బొద్దింక తర్వాత ఈగ.. సీజేఐ ఒక్క కామెంట్‌తో పుట్టుకొచ్చిన మక్కీ జనతా పార్టీ..

సుప్రీంకోర్టు ప్రధాన న్యాయమూర్తి జస్టిస్ సూర్యకాంత్ చేసిన ఓ వ్యాఖ్య సోషల్ మీడియాలో సరికొత్త సెటైరికల్ ఉద్యమానికి తెరలేపింది. గతంలో వచ్చిన కాక్రోచ్ జనతా పార్టీ తరహాలోనే.. ఇప్పుడు ఇన్‌స్టాగ్రామ్‌లో మక్కీ జనతా పార్టీ పేరుతో ఏర్పాటైన ఒక వ్యంగ్య ఖాతా నెట్టింట విపరీతమైన వైరల్ అవుతోంది. కేవలం 72 గంటల వ్యవధిలోనే ఈ పేజీకి 40 లక్షలకు పైగా వ్యూస్, 3.3 లక్షలకు పైగా ఫాలోవర్లు వచ్చి చేరడం విశేషం. అక్టోబర్ 9న ఢిల్లీలో కాక్రోచ్ జనతా పార్టీ తలపెట్టిన నిరసనకు ముందు ప్రజా రవాణా వ్యవస్థను పూర్తిగా స్తంభింపజేయడంపై సుప్రీంకోర్టు విచారణ చేపట్టింది. భద్రతా కారణాలతో రవాణాను నియంత్రించవచ్చని, కానీ మొత్తం వ్యవస్థను ఆపేయడం సరికాదని జస్టిస్ సూర్యకాంత్ నేతృత్వంలోని ధర్మాసనం వ్యాఖ్యానించింది. ఈ సందర్భంగా అధికారుల చర్యలను తప్పుబడుతూ.. ‘‘ఒక చిన్న ఈగను చంపడానికి ఏకంగా సుత్తిని ఉపయోగించలేరు కదా’’ అంటూ ప్రధాన న్యాయమూర్తి చురకలంటించారు.

ఈగ పేరుతో నయా పార్టీ ఆవిర్భావం

సీజేఐ చేసిన ఈ వ్యాఖ్యను ఆధారంగా చేసుకుని సోషల్ మీడియాలో మక్కీ జనతా పార్టీ పుట్టుకొచ్చింది. ‘‘స్వయంగా సీజేఐ ఈగను చంపడానికి సుత్తి వాడకూడదు అని అన్నప్పుడు.. మేమేమీ ఎవరికీ తక్కువ కాదని ఇప్పుడు ఈగ కూడా గర్వంగా చెబుతుంది’’ అంటూ హిందీలో పోస్టు పెట్టింది. ఆర్యన్ అనే విద్యార్థి ఈ పేజీ వ్యవస్థాపకుడిగా గుర్తించగా.. తమ పార్టీకి అధికార ప్రతినిధులు కావాలంటూ ఇన్‌స్టాగ్రామ్ స్టోరీల్లో ప్రకటనలు కూడా ఇస్తుండటం చర్చనీయాంశంగా మారింది.

గతంలో CJP.. ఇప్పుడు MJP

ఇన్‌స్టాగ్రామ్ ఖాతా వివరాల ప్రకారం.. ఈ పేజీ జూన్ 2021లోనే ప్రారంభమైనప్పటికీ, సుమారు ఎనిమిది సార్లు యూజర్‌నేమ్ మార్చుకుని చివరకు makhijantapartyగా స్థిరపడింది. గతంలో సీజేఐ చేసిన వ్యాఖ్యలతో కాక్రోచ్ జనతా పార్టీ పుట్టుకొచ్చి తర్వాత పెద్ద ప్రజా ఉద్యమంగా మారిన సంగతి తెలిసిందే. ఇప్పుడు అదే బాటలో మక్కీ జనతా పార్టీ కూడా నెటిజన్ల దృష్టిని ఆకర్షించే పనిలో పడింది.

View this post on Instagram

A post shared by @makhijantaparty.ig