మైనర్లు, యువకులే అతని టార్గెట్.. ఫోన్లో 600 వీడియోలు! 4 ఏళ్లుగా ఇదే పని

మహారాష్ట్రలోని నందుర్బార్ జిల్లాలో మైనర్లు, యువకులను లక్ష్యంగా చేసుకుని లైంగిక వేధింపులకు పాల్పడుతూ, వారి వ్యక్తిగత వీడియోలను సోషల్ మీడియాలో ప్రచారం చేస్తామని బెదిరించి బ్లాక్‌మెయిల్ చేస్తున్నారనే ఆరోపణలపై పోలీసులు 22 ఏళ్ల యువకుడిని అరెస్టు చేశారు. నిందితుడు 2022 నుంచి ఈ వ్యవహారానికి పాల్పడుతున్నట్లు ప్రాథమిక దర్యాప్తులో వెల్లడైనట్టు పోలీసులు తెలిపారు. పోలీసుల వివరాల ప్రకారం.. నందుర్బార్ జిల్లాలోని రైసింగ్‌పురాకు చెందిన చేతన్ ప్రకాష్ కోలి అనే యువకుడు మైనర్లు, యువకులను డబ్బు ఆశ చూపి తన వలలోకి దింపుతున్నట్లు పోలీసులకు సమాచారం అందింది. అనంతరం పోలీసులు దర్యాప్తు చేపట్టి నిందితుడిని అదుపులోకి తీసుకున్నారు.

నిందితుడి మొబైల్ ఫోన్‌ను పరిశీలించగా అందులో పెద్ద సంఖ్యలో అభ్యంతరకరమైన వీడియోలు, ఫొటోలు ఉన్నట్లు గుర్తించారు. అతడి ఫోన్ నుంచి 600కు పైగా అశ్లీల వీడియోలను స్వాధీనం చేసుకున్నట్లు నందుర్బార్ పోలీస్ సూపరింటెండెంట్ అశ్విని సనాప్ వెల్లడించారు. ఈ ఫోన్‌ను ఫోరెన్సిక్ బృందం స్వాధీనం చేసుకుని, అవసరమైన ప్రాథమిక పరిశీలనలు పూర్తి చేసిన అనంతరం తదుపరి పరీక్షల కోసం పంపినట్లు తెలిపారు.

మొబైల్‌లో లభించిన వీడియోలు, ఇతర డిజిటల్ ఆధారాల ఆధారంగా బాధితులను గుర్తించే ప్రక్రియను పోలీసులు ప్రారంభించారు. ఇప్పటికే గుర్తించిన బాధితులను సంప్రదించి వారి వాంగ్మూలాలను నమోదు చేస్తున్నట్లు అధికారులు వెల్లడించారు. దర్యాప్తులో భాగంగా నిందితుడు 2022 నుంచి ఇదే విధంగా మైనర్లు, యువకులను వేధిస్తున్నట్లు సమాచారం బయటపడిందని పోలీసులు తెలిపారు. బాధితుల వ్యక్తిగత వీడియోలు, ఫొటోలను ఉపయోగించి వారిని బెదిరించడం, వాటిని సోషల్ మీడియాలో ప్రచారం చేస్తామని చెప్పి ఒత్తిడి చేయడం వంటి చర్యలకు పాల్పడినట్లు ఆరోపణలు ఉన్నాయి.

మైనర్లకు సంబంధించిన కేసు కావడంతో పోలీసులు దర్యాప్తును అత్యంత జాగ్రత్తగా కొనసాగిస్తున్నారు. నిందితుడి మొబైల్‌లో లభించిన డిజిటల్ ఆధారాలను ఫోరెన్సిక్ నిపుణులు విశ్లేషిస్తున్నారని, వాటి ఆధారంగా మరింత మంది బాధితులు ఉన్నారా? ఈ వ్యవహారంలో మరెవరైనా సంబంధం కలిగి ఉన్నారా? అనే కోణాల్లోనూ విచారణ కొనసాగుతున్నట్లు అధికారులు తెలిపారు. బాధితుల గుర్తింపును గోప్యంగా ఉంచుతూ వారి వాంగ్మూలాలను నమోదు చేస్తున్న పోలీసులు, డిజిటల్ ఆధారాలను సేకరించి కేసు దర్యాప్తును ముందుకు తీసుకెళ్తున్నారు. ఈ ఘటనలో నిందితుడిపై వర్తించే చట్టాల ప్రకారం తదుపరి చర్యలు తీసుకోనున్నట్లు పోలీసులు తెలిపారు.

మరిన్ని జాతీయ వార్తల కోసం ఇక్కడ క్లిక్ చేయండి