు బాలికలు స్నానం చేయడానికి రహికాలోని పాత కమ్లా కాలువ వద్దకు చేరుకున్నారు. కానీ స్నానం చేస్తుండగా, ఐదుగురు అకస్మాత్తుగా మునిగిపోవడం ప్రారంభించారు. ఈ సమయంలో వారు తమను తాము రక్షించుకోవడానికి బిగ్గరగా కేకలు వేయడం ప్రారంభించారు. బాలికల గొంతు విని, అక్కడ ఉన్న వ్యక్తులు ఇద్దరి ప్రాణాలను కాపాడారు. మిగిలిన ముగ్గురి పరిస్థితి విషమంగా ఉండటంతో రహికా ప్రాథమిక ఆరోగ్య కేంద్రానికి తరలించారు. అక్కడ ముగ్గురు బాలికలు మరణించారు. మృతులు రాణి పర్వీన్, పహేలి పర్వీన్, నదియాన్ ఖాతున్‌గా గుర్తించారు. ఈ బాలికలందరూ రహికా బాడి మసీదు తోలా నివాసితులు.

అదే సమయంలో పరిహారం కోసం కుటుంబ సభ్యులు, గ్రామస్థులు తీవ్ర ఆందోళన చేశారు. మధుబని-బేనిపట్టి హైవేను దిగ్బంధించారు. సంఘటనా స్థలానికి చేరుకున్న SDO మరియు CO ప్రజలకు పరిహారం అందిస్తామని హామీ ఇచ్చారు. వారిని రక్షించి.. ఆస్పత్రికి తరలించినా.. చికిత్స అందించడంతో నిర్లక్ష్యం వహించడంతోనే తమ పిల్లలు చనిపోయారంటూ కుటుంబ సభ్యులు ఆరోపిస్తూ ఆందోళన చేశారు. చాలా మంది అధికారులు సంఘటనా స్థలానికి చేరుకుని వారిని ఒప్పించి రోడ్డు అడ్డంకిని తొలగించారు. మరణించిన బాలికల కుటుంబ సభ్యులకు సాధ్యమైనంత సహాయం చేస్తామని, చికిత్స సమయంలో నిర్లక్ష్యంపై దర్యాప్తు చేస్తామని హామీ ఇచ్చారు.

మరిన్ని జాతీయ వార్తల కోసం ఇక్కడ క్లిక్‌ చేయండి